“Ta Para Skirbi”

1-3. Ki conclusion sumamente importante Hesus tabata kier pa e hendenan di Nazaret yega na dje, y ki evidencia e ta duna?

TABATA na cuminsamento di Hesus su ministerio. Cristo a bolbe na Nazaret, e stad caminda el a lanta. Su meta tabata pa yuda e hendenan einan yega na un conclusion sumamente importante: E tabata e Mesias tan spera, esun predeci for di hopi tempo pasa! Ki evidencia el a duna?

² Hopi hende sin duda a spera un milager. Nan a tende di e obranan asombroso cu Hesus a efectua. Sinembargo, e no a duna nan ningun señal. Mas bien, manera tabata su custumber, el a bai sinagoga. El a lanta para pa lesa y nan a entreg’e e buki di Isaias. Tabata trata di un rol largo, probablemente lora rond di un par di bara, anto Hesus cuidadosamente a habri e rol te ora el a haya e parti cu e tabata busca. E ora ei el a lesa na bos halto loke awe ta Isaias 61:1-3.—Lucas 4:16-19.

³ E hendenan presente sin duda tabata conoce e parti ei di e Scritura. Tabata un profesia tocante e Mesias. Bista di tur hende den sinagoga tabata fiha riba Hesus. A reina un silencio. Anto Hesus a cuminsa splica, kisas pa basta rato: ‘Awe e scritura aki a cumpli.’ E hendenan a keda asombra di e palabranan agradabel cu el a papia, pero aparentemente hopi di nan toch kier a mira un of otro señal espectacular. Pero na luga di esei, Hesus cu curashi a uza un ehempel biblico pa saca nan falta di fe na cla. Poco despues, e hendenan di Nazaret a purba mat’e!—Lucas 4:20-30.

4. Ki patronchi Hesus a establece den su ministerio, y kico nos lo considera den e capitulo aki?

⁴ Aki Hesus a establece un patronchi cu el a mantene durante henter su ministerio. El a uza e Palabra inspira di Dios como e argumento mas fuerte pa loke el a bisa y haci den su ministerio. Ta berdad cu su milagernan tabata di gran importancia pa demostra cu e spirito di Dios tabata cu ne. Sinembargo, no tabatin nada mas importante pa Hesus cu e Santo Scritura. Laga nos analisa e ehempel cu el a pone den esaki. Nos lo considera con nos Shon a cita for di e Palabra di Dios, a defende e Palabra di Dios y a splica e Palabra di Dios.

El A Cita for di e Palabra di Dios

5. Kico Hesus tabata determina pa laga su oyentenan sa, y con el a demostra cu loke el a bisa ta berdad?

⁵ Hesus tabata kier pa e hendenan sa di unda su mensahe a bin. El a bisa: “Mi siñansa no ta di mi, ma di esun cu a manda mi.” (Juan 7:16) Na un otro ocasion, el a bisa: “Ami no ta haci nada di mi mes, ma . . . mi ta papia e cosnan aki manera e Tata a siña mi.” (Juan 8:28) Ademas, e di: “E cosnan cu mi ta bisa boso mi no ta papia nan di mi mes; sino e Tata cu ta permanece den union cu mi ta haci su obranan.” (Juan 14:10, NW) Un manera cu Hesus a duna prueba cu e declaracionnan ei tabata berdad ta pa medio di cita e Palabra skirbi di Dios bes tras bes.

6, 7. (a) Te na ki grado Hesus a cita for di e Scritura Hebreo, y dicon esaki ta impresionante? (b) Con e siñansa cu Hesus a duna tabata otro for di esun di e escribanan?

⁶ Un analisis cuidadoso di tur e palabranan cu tin registra di Hesus ta revela cu el a cita directamente for di mas cu mitar di e bukinan di e canon di e Scritura Hebreo of a referi indirectamente na nan. Na prome instante esei kisas no ta zona impresionante. Podise bo ta puntra bo mes dicon durante e tres añanan y mei cu Hesus a predica y siña hende publicamente e no a cita for di tur e bukinan inspira cu tabatin. Wel, por ta masha bon cu el a hacie. No lubida cu ta un fraccion so di e palabranan y echonan di Hesus tin registra den Bijbel. (Juan 21:25) De echo, den apenas un par di ora lo bo por lesa na bos halto tur e palabranan di Hesus cu tin registra. Awor, imagina cu bo ta papia tocante Dios y su Reino pa djis un par di ora y bo ta logra referi na mas cu mitar di e bukinan di e Scritura Hebreo! Es mas, den mayoria di caso Hesus no tabatin rolnan skirbi hunto cu ne. Ora cu el a tene su famoso Sermon Riba Sero, el a inclui cantidad di referencia directo y indirecto na e Scritura Hebreo; anto tur for di cabes!

⁷ E textonan cu Hesus a cita a demostra su respet profundo pa e Palabra di Dios. Su oyentenan “a keda asombra di su siñansa, pasobra e tabata siña nan manera un hende cu tin autoridad y no manera e escribanan.” (Marco 1:22) Ora e escribanan tabata siña hende, nan tabata gusta referi na e asina yama lei oral, citando palabranan di rabinan educa di pasado. Hesus ni un biaha no a cita e lei oral of un rabi como autoridad. Mas bien, el a considera e Palabra di Dios como e autoridad final. Bes tras bes el a bisa: “Ta para skirbi.” Repetidamente el a uza e palabranan ei of palabranan similar ora el a siña su siguidonan y ora el a corigi ideanan robes.

8, 9. (a) Con Hesus a sostene e autoridad di e Palabra di Dios ora el a limpia e tempel? (b) Den ki manera e lidernan religioso na e tempel a demostra gran falta di respet pa e Palabra di Dios?

⁸ Ora Hesus a limpia e tempel na Jerusalem, el a bisa: “Ta para skirbi: ‘Mi cas lo wordo yama un cas di oracion’; ma boso ta hacie un cueba di ladron.” (Mateo 21:12, 13; Isaias 56:7; Jeremias 7:11) E dia prome, el a efectua hopi obra maraviyoso einan. Mucha hombernan chikito, cu a keda profundamente impresiona, a cuminsa alab’e. Sinembargo, tur rabia e lidernan religioso a puntra Hesus si e no a tende loke e muchanan ei tabata bisa. El a contesta nan: “Si; boso no a lesa nunca: ‘For di boca di mucha chikito y di yiunan na pecho bo a prepara alabansa pa bo mes’?” (Mateo 21:16; Salmo 8:2) Hesus tabata kier pa e hombernan ei sa cu ta e Palabra di Dios a autorisa loke tabata tumando luga einan.

⁹ E lidernan religioso ei despues a reuni y a confronta Hesus, puntrando: “Cu ki autoridad bo ta haci e cosnan aki?” (Mateo 21:23) Hesus a splica bon cla caba ta ken tabata e Fuente di su autoridad. No ta cu idea- of doctrinanan nobo el a bin cu ne. Simplemente el a aplica loke e Palabra inspira di su Tata tabata bisa. Pues en realidad, tabata e sacerdote- y escribanan ei cu a demostra gran falta di respet pa Jehova y su Palabra. Nan a merece Hesus su condena plenamente ora cu el a revela con malicioso nan motibonan tabata.—Mateo 21:23-46.

10. Con nos por imita Hesus den e manera cu el a uza e Palabra di Dios, y ki hermentnan nos tin cu Hesus no tabatin?

¹⁰ Mescos cu Hesus, cristiannan berdadero djawe ta confia riba e Palabra di Dios den e ministerio. Ta conoci rond mundo cu Testigonan di Jehova ta ansioso pa comparti un mensahe di Bijbel cu otro hende. Masha hopi biaha nos publicacionnan ta cita for di Bijbel y tambe referi na dje. Anto den nos ministerio, nos ta haci mescos y ta purba hala atencion na e Scritura ki ora cu nos papia cu un hende. (2 Timoteo 3:16) Nos ta keda masha contento ora un hende permiti nos lesa for di Bijbel y papia cu ne tocante e balor y nificacion di e Palabra di Dios! Nos no tin un memoria perfecto manera Hesus, pero si nos tin hopi herment cu Hesus no tabatin na su disposicion. Fuera di e Bijbel completo imprimi na mas y mas idioma, nos tin hopi yudansa pa haya cualkier versiculo cu nos ta busca den Bijbel. Laga nos ta determina pa sigui cita for di Bijbel y dirigi hende na dje ki ora cu nos haya un chens!

El A Defende e Palabra di Dios

11. Dicon Hesus frecuentemente mester a defende e Palabra di Dios?

¹¹ Hesus a constata cu e Palabra di Dios tabata frecuentemente bou di atake, pero esei no a sorprend’e ni un momento so. El a bisa su Tata den oracion: “Bo palabra ta berdad.” (Juan 17:17) Anto Hesus tabata sa bon bon cu Satanas, “e prins di e mundo aki”, ta “un gañado y e tata di mentira.” (Juan 8:44; 14:30) Tres biaha Hesus a cita for di e Scritura ora el a rechasa e tentacionnan di Satanas. Satanas a cita un versiculo for di Salmo y deliberadamente a aplic’e robes, anto Hesus mesora a defende e Palabra di Dios contra tal mal uzo.—Mateo 4:6, 7.

12-14. (a) Con e lidernan religioso a mustra falta di respet pa e Lei di Moises? (b) Con Hesus a defende e Palabra di Dios?

¹² Hopi biaha Hesus a defende e Santo Scritura contra mal uzo, mal interpretacion y ideanan engañoso. E lidernan religioso di su tempo a representa e Palabra di Dios na un manera desbalansa. Nan a pone masha hopi enfasis riba wardamento di e detayenan di mas chikito di e Lei di Moises, pero a pone masha tiki enfasis riba aplicacion di e principionan riba cua e leinan tabata basa. Nan a fomenta pues un forma di adoracion superficial, uno cu a consentra riba aparencia djafo en bes di riba loke tabata mas importante, cosnan manera husticia, misericordia y fieldad. (Mateo 23:23) Con Hesus a defende e Lei di Dios?

¹³ Hesus a uza bes tras bes den su Sermon Riba Sero e frase “boso a tende cu a wordo bisa” pa introduci un regla di e Lei di Moises. El a sigui despues cu e frase “ma ami ta bisa boso”, y a splica un principio cu a bai mas profundo cu djis warda e Lei superficialmente. Acaso e tabata presenta argumentonan contra e Lei? No, e tabata defende e Lei. Por ehempel, e hendenan tabata bon na haltura di e lei pa “no mata.” Pero Hesus a bisa nan cu esun cu odia otro hende ta viola e spirito di e lei ei. Di igual manera, esun cu cultiva mal deseo pa un hende cu no ta su casa ta viola e principio fundamental di e lei di Dios contra adulterio.—Mateo 5:17, 18, 21, 22, 27-39.

¹⁴ Por ultimo, Hesus a bisa: “Boso a tende cu a wordo bisa: ‘Stima bo prohimo y odia bo enemigo.’ Ma ami ta bisa boso, stima boso enemigonan, . . . haci oracion pa esnan cu ta maltrata boso y ta persigui boso.” (Mateo 5:43, 44) Acaso e mandamento pa “odia bo enemigo” tabata saca for di e Palabra di Dios? No, ta e lidernan religioso a bini cu e lei ei. Nan a mescla Dios su Lei perfecto cu pensamento humano y asina a debilita e Lei. Sin miedo Hesus a defende e Palabra di Dios contra e efectonan perhudicial di tradicion humano.—Marco 7:9-13.

15. Con Hesus a defende e Lei di Dios contra intentonan pa lag’e parce mucho stricto, asta sin misericordia?

¹⁵ Un otro manera cu e lidernan religioso a duna un idea robes di e Lei di Dios tabata dor di lag’e parce mucho stricto, asta sin misericordia. Ora cu e discipelnan di Hesus a kita algun tapushi di maishi mientras nan tabata pasando den un cunucu, algun farizeo a pretende cu nan a kibra sabat. Hesus a uza un ehempel biblico pa defende e Palabra di Dios contra e punto di bista desbalansa aki. El a referi na e unico incidente den e Scritura cu ta menciona cu nan a uza e pan di presencia pafo di e santuario, esta, ora David cu su hombernan hambra a com’e. Hesus a mustra e farizeonan ei cu nan no a compronde Jehova su misericordia y compasion.—Marco 2:23-27.

16. Con e lidernan religioso a corumpi e mandamento di Moises relaciona cu divorcio, y con Hesus a reacciona?

¹⁶ E lidernan religioso a formula tambe buraconan legal pa kibra e forsa di e Lei di Dios. Por ehempel, e Lei a permiti un homber divorcia di su casa si el a haya “algo indecente” den e muher, evidentemente un problema serio cu a trece berguensa riba e famia. (Deuteronomio 24:1) Sinembargo, den tempo di Hesus, e lidernan religioso tabata uza e echo cu e Lei a permiti un divorcio asina como un excuse pa laga un homber divorcia di su casa pa tur tipo di motibo, asta pasobra el a kima e homber su cuminda!a Hesus a mustra cu nan a duna un idea completamente robes di e palabranan di Moises. Anto e ora ei el a restaura Jehova su norma original pa matrimonio, esta, un esposo pa un esposa, lagando inmoralidad sexual como e unico base valido pa divorcio.—Mateo 19:3-12.

17. Con cristiannan djawe por imita Hesus den defende e Palabra di Dios?

¹⁷ Siguidonan di Cristo djawe tambe ta sinti nan obliga na defende e Santo Scritura contra atake. Ora lidernan religioso ta bisa indirectamente cu e normanan moral di e Palabra di Dios ta anticua, nan de echo ta atacando Bijbel. Mescos ta e caso tambe ora cu religionnan ta siña doctrinanan falso y presenta nan como saca for di Bijbel. Pa nos, ta un privilegio di por sali na defensa di Dios su Palabra puro di berdad y mustra, por ehempel, cu Dios no ta parti di un Trinidad. (Deuteronomio 4:39) Ora di haci esei, nos ta defende e Palabra di Dios cu tacto, cu berdadero suavidad y respet profundo.—1 Pedro 3:15.

El A Splica e Palabra di Dios

18, 19. Ki ehempelnan ta mustra cu Hesus tabatin un habilidad maraviyoso pa splica e Palabra di Dios?

¹⁸ Hesus tabata na bida den shelo ora cu skirbimento di e Scritura Hebreo a tuma luga. Lo e tabata contento di por a bin na Tera y yuda splica e Palabra di Dios! Por ehempel, pensa riba e dia memorabel despues di su resureccion ora el a topa cu dos di su discipelnan riba caminda pa Emaus. Prome cu nan a reconoc’e, nan a cont’e con tristo y confundi nan tabata pa motibo di morto di nan Shon stima. Con el a reacciona? “Cuminsando cu Moises y cu tur e profetanan el a splica nan e cosnan tocante di su mes den tur e Scrituranan.” Ki efecto esei tabatin riba e discipelnan? Despues nan a bisa otro: “Nos curason no tabata kima den nos mientras cu e tabata papia cu nos na caminda, mientras cu e tabata splica nos e Scrituranan?”—Lucas 24:15-32.

¹⁹ Mas despues riba e mesun dia ei, Hesus a reuni cu su apostelnan y otro discipel. Tuma nota kico el a haci pa nan: “El a habri nan huicio pa nan compronde e Scrituranan.” (Lucas 24:45) Sin duda, e ocasion felis ei a laga nan corda riba e tantisimo biahanan cu Hesus a haci algo similar pa nan, y pa ken cu kier a tende. Hopi biaha el a cita textonan bon conoci y a splica nan di tal manera cu esei tabatin un efecto maraviyoso riba e mente di su oyentenan, ya cu nan a haya un comprondemento nobo y mas profundo di e Palabra di Dios.

20, 21. Con Hesus a splica e palabranan cu Jehova a papia cu Moises na e mata na candela?

²⁰ Na un ocasion asina, Hesus tabata papiando cu un grupo di saduceo. Nan tabata un secta di hudaismo asocia cu e sacerdocio Hudiu, y nan no a kere den resureccion. Hesus a bisa nan: “Encuanto resureccion di e mortonan, boso no a lesa loke Dios a papia cu boso, bisando: ‘Ami ta e Dios di Abraham, y e Dios di Isaak, y e Dios di Jacob’? E no ta e Dios di e mortonan, sino di e bibonan.” (Mateo 22:31, 32) Esaki tabata un texto cu nan a conoce bon, skirbi pa un homber cu e saduceonan a admira masha hopi, esta, Moises. Pero bo ta mira e impacto di Hesus su splicacion?

²¹ Moises a combersa cu Jehova na e mata na candela rond di aña 1514 prome cu nos era. (Exodo 3:2, 6) E tempo ei, Abraham tabatin 329 aña morto, Isaak tabatin 224 aña morto y Jacob tabatin 197 aña morto. Sinembargo, ainda Jehova a bisa “mi ta” nan Dios. E saduceonan ei tabata sa cu Jehova no ta manera un of otro dios pagano di e mortonan, cu segun mitologia a reina den un mundo subteraneo. No, e tabata e Dios “di e bibonan”, manera Hesus a bisa. Pues kico esei a nifica? Hesus su conclusion tabata impactante: “Pa e tur ta biba.” (Lucas 20:38) Jehova su sirbidornan stima cu a muri ta bon conserva den su memoria perfecto y sin limite. Pues Jehova su proposito di resusita e personanan ei ta asina sigur cu por papia di nan como si fuera nan ta bibo. (Romanonan 4:16, 17) Esei no ta un splicacion maraviyoso di e Palabra di Dios? Nada straño cu ‘e multitudnan a keda asombra’!—Mateo 22:33.

22, 23. (a) Con nos por imita Hesus ora di splica e Palabra di Dios? (b) Kico nos lo considera den e siguiente capitulo?

²² Cristiannan djawe tin e privilegio di imita Hesus su manera di splica e Palabra di Dios. Nos tin cu admiti cu nos no tin un mente perfecto. A pesar di esei, hopi biaha nos por comparti cu otro hende un texto biblico cu nan conoce caba y splica nan cierto aspecto di e texto ei cu kisas nunca nan no a cai ariba. Un ehempel: Podise henter nan bida nan a ripiti e oracion “Bo nomber sea santifica” y “Cu bo reino bin”, sin cu nunca nan a siña kico e nomber di Dios ta of kico e Reino ta. (Mateo 6:9, 10) Ki un oportunidad maraviyoso nos tin ora un hende permiti nos duna un splicacion cla y simpel di e berdadnan biblico ei!

²³ Pues, pa por imita e manera cu Hesus a comparti e berdad nos tin cu cita for di e Palabra di Dios, defend’e y splic’e. Laga nos ban considera awor algun di e metodonan efectivo cu Hesus a uza pa yega na curason di su oyentenan cu e berdadnan di Bijbel.