Jose Sera den Prizon

JOSE tabatin 17 aña di edad so ora nan a hib’e Egipto. Nan a bend’e cu un homber yama Potifar. Potifar a traha pa e rei di Egipto, yama Farao.

Jose a traha duro pa su doño Potifar. P’esei, ora Jose a bira mas grandi, Potifar a pon’e na encargo di henter su cas. Pakico, anto, nan a sera Jose den prizon? Debi na e esposa di Potifar.

Jose a crece bira un homber masha nechi mes, y e esposa di Potifar tabata kier pa e drumi cu ne. Pero Jose tabata sa cu esei ta malo y el a nenga. E casa di Potifar a bira masha rabia. P’esei, ora su casa a yega cas, e muher a gaña riba Jose y a bisa: ‘E Jose malbado ei a purba drumi cu mi!’ Potifar a kere su esposa, y el a bira masha rabia cu Jose. P’esei el a manda pa ser’e den prizon.

E homber encarga cu prizon pronto a mira cu Jose ta bon hende. P’esei el a pon’e na encargo di tur otro prizonero. Despues Farao a rabia cu su copero y su panadero, y a sera nan den prizon. Un anochi cada un a haya un soño special, pero nan no tabata sa loke nan soño ta nifica. Su siguiente dia Jose a bisa: ‘Bisa mi kico boso a soña.’ Y despues cu nan a bis’e, Jose a splica nificacion di nan soño cu ayudo di Dios.

Jose a bisa e copero: ‘Denter di tres dia nan lo laga bo sali for di prizon, y lo bo bira copero di Farao atrobe.’ Anto Jose a sigui bisa: ‘Despues cu bo sali, conta Farao tocante mi, y yuda mi sali for di e luga aki.’ Pero Jose a bisa e panadero: ‘Denter di tres dia so Farao lo kap bo cabes afo.’

Riba e di tres dia a sosode net manera Jose a bisa. Farao a kap cabes di e panadero afo. Pero e copero a sali for di prizon y a cuminsa sirbi e rei atrobe. Pero e copero a lubida Jose completamente! E no a conta Farao tocante dje, y Jose tabatin cu keda den prizon.