Gigante Riba Tera

SI UN hende yega cerca bo y su cabes ta yega te na blafon di bo cas, kico lo bo pensa? E hende ei mester ta un gigante! Un tempo realmente tabatin gigante riba Tera. Bijbel ta mustra cu nan tata tabata angel for di shelo. Pero, con esei por ta?

No lubida, e mal angel Satanas a keda ocupa causando problema. Asta el a purba hiba e angelnan di Dios den mal caminda. Cu tempo, algun angel a cuminsa scucha Satanas. Nan a bandona e trabou cu Dios tabatin pa nan haci den shelo. Y nan a baha na Tera y a forma curpa humano pa nan mes. Bo sa pakico?

Bijbel ta bisa cu esei ta pa motibo cu e yiunan di Dios ei a mira hende muher bunita na Tera y kier a biba cu nan. P’esei nan a baha na Tera y a casa cu e muhernan ei. Bijbel ta bisa cu esei tabata incorecto, pasobra Dios a traha angel pa biba den shelo.

Ora e angelnan cu nan esposanan a haya yiu, nan yiunan tabata distinto. Talbes na principio nan no a parce mucho distinto. Pero nan a sigui crece bira mas y mas grandi, y bira mas y mas fuerte te cu nan a bira gigante.

E gigantenan ei tabata mal hende. Y dor cu nan tabata asina grandi y fuerte, nan por a haci hende daño. Nan a purba forsa tur hende bira malbado mescos cu nan.

Enok a muri caba, pero tabatin un homber riba Tera awor cu tabata bon hende. E nomber di e homber tabata Noe. E semper a haci loke Dios tabata kier.

Un dia Dios a bisa Noe cu tempo a yega pa E destrui tur hende malbado. Pero Dios tabata bai salba Noe, su famia y hopi animal. Laga nos mira con Dios a haci esei.