Dicon Cristiannan Berdadero No Ta Uza Crus den Adoracion

CRUS ta un simbolo cu miyones di hende ta stima y respeta. The Encyclopædia Britannica ta yama crus “e simbolo principal di e religion cristian.” Apesar di esei, cristiannan berdadero no ta uza crus den adoracion. Dicon no?

Un motibo importante ta cu Hesucristo no a muri na crus. E palabra Griego generalmente traduci como “crus” ta stau·rós. E ta nifica basicamente “un palo of staca recht.” The Companion Bible ta trece dilanti: “[Stau·rós] nunca a nifica dos pida palo cu ta crusa riba otro na ningun angulo . . . No tin nada den e Griego di e [Testament Nobo] cu ta referi sikiera indirectamente na dos pida palo.”

Tin un otro palabra tambe cu Bijbel ta uza pa e obheto riba cua Hesus a muri. Esei ta e palabra Griego xý·lon. (Galationan 3:13) E palabra aki simplemente ta nifica “palo” of “un bara, garoti of palo di mata.”

E buki Das Kreuz und die Kreuzigung (Crus y Crusificacion), di Hermann Fulda, a splica dicon hopi bes hende a uza un simpel staca pa ehecucion, bisando: “No ta tur caminda cu nan a scohe pa un ehecucion publico tawatin palo disponibel. Pesei nan tawata hinca un simpel biga den suela. Na esaki nan tawata mara of claba e malechornan cu nan mannan hisa ariba y hopi bes tawata mara of claba nan pianan tambe.”

Sinembargo, e prueba mas combencente di tur ta bin di e Palabra di Dios. Apostel Pablo ta bisa: “Cristo a redimi nos di e maldicion di Lei, birando un maldicion pa nos—pasobra ta para skirbi: ‘Maldiciona ta tur esnan cu ta colga na un palo [of, “un staca”].’” (Galationan 3:13) Aki Pablo ta cita Deuteronomio 21:22 y 23, cu na Hebreo ta referi bon cla na un staca, no un crus. Ademas, siendo cu ta e medio ei di ehecucion a haci e persona “un maldicion”, lo no ta corecto pa cristiannan decora nan cas cu imagennan di Cristo colga na staca.

No tin ningun evidencia cu durante e prome 300 añanan despues di Cristo su morto, hende cu tawata bisa cu nan ta cristian a uza crus den adoracion. Sinembargo, den siglo 4 e emperado pagano Constantino a comberti na cristianismo apostata y a promove crus como e simbolo di cristianismo. Sea cual sea tawata e motibonan di Constantino, crus no tawatin nada di aber cu Hesucristo. De echo, crus ta di origen pagano. New Catholic Encyclopedia ta admiti: “Nos ta haya crus tanto den culturanan precristian como no cristian.” Varios otro autoridad a conecta crus cu adoracion di naturalesa y ritonan sexual pagano.

Dicon anto nan a promove e simbolo pagano aki? Aparentemente, pa hacie mas facil pa paganonan acepta “cristianismo.” Sinembargo, Bijbel claramente ta condena debocion na cualkier simbolo pagano. (2 Corintionan 6:14-18) Tambe e Scritura ta prohibi tur forma di adoracion di imagen, esta, idolatria. (Exodo 20:4, 5; 1  Corintionan 10:14) Pesei cu hopi bon motibo anto cristiannan berdadero no ta uza crus den adoracion.a