Dios A Corda Riba Su Yiu

HESUS a yora ora su amigo Lazaro a muri. Bo ta kere cu Yehova a bira tristo ora Hesus a sufri anto muri?— Bijbel ta bisa cu Dios por sinti duele y e por asta bira “tristo” door di cos cu ta pasa.—Salmo 78:40, 41; Huan 11:35.

Bo por imagina bo cuanto dolor Yehova a sinti ora el a mira su Yiu stima muri?— Hesus tawata sigur cu Dios lo no lubida riba dje. Ta pesei mes e ultimo cos cu el a bisa prome cu e muri tawata: “Tata, den bo mannan mi ta entrega mi [bida].”—Lucas 23:46.

Hesus tawata sigur cu Dios lo resusit’e; cu e lo no lag’e “den Hades”, of “fierno”, esta, den graf. Despues cu Hesus a lanta for di morto, apostel Pedro a ripiti e palabranan aki cu tin skirbi den Bijbel tocante Hesus: “E no a wordo laga den Hades, ni su carni no a mira corupcion.” (Echonan 2:31; E Testament Nobo; Salmo 16:10) No, e curpa di Hesus no a haya chens di mira corupcion, esta, di putri y cuminsa hole malo den graf.

Tempo cu Hesus tawata na tera, el a asta yega di bisa su disipelnan cu e lo no keda morto hopi tempo. El a splica nan cu e lo “wordo mata, y wordo lanta riba e di tres dia.” (Lucas 9:22) Pesei, si bo wak bon, e disipelnan lo no mester a keda straña ora Hesus a resusita. Pero nan a keda straña toch?— Laga nos wak.

Ora e Gran Maestro a muri riba e staca di tormento tawata diabierna banda di tres or di merdia. Un miembro rico di Sanedrin tawata kere den Hesus, pero den secreto. Su nomber ta Hose. Ora Hose a tende cu Hesus a muri, el a bai serca Pilato e gobernado Romano. El a puntra Pilato si e tin mag di kita e curpa di Hesus for di riba e staca pa der’e. Despues Hose a hiba e curpa di Hesus den un hofi caminda tawatin un graf, un cueba pa pone hende morto aden.

Ora nan a caba di pone e curpa den e graf, nan a lora un piedra grandi pone dilanti dje pa tapa e entrada. Dos dia a pasa, y a bira e di tres dia, diadomingo. Solo no a sali ainda, y ainda tawata scur. Un par di homber tawata cuida e graf. Ta e sacerdotenan principal a manda nan. Bo sa pakico?—

E sacerdotenan tambe a tende cu Hesus a bisa cu e ta bai resusita. Pesei, pa Hesus su disipelnan no horta su curpa anto bisa cu ta lanta Hesus a lanta for di morto, e sacerdotenan a manda solda pa cuida e graf. Diripiente suela a cuminsa sagudi. Un lus skerpi a corta den scuridad. Ta un angel di Yehova! E soldanan a spanta asina tanto cu nan no por a move. E angel a bai na e graf, anto a lora e piedra kit’e. E graf tawata bashi!

Si, ta manera apostel Pedro a conta despues: “E Hesus aki Dios a lanta.” (Echonan 2:32) Ora Dios a lanta Hesus for di morto, el a dun’e un curpa manera Hesus tawatin prome cu el a bin na tera. El a resusita cu curpa di spirito, manera curpa di angel. (1 Pedro 3:18) Pesei, pa hende por a mira Hesus, e tawatin cu traha un curpa di hende pa su mes. El a hacie?— Laga nos ban wak.

Solo a cuminsa sali. E soldanan a bai. Maria Magdalena y mas hende mohe cu ta disipel di Hesus tawata bayendo na e graf. Nan tawata bisa otro: ‘Ta ken ta bai lora e piedra pisa ei kit’e pa nos?’ (Marco 16:3) Pero ora nan a yega na e graf, e piedra tawata kita caba. Anto mira, e graf ta bashi! E curpa morto di Hesus no t’ei mas! Mesora Maria Magdalena a core bai busca un par di Hesus su apostelnan.

E otro hende mohenan a keda na e graf. Nan lo a puntra nan mes: ‘Ta na unda e curpa di Hesus por ta?’ Diripiente dos homber cu paña cu ta briya a aparece. Nan tawata angel! Nan a bisa e hende mohenan: ‘Pakico boso ta busca Hesus aki? El a lanta for di morto. Haci lihe bai conta su disipelnan.’ Wel, bo mes por imagina bo con duro e hende mohenan a core! Riba caminda nan a topa un homber. Bo sa ken e tawata?—

Si, tawata Hesus! El a traha un curpa di hende pa su mes. Anto e tambe a bisa e hende mohenan: ‘Bai conta mi disipelnan.’ E hende mohenan tawata tur emociona. Ora nan a haya e disipelnan, nan a bisa nan: ‘Hesus ta na bida! Nos a mir’e!’ E ora ei ya Maria a conta Pedro cu Huan caba cu e graf ta bashi. Ora nan a tende cu Hesus ta na bida, nan a bai na e graf, manera bo por mira riba e plachi. Nan a para mira e pañanan di linen cu Hesus tawata lora aden, sin sa kico pa kere. Nan tawatin gana di kere cu Hesus ta na bida atrobe, pero e cos ei a parce mucho bon pa kere.

Mas laat e diadomingo ei, Hesus a aparece na dos di su disipelnan ora nan tawata riba caminda pa bai e pueblito Emaus. Hesus a cana cu nan y papia cu nan, pero nan no tawata sa cu ta e, pasobra e curpa di hende cu el a uza no ta mescos cu esun cu e tawatin prome cu el a muri. Ta te despues cu Hesus a come cu nan y haci oracion, nan a bin sa ken e ta. E disipelnan a bira asina contento cu nan a bai pura te Herusalem bek, maske nan mester a cana basta kilometer pa nan yega! Kisas ta un poco despues di esei Hesus a aparece na Pedro tambe pa mustr’e cu E ta na bida.

Mas anochi, riba e mesun diadomingo ei, hopi disipel tawata hunto den un sala. E portanan tawata na lok. Ma diripiente Hesus tawata den e sala, ei mes hunto cu nan! Awor si nan tawata sa sigur cu e Gran Maestro ta na bida atrobe. Imagina bo con contento nan a bira!—Mateo 28:1-15; Lucas 24:1-49; Huan 19:38–20:21.

Hesus a keda aparece den diferente curpa di hende pa 40 dia largo, pa e laga su disipelnan sa cu e ta na bida. E ora ei el a bandona tera y bai bek serca su Tata den shelo. (Echonan 1:9-11) Poco tempo despues e disipelnan a cuminsa conta tur hende cu Dios a lanta Hesus for di morto. Asta ora e sacerdotenan a bati nan y laga mata un par di nan, nan a sigui predica. Nan tawata sa cu si nan muri, Dios lo corda riba nan mescos cu el a corda riba su Yiu.

E prome siguidonan ei di Hesus tawata basta diferente for di hopi hende di awendia! Awendia ora yega e temporada di aña cu Hesus a resusita, ta riba coneu di Pasco cu webo di Pasco geferf so hende ta pensa. Pero Bijbel no ta bisa nada di coneu ni webo di Pasco. Loke e ta papia di dje ta tocante sirbi Dios.

Nos tambe por ta manera e disipelnan di Hesus si nos conta hende cu Dios a haci un cos masha grandi: el a resusita su Yiu. Nunca nos no tin nodi sinti miedo, ni si hende bisa nos cu nan ta mata nos. Si nos muri, Yehova lo corda riba nos anto resusita nos, mescos cu el a haci cu Hesus.

Nos no ta contento di sa cu Dios ta corda riba hende cu ta sirbie, y cu e lo asta resusita nan for di morto?— Awor cu nos sa esei, nos mester haya gana di sa ta con nos por haci Dios contento. Bo tawata sa cu nos por haci Dios contento?— Laga nos papia riba esei den e siguiente les.