Dicon Nos Mester Stima Hesus

IMAGINA bo cu bo ta den un boto cu ta sink. Lo bo kier pa un hende scapa bo?— Anto con lo bo sinti si e hende ei perde asta su bida pa e scapa bo?— Wel, esei ta loke Hesucristo a haci. Manera nos a siña na Capitulo 37, el a duna su bida como un rescate pa salba nos.

Claro, no ta hoga nos tawata hoga anto Hesus a bin scapa nos. Bo sa ta di kico el a scapa nos? Bo ta corda?— Di e pica y morto cu nos tur a haya for di Adam. Tin hende cu a haci cos hopi malo, y toch Hesus a muri pa nan tambe. Abo lo risca bo bida pa purba scapa un hende asina?—

Bijbel ta bisa: “Apenas un hende lo muri pa un hende husto; aunke cu kisas pa un bon hende un hende por risca muri.” Pero Bijbel ta splica cu Hesus ‘a muri pa mal hende.’ Tin di e hendenan ei cu no ta sirbi Dios mes! Bijbel ta sigui bisa: “Tempo nos tawata pecado [haciendo cos malo] ainda, Cristo a muri pa nos.”—Romanonan 5:6-8.

Bo ta corda un apostel cu a yega di haci cos hopi malo?— E apostel ei a skirbi: “Cristo Hesus a bin na mundo pa salba pecado, entre kendenan ami ta esun di prome.” E apostel cu a bisa esei ta Pablo. El a bisa cu ‘un tempo e tawata bobo’ y cu el a biba ta haci malo.—1 Timoteo 1:15; Tito 3:3.

Imagina bo cuanto amor Dios mester tawatin pa el a manda su Yiu bin muri pa hende asina! Dicon bo no ta coi bo Bijbel pa nos ban lesa tocante esei na Huan capitulo 3, versiculo 16? Ei e ta bisa: “Dios a stima mundo [esta, hende cu ta biba riba mundo] asina tanto, cu el a duna su Yiu unigenito, pa ken cu kere den dje no bai perdi, ma tin bida eterno.”

Hesus a mustra cu e tambe ta stima nos mescos cu su Tata ta stima nos. Kisas bo ta corda cu na Capitulo 30 di e buki aki nos a lesa di un par di cos cu Hesus a pasa aden riba e anochi cu nan a coh’e preso. Nan a hiba Hesus cas di Sumo Sacerdote Caifas y a tene un huicio contra dje. Nan a trece testigo falso pa gaña riba dje, anto e hendenan a dal e cu mokete. Y ta e ora ei Pedro a nenga cu e conoce Hesus. Awor, laga nos imagina nos mes cu nos ta ayanan net ora e cosnan ei tawata sosode, anto cu nos ta mira kico mas a pasa.

Ta bira mainta. Hesus no a drumi henter anochi. Door cu e huicio cu nan a tene anochi no a bai manera mester ta, e sacerdotenan ta manda yama e Sanedrin awor, e corte supremo Hudiu, den pura pa nan tene un otro huicio. Den e huicio aki nan ta bolbe acusa Hesus bisando cu el a comete crimen contra Dios.

E ora ei e sacerdotenan ta laga mara Hesus, anto nan ta hib’e dilanti Pilato, e gobernado Romano. Nan ta bisa Pilato: ‘Hesus ta contra gobierno. Mester mat’e.’ Pero Pilato a compronde cu ta gaña nan ta gaña. Pesei Pilato ta bisa nan: ‘Mi no ta haya nada malo den e homber aki. Mi ta lag’e bai.’ Pero e sacerdotenan y e otro hendenan ta grita: ‘No! Mat’e!’

Mas despues Pilato ta bolbe purba bisa e hendenan cu e ta laga Hesus liber. Ma e sacerdotenan ta pone tur e hendenan grita: ‘Si bo lag’e bai, anto bo tambe ta contra gobierno! Mat’e!’ E multitud ta cuminsa haci masha hopi bochincha. Bo sa kico Pilato ta haci awor?—

E ta haci loke nan ta pidi numa. Prome e ta laga bati Hesus cu zwiep. Despues e ta laga e soldanan bai cu ne pa mat’e. Nan ta pone un corona di sumpiña riba Hesus su cabes, anto nan ta haci mofa di dje door di buig su dilanti. E ora ei nan ta duna Hesus un staca, esta, un palo grandi pa e carga, anto nan ta hib’e pafo di e stad na un luga cu yama Luga di Carpachi. Ora nan yega nan ta claba Hesus su man y su pia na e staca. E ora ei nan ta lanta e staca, pon’e para, pa Hesus keda colga na dje. Su curpa ta basha sanger. E tin hopi, hopi dolor.

Hesus no ta muri mesora. E ta keda colga bibo na e staca. E sacerdotenan principal ta haci mofa di dje. Y hende cu ta pasa eibanda ta bisa: ‘Si ta yiu di Dios bo ta, baha for di e staca!’ Pero Hesus sa kico su Tata a mand’e haci. E sa cu e tin cu duna su bida perfecto pa nos por haya chens di biba pa semper. Ta te banda di tres or di merdia Hesus ta sclama na su Tata, anto e ta muri.—Mateo 26:36–27:50; Marco 15:1; Lucas 22:39–23:46; Huan 18:1–19:30.

Hesus no tawata niun tiki manera Adam! Adam no a mustra cu e ta stima Dios. El a desobedece Dios. Y Adam no a mustra cu e stima nos tampoco. Ta pasobra el a peca, nos tur a nace cu pica. Pero Hesus si a mustra cu e ta stima Dios y nos tambe. El a obedece Dios den tur cos. Anto el a duna su bida pa e por drecha tur e malo cu Adam a haci nos.

Abo ta gradicido pa e cos grandi ei cu Hesus a haci pa nos?— Ora bo ta resa na Dios, bo sa bis’e danki cu el a duna nos su Yiu?— Apostel Pablo a sinti hopi aprecio pa loke Cristo a haci p’e. Pablo a skirbi: ‘E Yiu di Dios a stima mi, y a entrega su mes pa mi.’ (Galationan 2:20) Hesus a muri pa ami cu bo tambe. El a duna su bida perfecto pa nos por haya bida eterno! Con nos por keda sin stima Hesus despues di loke el a haci pa nos?

Apostel Pablo a skirbi e cristiannan cu tawata biba na e stad Corinto: “E amor di Cristo ta pone nos actua.” Segun bo, ki tipo di cos e amor di Cristo ta pone nos haci?— Wak kico Pablo a contesta: “Cristo a muri pa tur hende, pa nan biba p’e. Nan no mester biba pa complace nan mes.”—Letter schuin ta di nos; 2 Corintionan 5:14, 15, New Life Version.

Bo por pensa riba un par di cos cu bo por haci pa mustra cu bo ta biba pa complace Cristo?— Wel, un cos cu bo por haci ta conta otro hende loke bo a siña tocante dje. Of, wak un otro cos: Laga nos bisa cu bo ta bo so un dia; ni bo mama ni bo tata ni ningun otro hende no por mira kico bo ta haci. Lo bo wak un programa na television of un cos riba Internet, si bo sa cu Hesus lo no keda contento cu ne?— Corda cu Hesus ta bibo awor, y e por mira tur cos cu nos haci!

Un otro motibo cu nos tin pa stima Hesus ta cu nos kier imita Yehova. Hesus a bisa: “E Tata ta stima mi.” Bo sa dicon e ta stima Hesus y dicon nos tambe mester stim’e?— Pasobra Hesus tawata dispuesto di muri pa Dios su boluntad sosode. (Huan 10:17) Pesei, laga nos haci manera Bijbel ta bisa nos: “Sea imitadonan di Dios, manera yiunan stima, y cana den amor, mescos cu Cristo tambe a stima boso, y a entrega su mes pa nos.”—Efesionan 5:1, 2.