Keda Corda Yehova y Su Yiu

LAGA nos bisa cu un hende a duna bo un regalo masha special mes. Kico bo ta haci?— Bo ta djis bis’e danki anto lubida limpi riba e hende cu a duna bo e regalo? Of bo ta keda corda e hende y e cos cu el a haci pa bo?—

Yehova Dios a duna nos un regalo masha special mes. El a manda su Yiu na tera pa e muri pa nos. Bo sa dicon Hesus tawatin cu muri pa nos?— Ta hopi importante pa nos compronde e cos ei.

Manera nos a siña na Capitulo 23, Adam a peca door di kibra e lei perfecto di Dios. Anto nos a haya pica for di Adam, pasobra e ta tata di nos tur. Pesei, kico bo ta kere cu nos tin mester?— Nos tin mester di un tata nobo, na moda di papia; un tata cu a keda perfecto durante henter su bida riba tera. Ken bo ta kere cu por bira un tata asina pa nos?— Si, Hesus ta esun cu por.

Yehova a manda Hesus na tera pa e por a bira manera un tata pa nos na luga di Adam. Bijbel ta bisa: “‘E prome hende, Adam, a bira un alma bibo.’ E ultimo Adam a bira un spirito cu ta duna bida.” Ken tawata e prome Adam?— Si, esun cu Dios a crea for di stof di tera. Anto ken ta e di dos Adam?— Esei ta Hesus. Bijbel ta mustra cu ta Hesus, pasobra e ta bisa: “E prome hende [Adam] ta di tera, traha di stof; e di dos hende [Hesus] ta di shelo.”—1 Corintionan 15:45, 47; Genesis 2:7.

Door cu ta for di shelo Dios a tuma bida di Hesus, anto pon’e den bariga di Maria, Hesus no a haya ningun pica for di Adam. Ta pesei Hesus tawata un hende perfecto. (Lucas 1:30-35) Ta pesei mes tambe, ora Hesus a nace, un angel a bisa e cuidadonan di carne: “A nace pa boso un Salbador.” (Lucas 2:11) Pero pa Hesus por a bira nos Salbador, e mester a haci algo prome. Bo sa ta kico?— E mester a crece bira hende grandi, mescos cu Adam tawata. E ora ei Hesus por a bira e ‘di dos Adam.’

Hesus, nos Salbador, ta bai bira nos “Tata Eterno” tambe. Bijbel ta yam’e asina. (Isaias 9:6, 7) Si, Hesus, e homber perfecto, por bira nos tata na luga di Adam, cu a bira imperfecto ora el a peca. Kiermen, nos por scohe pa ‘e di dos Adam’ bira nos tata. Claro cu Hesus mes tambe tin un Tata: Yehova Dios.

Si nos siña tocante Hesus, nos por acept’e como nos Salbador. Bo ta corda ta di kico Hesus mester a salba nos?— Si, di e pica y morto cu nos a haya for di Adam. Hesus a sacrifica, of duna, e bida perfecto cu e tawatin ora el a bira hende grandi. E sacrificio ei yama e rescate. Yehova a percura pa e rescate, pa asina nos por haya pordon di nos picanan.—Mateo 20:28; Romanonan 5:8; 6:23.

Di mes, nos no kier lubida kico Dios y su Yiu a haci pa nos, no ta berdad?— Hesus a siña su siguidonan haci un cos special cu por yuda nos keda corda loke el a haci. Ban papia riba esei.

Imagina bo cu bo ta den un sala na di dos piso di un cas na Herusalem. Ta anochi. Hesus cu su apostelnan ta na mesa. Riba mesa tin lamchi cu nan a rooster riba candela, pan plat y biña cora. Nan ta teniendo un comemento special. Bo sa dicon e ta special?—

E comemento aki ta pa haci nan corda un cos cu Yehova a haci cientos di aña pasa, tempo cu su pueblo, e Israelitanan, tawata esclabo na Egipto. E dia ei Yehova a bisa su pueblo: ‘Mata un lamchi pa cada famia, anto pone su sanger riba kozijn di boso casnan.’ E ora ei el a bisa nan: ‘Bai den boso cas, anto come e lamchi.’

E Israelitanan a haci manera el a bisa. Anto e mesun anochi ei, un angel di Dios a pasa door di henter e tera di Egipto. Den casi tur cas, e angel a mata e yiu mayo. Pero ora e angel a wak sanger di lamchi na e kozijn di porta, e tawata pasa e cas bai sin haci ningun hende nada. E muchanan den e casnan ei no a muri. Farao, e Rei di Egipto, a haya miedo di e cos cu e angel di Yehova a haci. Pesei Farao a bisa e Israelitanan: ‘Boso ta liber pa bai. Sali for di Egipto!’ E ora ei e Israelitanan a pone nan cosnan riba nan camelnan cu nan buriconan, anto a bai.

Yehova no tawata kier pa su pueblo lubida con el a libra nan. Pesei el a bisa nan: ‘Un biaha pa aña boso mester come un cuminda manera esun cu boso a come awenochi.’ Nan a yama e comemento special ei Pasco. Awendia nos ta yam’e Pasco Hudiu. Riba e anochi ei e angel di Dios a wak e casnan cu tawata marca cu sanger, anto el a ‘pasa nan bai.’—Exodo 12:1-13, 24-27, 31.

Ora Hesus cu su apostelnan a come e cuminda di Pasco Hudiu, nan a corda riba e dia aya. Ora nan a caba, Hesus a haci un cos hopi importante. Pero prome el a manda Hudas e apostel infiel bai. E ora ei Hesus a tuma un di e pannan cu a resta, el a gradici Dios p’e, kibr’e anto pas’e pa su disipelnan. El a bisa nan: “Tuma, come.” Despues el a bisa: ‘E pan aki ta nifica mi curpa cu mi ta bai entrega ora mi muri pa boso.’

E ora ei Hesus a tuma un copa di biña cora. Despues di gradici Dios atrobe, el a pasa e copa tambe rond anto bisa nan: “Boso tur bebe for di dje.” Anto el a bisa: ‘E biña aki ta nifica mi sanger. Djis aki mi ta bai laga mi sanger basha pa libra boso di boso picanan. Keda haci e cos aki pa boso corda mi.’—Mateo 26:26-28; 1 Corintionan 11:23-26.

Bo a nota cu Hesus a bisa e disipelnan pa keda haci e comemento ei pa nan cord’e?— Despues di esei nan no mester a tene e comemento di Pasco Hudiu mas. Na luga di esei, awor un bes pa aña nan tawatin cu tene e comemento special nobo ei, pa nan keda corda Hesus y su morto. E comemento ei yama E Cena di Señor. Awendia, hopi bes nos ta yam’e e Conmemoracion of Memorial. Dicon?— Door cu e ta trece na nos memoria loke Hesus y su Tata Yehova Dios a haci pa nos.

E pan mester pone nos corda e curpa di Hesus. E tawata dispuesto di entrega e curpa ei pa nos por haya bida eterno. Anto kico di e biña cora?— E biña mester pone nos corda e balor di e sanger di Hesus. E ta bal mas cu e sanger di e lamchi di Pasco na Egipto. Bo sa dicon?— Bijbel ta bisa cu e sanger di Hesus por laga nos haya pordon di pica. Y ora tur nos picanan kita, nos no ta bai bira malo, ni bira bieu ni muri mas. Nos mester pensa riba e cos ei ora nos bai Memorial.

Ta tur hende mester come e pan y bebe e biña na Memorial?— Wel, Hesus a bisa e hendenan cu ta come y bebe di nan: ‘Boso lo tuma parti cu mi den mi reino, y sinta riba trononan den shelo hunto cu mi.’ (Lucas 22:19, 20, 30) Esei a nifica cu nan ta bai shelo pa bira rei hunto cu Hesus. Pesei, ta hende cu tin speransa di goberna hunto cu Hesus den shelo so mester tuma e pan y e biña.

Pero asta si nos no ta come e pan ni bebe e biña, nos mester bai Memorial. Bo sa dicon?— Door cu Hesus a duna su bida pa nos tambe. Door di bai Memorial nos ta mustra cu nos no a lubida. Nos ta keda corda e gran regalo cu Dios a duna nos.