Loke Nos Por Siña for di Organismo Bibo

Ta parce cu bida a ser diseña. Un organismo ta consisti di hopi cel. Cada cel mester haci hopi cos complica pa asina e organismo por sigui biba y reproduci. Esey ta e caso hasta pa e organismonan di mas simpel. Tuma, por ehempel, zuurdeeg uza pa traha pan. E ta consisti di un tipo di cel so. Compara cu cel di hende, e cel di zuurdeeg por parce simpel. Sinembargo, e ta masha complica mes. E centro di cada cel ta contene DNA, un codigo cu ta bisa e cel kico pa haci. Cada cel tin un tipo di “mashin” microscopico cu ta sortia, transporta y modifica molecule. E stapnan ey ta importante pa e organismonan aki por biba. Ora e cuminda di un cel di zuurdeeg caba, e ta cuminsa un proceso kimico hopi sofistica cu ta pone e cel baha velocidad y bira inactivo, pero bibo, comosifuera ta drumi e ta. Pa e motibo ey, por warda zuurdeeg den cushina y activ’e bek despues pa traha pan.

Cientificonan tin hopi aña ta studia e cel di zuurdeeg pa nan por compronde e cel di hende mihor. Pero ainda tin hopi cos cu nan no ta compronde. Profesor Ross King di Chalmers University of Technology na Suecia a bisa: “No tin suficiente biologo pa haci tur e experimentonan cu nos kier haci pa compronde sikiera con un organismo simpel manera zuurdeeg ta funciona.”

Kico abo ta pensa? E echo cu e simpel cel di zuurdeeg ta asina complica, no ta proba cu e tabata diseña? Un diseño asina complica por a bin na existencia sin un diseñador?

Bida por bin solamente for di otro cos bibo. DNA ta consisti di hopi molecule cu yama nucleotide. Cada cel humano tin 3,2 mil miyon nucleotide. E moleculenan aki ta crea un codigo specifico cu ta bisa e cel con pa traha enzima y proteina.

E chens pa e nucleotide di mas simpel forma riba su mes ta menos cu 1 den 10¹⁵⁰ (1 cu 150 cero su tras). Un suceso asina ta practicamente imposibel.

Echo ta cu cientificonan nunca a logra traha algo bibo for di algo sin bida.

Bida humano ta algo masha special. Ningun organismo bibo no por disfruta di bida plenamente manera hende. Nos tin e habilidad di crea cos, socialisa y expresa nos emocionnan. Nos por disfruta cu plenitud di diferente sabor, holo, zonido, color y escena. Nos ta plania pa futuro y ta busca proposito den bida.

Kico abo ta pensa? E habilidadnan ey a evoluciona den nos pasobra nos tabatin mester di nan pa sobrevivi y reproduci? Of nan ta indica cu bida ta un regalo di un Creador amoroso?