Guia pa Yuda Nos Ta na Paz cu Otro Hende

Nos Mester Ta Cla pa Pordona

“Sigui ... pordona otro libremente, hasta si un di boso tin motibo pa keha un otro.”—COLOSENSENAN 3:13.

Nos tur ta comete eror. Nos por ofende otro hende of otro hende por ofende nos. Sin importa ken a ofende ken, nos tur mester pordona otro y pa otro pordona nos. Ora nos pordona un hende cu a ofende nos, nos lo no sigui carga rencor contra dje. Nos no ta “paga malo cu malo”, y nos no ta keda corda e persona riba su fayonan of debilidadnan. (Romanonan 12:17) Pero kico si un persona a hurt nos asina hopi cu nos no por stop di pensa riba loke el a haci? E ora ey, nos tin cu papia cu e persona den priva y na un manera respetuoso tocante e asunto. Nos meta mester ta pa haci paz y no pa mustra cu nos tabatin rason.—Romanonan 12:18.

Nos Mester Ta Humilde y Respetuoso

“Cu humildad, considera cu otro hende ta superior na boso.”—FILIPENSENAN 2:3.

Ora nos ta humilde y respetuoso, hende ta sinti nan bon rond di nos. Nan sa cu nos lo ta amabel y cu nos lo no kier hurt nan intencionalmente. Pero si nos ta pensa cu nos ta mihor cu otro hende of si semper nos ta insisti pa hende haci cos na nos manera, nos lo causa conflicto y crea tension. E ora ey, hende lo no kier ta rond di nos, y nos lo tin masha poco amigo of niun mes.

Nos Mester Ta Imparcial

“Dios no ta haci distincion di persona, sino cu e ta acepta tur hende di tur nacion cu ta tem’e y cu ta haci loke ta corecto.”—ECHONAN 10:34, 35.

Nos Creador no ta halsa un grupo di hende riba otro pa motibo di nan nacionalidad, idioma, nivel social of color di cuero. “For di un hende el a traha tur nacion.” (Echonan 17:26) Esey kiermen cu tur hende ta ruman. Ora nos trata tur hende cu dignidad y ta amabel cu nan, nos lo haci nan feliz, nos mes lo ta mas feliz y nos lo agrada nos Creador.

Nos Mester Ta Suave

“Bisti ... suavidad.”—COLOSENSENAN 3:12.

Ora nos ta suave, nos ta laga otro hende sinti nan comodo rond di nos. Nan ta sinti cu nan por papia cu nos y hasta corigi nos, pasobra nan sa cu nos lo keda calmo. Ademas, ora un persona rabia cu nos, un contesta suave por calma e persona. Proverbionan 15:1 ta bisa: “Un contesta suave ta kita rabia, ma un palabra skerpi ta lanta rabia.”

Nos Mester Ta Generoso y Agradecido

“Tin mas felicidad den duna cu den ricibi.”—ECHONAN 20:35.

Awendia, hopi hende ta golos pa placa y ta pensa riba nan mes so. Pero ta hende generoso lo ta berdaderamente feliz. (Lucas 6:38) Hende generoso ta feliz pasobra nan ta stima hende mas cu nan ta stima cos material. E amor ey ta motiva nan pa ta agradecido y pa mustra nan aprecio ora un hende ta generoso cu nan. (Colosensenan 3:15) Puntra bo mes: “Ken mi ta prefera di tin como amigo, un persona cu nunca ta agradecido y cu no sa comparti nada, of un persona cu ta generoso y agradecido?” Kico nos por siña for di esey? Nos mester ta e tipo di persona cu nos kier pa otronan ta.—Mateo 7:12.