Kico Tur E Cosnan Aki Ta Nifica?

HESUCRISTO a bisa: “E fin di tempo”, of conclusion di e sistema di cosnan, ta loke lo a ser identifica pa guera, scarsedad di cuminda, pestilencia y temblor.—Mateo 24:1-8; Lucas 21:10, 11.

For di aña 1914, guera entre nacionnan y entre gruponan etnico a daña hende su bida. Hopi bes esei tawata debi na metemento den politica di parti di miembronan di clero, y ultimo tempo ta debi na atakenan terorista tur caminda.

Apesar di progreso cientifico den produccion di alimento, cientos di miyones di hende mundialmente ta confronta scarsedad extremo di cuminda. Tur aña miyones di hende ta muri door di scarsedad di cuminda.

Pestilencia, es decir, epidemianan grandi di malesa contagioso, tambe ta parti di e señal cu Hesus a duna. Despues di Prome Guera Mundial un epidemia di grip a costa bida di mas cu 21.000.000 hende. Distinto for di plaganan cu den pasado tawata afecta solamente cierto areanan limita, e epidemia ei a afecta nacionnan rond mundo y tambe islanan hopi aisla. Awor ta AIDS ta asota e planeta, y plaganan manera tuberculosis, malaria, dengue y malesa di Chagas ta sigui afecta hende den paisnan den desaroyo.

Segun informe, tin decenas di miles di temblor di varios intensidad tur aña. Apesar di e ekipo cu tin disponibel y e miho metodonan di raporta temblor, desasternan causa pa temblor den areanan hopi pobla ta frecuentemente den noticia.

Tambe Bijbel a profetisa: “Sabi esaki, cu den e ultimo dianan temponan trabahoso lo bin. Pasobra hende lo ta stimado di nan mes, stimado di placa, gabado, arogante, blasfemado, desobedecido na mayornan, ingrato, impio, sin amor, ireconsiliabel, cu mala lenga, sin dominio propio, grosero, odiado di loke ta bon, traido, imprudente, soberbe, mas bien stimado di placer cu stimado di Dios; cu tin aparencia di ta religioso [en berdad], ma cu ta nenga su poder; evita e sorto di hendenan aki.”—2 Timoteo 3:1-5.

Bo tambe no ta haya cu nos ta biba den “temponan trabahoso”?

Bo a ripara cu hende—na un manera exagera—ta stimado di nan mes, stimado di placa y motiva pa orguyo?

Ken lo nenga cu mundo ta yen di hende cu ta exigente pero ingrato, ireconsiliabel y impio of desleal?

Bo ta conciente cu desobediencia na mayornan hunto cu un falta spantoso di amor a aumenta drasticamente, no solamente den algun luga pero rond mundo?

Sin duda bo ta realisa cu nos ta biba den un mundo cu stima placer, pero cu no ta stima loke ta bon. Ta asina Bijbel ta describi actitudnan cu lo a reina den “e ultimo dianan.”

Nos mester di mas prueba pa por identifica e tempo den cua nos ta biba? Hesus a profetisa tambe cu durante e mesun tempo ei, e evangelio of bon noticia di e Reino di Dios lo a ser predica den henter mundo. (Mateo 24:14) Esei ta tumando luga?

E Toren di Vigilancia, un revista basa riba Bijbel y cu ta dedica na anuncia e bon noticia di e Reino di Yehova, ta ser imprimi regularmente den mas idioma cu cualkier otro revista.

Tur aña, Testigonan di Yehova ta dedica mas cu mil miyon ora na predica personalmente na otro hende tocante e Reino di Dios.

Actualmente nan ta publica literatura cu ta splica Bijbel den aproximadamente 400 idioma, asta den idioma di poblacionnan chikito y hopi aisla. Testigonan di Yehova ta hiba e bon noticia na tur nacion; tambe nan ta predica na hopi isla y teritorio cu ta mucho chikito pa ta di importancia den e mundo politico. Den mayoria pais, nan ta efectua un programa regular di educacion biblico.

Si, e bon noticia di e Reino di Dios ta ser predica den henter mundo, no pa comberti mundo, sino pa duna un testimonio. Hende na tur parti ta haya e oportunidad pa mustra si nan ta interesa pa sa ken a crea shelo y tera y si nan lo mustra respet pa su leinan y demostra amor pa nan prohimo.—Lucas 10:25-27; Revelacion 4:11.

Pronto e Reino di Dios lo elimina tur maldad for di riba tera y hacie un paradijs mundial.—Lucas 23:43.

[Cuadro na pagina 6]

E Ultimo Dianan di Kico?

No ta e ultimo dianan di humanidad. Bijbel ta ofrece esnan cu ta haci e boluntad di Dios e speransa di biba pa semper.—Huan 3:16, 36; 1 Huan 2:17.

No ta e ultimo dianan di planeta Tera. E Palabra di Dios ta priminti cu e tera habita lo permanece pa semper.—Salmo 37:29; 104:5; Isaias 45:18.

Mas bien, ta e ultimo dianan di e sistema di cosnan violento y sin amor aki y di e hendenan cu ta tene duro na e practicanan di e sistema aki.—Proverbionan 2:21, 22.

[Cuadro/Plachi na pagina 7]

Bijbel Realmente Ta e Palabra di Dios?

Bes tras bes profetanan di Bijbel a skirbi: “Asina SEÑOR [Yehova] ta bisa.” (Isaias 43:14; Yeremias 2:2) Asta Hesucristo, e Yiu di Dios, a enfatisa cu ‘e palabranan cu el a papia no ta di su mes.’ (Huan 14:10) Bijbel mes ta bisa bon cla: “Tur Scritura ta inspira pa Dios.”—2 Timoteo 3:16.

Segun informe di e Sosiedadnan Uni di Bijbel, no tin ningun otro buki publica den asina tanto idioma—mas cu 2.200. Ningun otro buki tin un circulacion asina grandi—awor mas cu cuater mil miyon ehemplar. No ta esei ta loke lo bo spera di un mensahe di Dios cu ta pa henter humanidad?

Pa un consideracion mas completo di e evidencianan cu Bijbel ta inspira pa Dios, wak e buki E Bijbel—e Palabra di Dios of e palabra di hende?, publica door di Testigonan di Yehova.

Lo bo saca masha hopi beneficio si bo lesa Bijbel y reconoce e echo cu e ta realmente e Palabra di Dios.

[Cuadro/Plachi na pagina 8]

Kico e Reino di Dios Ta?

E ta e gobierno special cu e Dios berdadero, Yehova, Creador di shelo y tera, a institui den shelo.—Yeremias 10:10, 12.

Bijbel ta menciona Hesucristo como esun na ken Dios ta duna e autoridad ei di goberna. (Revelacion 11:15) Tempo cu Hesus tawata riba tera, el a demostra cu ya caba el a haya autoridad remarcabel for di Dios, autoridad cu a permitie controla biento cu lama, cura tur sorto di malesa y asta lanta morto. (Mateo 9:2-8; Marco 4:37-41; Huan 11:11-44) Profecia biblico inspira a bisa cu tambe Dios lo a dun’e “dominio, gloria y un reino, pa tur pueblo, nacion y hende di tur idioma por sirbie.” (Daniel 7:13, 14) Bijbel ta yama e gobierno ei e Reino di shelo; ta for di shelo Hesucristo ta eherce su gobernacion awor.

[Plachi na pagina 7]

Predicacion mundial di e bon noticia