Ki Futuro Ta Spera Medicina?

ORA bo puntra tocante ki futuro ta spera docternan, esei hopi bes ta hiba na speculacion relaciona cu avancenan den tecnologia y na e pregunta si esakinan lo libra docternan di tareanan rutinario ya asina nan por dedica mas tempo na e pashent como persona. Naturalmente e futuro di docternan ta estrechamente liga cu e cuestion mas grandi di kico tin den futuro pa humanidad. Dos buki biblico cu ta duna informacion tocante e futuro ei ta conta e historia di Hesus y su apostelnan. Ta un docter a skirbi ambos buki.

Dicon ta masha interesante cu nos tin e punto di bista di un docter den e relatonan aki? Kico nan tin di aber cu e futuro pa docter y pashent? Dicon algun docter ansiosamente ta spera e tempo ora cu nan profesion lo no ta necesario mas?

Hopi docter ta bon observado. Lucas, yama “e docter stima”, a skirbi dos buki biblico, y el a duna descripcionnan detaya di algun di e hendenan enfermo cu Hesus y tambe e apostelnan a cura. (Colosensenan 4:14) Pues Lucas ta yuda nos considera e preguntanan: E cosnan aki realmente a sosode? Y si ta asina, kico esaki ta nifica pa docter y pashent awe?

Examinacion di Evidencia Medico

Lucas tawatin oportunidad pa verifica e naturalesa milagroso di e curacionnan cu a tuma luga door di entrevista hende cu tawata testigo di nan. Ademas, el a biaha extensamente cu apostel Pablo. Aparentemente, Pablo a cura varios hende den presencia di Lucas. Segun cu nos ta considera e docter su relato di dos di e curacionnan ei, tuma nota di cuanto detaye el a inclui.

Lucas ta duna e ora, fecha y luga di e siguiente suseso: Tawata meianochi riba e prome dia di siman, y un grupo di cristian tawata den un sala na di tres piso di un cas na Troas, den e provincia Romano di Asia. (Echonan 20:4-8) Nos ta lesa e detayenan aki: “Tawatin un hoben cu yama Eutico, kende tawata sinta den bentana, y el a pega un soño profundo; y ora Pablo a keda papia asina tanto, soño a podera di dje di tal manera cu el a cai for di e di tres piso, y nan a lant’e morto for djabou.” E ora ei cu e poder di Dios, Pablo a cura e hoben su lesionnan y a restaur’e na bida. Despues di come, “nan a bai cu e hoben, bibo, y a keda masha consola.”—Echonan 20:9-12.

Tambe Lucas ta informa cu e tawata hunto cu Pablo na Malta. Nan tawata serca “e homber principal” di e isla, Publio, kende a mustra hospitalidad na nan, ora cu Pablo a haci un otro milager. Tawata trata di un homber kende su malesa, den e tempo ei prome cu e era di antibiotica, lo por tawata un peliger pa su bida. Lucas ta conta: “E tata di Publio tawata drumi malo cu keintura y disenteria; y Pablo a drenta bai mir’e y despues cu el a haci oracion, el a pone su mannan riba dje y a cur’e. Y despues cu esaki a sosode, e otro hendenan di e isla cu tawatin malesanan tawata bin serca dje y tawata wordo cura.”—Echonan 28:7-9.

Kico A Combence e Docter?

Lucas a skirbi e relatonan ei den e buki di Echonan tempo cu su lectornan ainda por a verifica e echonan door di papia cu e hendenan envolvi. Relaciona cu loke el a skirbi den e buki biblico cu ta carga su nomber, Lucas a skirbi: “[Mi] a investiga tur cos cuidadosamente for di principio . . . pa bo por sa e berdad exacto tocante di e cosnan.” (Lucas 1:3, 4) Loke e docter aki a mira y a investiga a combenc’e cu e siñansanan di Hesus tawata berdad. E curacionnan milagroso tawata parti di e siñansanan ei, y a duna un base pa kere e profecia biblico cu Dios cu tempo lo elimina malesa. (Isaias 35:5, 6) Como un docter cu tawata custumbra di trata cu sufrimento, Lucas lo mester a hay’e hopi alentador pa contempla un tempo ora cu su profesion lo no ta necesario mas. Abo ta haya tal perspectiva atractivo?

Ta interesante cu ta esaki ta loke tin den futuro pa hende cu ta stima Dios, sin importa unda nan ta biba riba tera. Bijbel ta priminti cu bou di e Reino di Dios, “ningun habitante lo no bisa: ‘Mi ta malo.’” (Isaias 33:24) Hopi docter djawe a yega na e conclusion cu tin un base logico pa kere e promesanan di Bijbel.

‘Esei A Atrae Mi Hopi’

Dr. Jon Schiller, un docter di cas na Norte America a bisa: “Mescos cu mayoria hende, mi a studia medicina pa yuda hende cu ta sufri di malesa. E speransa di un mundo sin malesa a atrae mi hopi. Mi a cuminsa asisti na e reunionnan di Testigonan di Yehova despues cu na universidad mi a sigui un les di historia di civilisacion Occidental. E les ei a mustra cu religionnan tawata e causa di cantidad di problema, y den mi opinion nan tawata tambe hipocrita den e manera cu nan a uza Bijbel. Pesei mi a puntra mi mes: ‘Kico Bijbel realmente ta bisa?’

Loke na prome instante a atrae mi na e Salon di Reino di Testigonan di Yehova tawata e hendenan amabel, kendenan tawata un dushi contraste cu hopi di mi conocinan. Un Testigo a acerca mi y a ofrece pa bishita mi pa papia tocante Bijbel. Loke a impresiona mi tawata cu sin importa kico mi a puntr’e, el a mustra mi e contesta den Bijbel.

Mas mi edad ta subi, mas mi ta aprecia cu mi ta un Testigo di Yehova. Ora bo cuminsa como docter hoben, bo tin e speransa di logra algo cu ta bale la pena. Pero mas y mas mi ta topa personanan desilusiona cu ta sinti cu nan no a echt logra masha cos den bida. Mi ta kere cu un di e cosnan mas maraviyoso di ta un Testigo di Yehova ta cu nos tin un speransa pa futuro y un proposito den bida. Sea cu nos ta docter, mecanico of un hende cu ta haci trabou di limpiesa, nos sa cu loke nos ta haciendo den nos sirbishi na Dios ta algo cu ta bale la pena; nos ta haciendo algo pa Yehova. Y esei ta duna nos satisfaccion.”

“Door di Aplica Principionan Biblico Nos Bida di Famia A Drecha”

Dr. Krister Renvall ta un docter na Finlandia, y semper e ta gusta papia cu mucha. El a conta: “Un dia mi a papia cu un mucha mohe di 12 aña cu tawatin cancer terminal. El a duna mi un buki titula Berdadero paz y siguridad—di ki fuente?a E mucha ei su expresionnan di fe durante e fasenan final di su malesa a impresiona mi, pero mi no a haya tempo pa lesa e buki. De echo, e tempo ei mi tawata asina druk cu trabou na un clinica na Helsinki, cu esei a afecta mi famia.

Sinembargo, poco tempo despues mi esposa a saca e buki for di den reki y a cuminsa les’e. El a keda combenci mesora cu loke e tawata lesa ta e berdad. Un Testigo di Yehova a bishit’e y a cuminsa studia Bijbel cu ne. Na principio mi esposa tawatin un poco miedo di bisa mi esei. Pero ora el a bisa mi, mi di: ‘Cualkier cos cu por yuda nos famia ta bonbini.’ Mi a cuminsa participa den e estudio. Door di aplica principionan biblico nos bida di famia a drecha y nos a haya un punto di bista nobo pa cu bida. Mi a keda encanta di siña tocante e speransa di un mundo sin malesa; a parce mi logico cu Dios lo tin un proposito asina pa humanidad. Den poco tempo ami cu mi casa a batisa, y finalmente henter e famia. E mucha chikito cu a papia cu mi pa prome bes a muri, pero de echo, su fe ta sigui biba.”

Den nos mundo cu ta cambiando rapidamente docternan tin mas y mas stress, locual ta haci nan sacrificio pa yuda hende enfermo un cos realmente digno di elogio. Pero pronto nos lo experencia e cambio di mas grandi cu nunca cu lo afecta humanidad. Hopi docter awe cu confiansa ta spera ansiosamente riba e futuro cu e Palabra di Dios ta priminti—un mundo sin malesa! (Revelacion 21:1-4) Esaki ta un topico cu ta bale la pena pa nos investiga personalmente.

[Nota]

[Cuadro/Plachi na pagina 10, 11]

“MI A REALISA CU BIDA TIN UN PROPOSITO”

“Tempo cu mi tawata traha cu muchanan di scol cu incapasidad, mi a ripara cu e mayornan cu tawata Testigo di Yehova a destaca. Nan a parce miho prepara pa deal cu un yiu cu incapasidad cu otro mayornan den e mesun situacion. Tambe mi a ripara cu nan tawata miho educa di loke lo bo a spera di hende den nan ramo di trabou. Mi a admira nan fe. Docentenan di e teoria di evolucion a caba casi completamente cu mi fe. No obstante, mi estudio di medicina a laga mi intriga pa e procesonan relaciona cu bida.

Na mesun tempo mi a cuminsa realisa cu mi no tawata sa con pa lanta mi yiunan. Kico mi mester prohibi nan? Kico mi mester anima nan pa haci? Kico lo mi por a duna nan como un proposito den bida? Mi propio bida a perde sentido. Mi a asta resa pa yudansa.

Ta e ora ei Testigonan di Yehova a trece un revista pa mi tocante con pa corigi y disiplina mucha cu amor. Mi a haya cu e principionan biblico cu e revista a splica tawata realmente practico, y pesei mi a acepta ora nan a ofrece mi un estudio di Bijbel. Mi a siña dicon Yehova a crea bida y pakico Hesus a muri, y mi a bin realisa cu bida tin un proposito. (Huan 3:16; Romanonan 5:12, 18, 19) Evolucion a bruha mi manera di pensa. Esta un alivio mi a sinti ora mi a siña cu malesa y morto no tawata parti di Dios su proposito original! Te awe mi ta haya berdadero satisfaccion den siña hende sinsero con Dios pronto lo cura tur malesa.”

[Plachinan]

Helena Bouwhuis a traha como docter pa muchanan di scol na Hulanda

[Plachinan na pagina 9]

E docter y escritor biblico Lucas tawata Pablo su compañero di biahe ora cu e apostel a cura e tata di Publio y a resusita Eutico

[Plachinan na pagina 10]

Dr. Jon Schiller, Merca

[Plachinan na pagina 10]

Dr. Krister Renvall, Finlandia