Gideon y Su 300 Hombernan

BO TA mira kico ta sosode ei? Tur e hendenan ei ta hombernan di guera di Israel. E hombernan cu ta buk abou ta bebiendo awa. E homber cu ta para cerca nan ta Hues Gideon. E ta wak con nan ta bebe awa.

Wak bon e diferente maneranan cu e hombernan ta bebe awa. Algun ta baha cu nan cara te cerca di e awa. Pero un di nan ta cohe e awa den su man y hib’e su boca, di manera cu e por wak kico ta sosode rond di dje. Esei ta importante, pasobra Jehova a bisa Gideon pa scohe solamente hombernan cu ta sigui vigila mientras cu nan ta bebe awa. Dios a bisa cu e mester manda e otronan cas. Ban mira pakico.

E Israelitanan tabata den hopi dificultad atrobe. E motibo ta cu nan no a obedece Jehova. E hendenan di Madian tabata domina nan y haci nan daño. P’esei e Israelitanan a sclama na Jehova pa yudansa, y Jehova a tende nan sclamacion.

Jehova a bisa Gideon pa forma un ehersito, y p’esei Gideon a reuni 32.000 homber di guera. Pero tabatin un ehersito di 135.000 homber contra Israel. Y toch Jehova a bisa Gideon: ‘Bo tin mucho hende.’ Pakico Jehova a bisa esei?

Pasobra si Israel gana e guera, nan por a pensa cu ta nan mes a gan’e. Nan por a pensa cu nan no tabatin mester di yudansa di Jehova pa nan a gana. P’esei Jehova a bisa Gideon: ‘Bisa tur hende cu tin miedo, bai cas numa.’ Ora Gideon a haci esei, 22.000 homber di guera a bai cas. Esei a lag’e cu 10.000 homber so pa bringa contra tur e 135.000 soldanan.

Pero, scucha! Jehova a bisa: ‘Ainda bo tin mucho hende.’ P’esei el a bisa Gideon laga e hombernan bebe awa na e riu, anto tur hende cu baha cu nan cara te den awa pa bebe, e mester a manda cas. ‘Mi ta duna bo e victoria cu e 300 hombernan cu ta sigui vigila mientras cu nan ta bebe’, Jehova a priminti.

Tempo a yega pa e bataya. Gideon a parti su 300 hombernan den tres grupo. El a duna cada homber un cacho y un purun cu un flambeu den dje. Ora cu a bira rond di meianochi, nan tur a reuni rond di e campamento di solda enemigo. Anto na mesun momento nan tur a supla nan cacho, a kibra nan purun y a grita: ‘E spada di Jehova y di Gideon!’ Ora e soldanan enemigo a lanta, nan tabata confundi y yen di miedo. Nan tur a cuminsa core, y e Israelitanan a gana e bataya.