Skirbimento Riba Muraya

KICO ta sosode ei? E hendenan ta celebra un fiesta grandi. Rei di Babilonia a invita mil hende importante. Nan ta uza copi y comchi di oro y plata cu nan a cohe for di e tempel di Jehova na Jerusalem. Anto diripiente dede di un man di hende a aparece na laira y a cuminsa skirbi riba muraya. Tur hende a spanta.

Belsasar, nieto di Nabucodonosor, ta Rei awor. El a grita pa trece su sabionan. E Rei a bisa: ‘Ken cu por lesa e skirbimento aki y bisa mi su nificacion lo ricibi hopi regalo y bira e di tres gobernante mas importante den e reino.’ Pero ningun di e sabionan no por a lesa e skirbimento riba muraya, ni no por a duna su nificacion.

Mama di e Rei a tende e boroto y a drenta den e sala di comedor grandi. El a bisa e Rei: ‘Por fabor no spanta asina. Tin un homber den bo reino cu conoce e diosnan santo. Ora bo welo Nabucodonosor tabata Rei el a hacie hefe di tur su sabionan. Su nomber ta Daniel. Lag’e bin, y e lo bisa bo kico tur esei kiermen.’

P’esei nan a trece Daniel di biaha. Despues di a nenga tur regalo, Daniel a cuminsa bisa nan pakico Jehova a yega di kita Nabucodonosor, welo di Belsasar, como Rei den pasado. Daniel a bisa: ‘E tabata masha orguyoso y Jehova a castig’e.’

Daniel a bisa Belsasar: ‘Pero abo tabata sa tur loke a pas’e, y toch bo ta mes orguyoso cu Nabucodonosor tabata. Bo a trece copi y comchi di e tempel di Jehova y ta bebe for di nan. Bo a alaba diosnan traha di palo y piedra, y bo no a duna honor na bo Gran Creador. P’esei Dios a manda e man pa skirbi e palabranan ei.

Daniel a bisa: ‘Esaki ta loke tin skirbi, MENE, MENE, TEKEL, PARSIN.’

MENE kiermen cu Dios a conta e dianan di bo reino y a pone fin na dje. TEKEL kiermen cu bo a ser pisa riba balansa y tin falta. PARSIN kiermen cu bo reino a ser duna na e Medo- y Personan.’

Mientras cu Daniel tabata papia ainda, e Medo- y Personan a cuminsa ataca Babilonia. Nan a captura e stad y a mata Belsasar. Loke a ser skirbi riba muraya a cumpli e mesun anochi! Kico a sosode cu e Israelitanan awor? Nos lo haya sa pronto, pero laga nos mira prome kico a pasa cu Daniel.