Door Di Presta Atencion Nan A Scapa Nan Bida

HESUCRISTO a duna spiertamento di antemano tocante fin di e sistema di cosnan Hudiu cu tawatin su centro na e tempel di Herusalem. E no a duna e fecha cu esei lo tuma luga. Pero loke si el a describi ta susesonan cu lo a hiba na e destruccion ei. El a urgi su disipelnan pa keda vigila y pa nan sali for di e zona di peliger.

Hesus a profetisa: “Ora boso mira Herusalem rondona door di ehersitonan, reconoce anto cu su desolacion ta serca.” Tambe Hesus a bisa: “Ora boso mira e abominacion di desolacion . . . ta para den e luga santo . . . , e ora ei laga esnan cu ta na Hudea hui bai na e seronan.” Hesus a urgi su disipelnan pa nan no bai bek pa scapa nan pocesionnan material. Tawata urgente pa nan hui si nan kier a salba nan bida.—Lucas 21:20, 21; Mateo 24:15, 16.

Na aña 66 di nos era Cestio Galo a bini cu e ehersito Romano contra Herusalem afin di domina e rebelion cu ya a dura largo. El a drenta e stad y a sitia e tempel. A surgi un caos total den e stad. Hende cu a keda alerta por a mira cu desaster tawata na porta. Pero con nan por a hui? Inesperadamente, Cestio Galo a retira su tropanan. E rebeldenan Hudiu a persigui nan. Awor tawata e tempo pa hui for di Herusalem y for di henter e area di Hudea!

E siguiente aña, e tropanan Romano a regresa bou di Vespasiano y su yiu Tito. Guera a asota henter e pais. Na principio di aña 70, e Romanonan a construi rond di Herusalem un baluarte of fortificacion traha di staca cu punta skerpi. No tawata posibel mas pa hui. (Lucas 19:43, 44) Partidonan den e stad a cuminsa mata otro. E resto di e pueblo sea a ser mata door di e Romanonan of hiba preso. Nan a destrui e stad y su tempel completamente. Segun Yosefo, un historiado Hudiu di prome siglo, mas cu un miyon Hudiu a sufri y muri. Nunca mas nan a reconstrui e tempel ei.

Si e cristiannan lo tawata den Herusalem ainda na aña 70, nan tambe lo a ser mata of hiba como catibo hunto cu tur otro hende. Sinembargo, historiadonan di antiguedad ta informa cu e cristiannan a haci caso di spiertamento dibino y a hui tanto for di Herusalem como for di henter e area di Hudea y a bai na e seronan pariba di Riu Yordan. Algun di nan a establece nan mes na Pela, den e provincia di Perea. Nan a bandona Hudea y no a bolbe bek. Nan a salba nan bida door di presta atencion na e spiertamento di Hesus.

Abo Ta Tuma na Serio Spiertamentonan for di Fuentenan Confiabel?

Despues di a tende di varios spiertamento cu no a cristalisa, hopi hende ta trata tur spiertamento como insignificante. Sinembargo, bo por salba bo bida door di haci caso di spiertamento.

Na 1975, expertonan na China a spierta cu lo bin un temblor. Autoridadnan a tuma accion. E hendenan a reacciona faborabel. Esei a scapa miles di bida.

Na april 1991 na Filipinas, hende cu tawata biba na e bahada di Sero Pinatubo a informa cu stoom y shinishi tawata spuit sali for di e sero. Despues di a observa e situacion pa dos luna, e Instituto Filipino di Volcan y Temblor a spierta di e peliger cu tawata inminente. Mesora, rond di 35.000 hende a keda evacua for di e area. Mainta tempran dia 15 di juni, cu un enorme explosion, mas cu ocho kilometer cubico di baranca garna a ser manda laira y despues a baha riba e area. Miles di hende a scapa nan bida door cu nan a presta atencion.

Bijbel ta spierta tocante fin di e actual sistema di cosnan. Nos ta biba awor den e ultimo dianan. Abo ta keda vigila segun cu e fin ta acerca? Bo ta tumando accion pa asina bo keda pafo di e zona di peliger? Bo ta spiertando otro hende cu urgencia pa nan tambe haci mescos?

[Plachi na pagina 20]

Ora cu Sero Pinatubo a saca shinishi volcanico, hopi hende a scapa nan bida door cu nan a presta atencion na spiertamento

[Plachi na pagina 21]

Cristiannan cu a haci caso di e spiertamento di Hesus, a keda na bida ora cu Herusalem a ser destrui na aña 70