“Nunca un Hende No A Papia Manera e Homber Aki”

1, 2. (a) Dicon e oficialnan cu nan a manda pa aresta Hesus a regresa man bashi? (b) Dicon Hesus tabata un maestro sobresaliente?

E FARIZEONAN tabata furioso. Hesus tabata den tempel ta siña hende tocante su Tata. Tabatin un division entre esnan cu a scuch’e; hopi a pone fe den Hesus, mientras cu otronan tabata kier pa nan arest’e. Ora e lidernan religioso no por a contene nan rabia mas, nan a manda algun oficial bai aresta Hesus. Sinembargo, e oficialnan a bin bek man bashi. E sacerdotenan principal y e farizeonan a exigi un splicacion: “Pakico boso no a trec’e?” E oficialnan a contesta: “Nunca un hende no a papia manera e homber aki.” Nan tabata asina impresiona cu Hesus su siñansa cu nan no tabata sa di unda pa saca e curashi pa arest’e.a—Juan 7:45, 46.

² E oficialnan ei no tabata e uniconan cu a keda impresiona cu e siñansa di Hesus. Hende tabata reuni na gran cantidad djis pa tend’e. (Marco 3:7, 9; 4:1; Lucas 5:1-3) Dicon Hesus tabata un maestro asina sobresaliente? Manera nos a mira den Capitulo 8, el a stima e berdadnan cu el a trece dilanti, y el a stima e hendenan cu el a siña. Pero tambe Hesus tabata experto den e metodonan cu el a uza pa siña otro hende. Laga nos considera tres di e metodonan efectivo cu el a uza y wak con nos por imita nan.

El A Tene Su Siñansa Simpel

3, 4. (a) Dicon Hesus a uza lenguahe simpel den su siñansa? (b) Con e Sermon Riba Sero ta un ehempel di e manera simpel cu Hesus a siña hende?

³ Bo por imagina e vocabulario extenso cu Hesus lo tabatin na su disposicion? Sinembargo, ora el a siña hende, nunca el a papia cosnan cu tabata mucho dificil pa su auditorio, cu a consisti pa mayor parti di hende cu no tabata “educa ni siña.” (Echonan 4:13) El a tene cuenta cu nan limitacionnan, y nunca a duna nan demasiado informacion. (Juan 16:12) Su palabranan tabata simpel, pero e berdadnan cu nan a transmiti tabata masha profundo.

⁴ Tuma por ehempel e Sermon Riba Sero na Mateo 5:3–7:27. Hesus a duna conseho profundo den e sermon aki y a bai na raiz di e asuntonan. No tin ideanan ni frasenan complica den dje. Casi no tin palabra cu ta dificil pa compronde, ni sikiera pa un mucha! Nada straño anto cu ora Hesus a caba, e multitudnan—cu probablemente a inclui hopi cunukero, wardado di carne y piscado—“a keda asombra di su siñansa.”—Mateo 7:28.

5. Duna algun ehempel di palabranan simpel cu Hesus a expresa pero cu tabatin gran nificacion.

⁵ Ora Hesus a siña hende, el a uza hopi biaha frasenan simpel y cortico, y a expresa palabranan cu tabatin gran nificacion. Den un era caminda ainda no tabatin buki imprimi y den cua e medio principal di haya informacion tabata dor di scucha, Hesus a graba su mensahe permanentemente den mente y curason di su oyentenan. Tuma nota di algun ehempel: “No husga, pa boso no wordo husga.” “No ta esnan cu ta salud tin mester di docter, sino esnan cu ta malo.” “E spirito ta voluntario, ma e carni ta debil.” “Duna Cesar loke ta di Cesar, y Dios loke ta di Dios.” “Ta mas bendiciona pa duna cu pa ricibi.”b (Mateo 7:1; 9:12; 26:41; Marco 12:17; Echonan 20:35) Despues di casi 2.000 aña cu Hesus a papia e palabranan ei, te ainda nan ta memorabel.

6, 7. (a) Pa siña na un manera simpel, dicon ta importante pa nos uza lenguahe simpel? (b) Con nos por evita cu nos ta duna un studiante di Bijbel demasiado informacion?

⁶ Con nos por siña hende na un manera simpel? Un rekisito importante ta pa nos uza lenguahe simpel cu mayoria di hende por compronde mesora. E berdadnan basico di e Palabra di Dios no ta complica. Jehova a revela su proposito na hende di curason sincero y humilde. (1 Corintionan 1:26-28) Palabranan simpel, scohi cuidadosamente, por transmiti e berdadnan di e Palabra di Dios na un manera efectivo.

⁷ Pa siña na un manera simpel, nos mester tene cuidou pa nos no duna un studiante di Bijbel demasiado informacion. Pues, ora nos ta conduci un estudio di Bijbel, nos no tin nodi splica delaster un detaye; ni no ta necesario pa pasa pura pura dor di e material como si fuera e cos di mas importante ta pa nos abarca un cantidad fiho di pagina. Mas bien, ta sabi pa laga e necesidad y capasidad di e studiante determina e ritmo di e estudio. Nos meta ta pa yuda e studiante bira un siguido di Cristo y un adorado di Jehova. Pa logra esei, nos tin cu tuma e tempo cu ta necesario pa yuda e studiante haya un comprondemento rasonabel di loke e ta siñando. Ta asina so berdad di Bijbel lo touch su curason y motiv’e pa pone na practica loke el a siña.—Romanonan 12:2.

El A Haci e Preguntanan Corecto

8, 9. (a) Pakico Hesus a haci pregunta? (b) Con Hesus a uza pregunta pa yuda Pedro yega na e conclusion corecto riba e asunto di paga belasting di tempel?

⁸ Hesus a haci uzo di pregunta na un manera masha notabel, asta ora cu lo a tuma menos tempo si el a djis bisa su oyentenan kico tabata e punto cu e kier a trece dilanti. Pues, pakico el a haci pregunta? Tabatin biaha cu el a haci preguntanan penetrante pa saca na cla e mal motibonan di su opositornan, y asina el a silencia nan. (Mateo 21:23-27; 22:41-46) Sinembargo, den hopi caso el a haci pregunta pa laga su discipelnan expresa kico tabatin den nan mente, y pa stimula y entrena nan capasidad mental. P’esei el a haci preguntanan manera: “Kico boso ta kere?” y “Bo ta kere esaki?” (Mateo 18:12; Juan 11:26) Pa medio di pregunta, Hesus a yega na curason di su discipelnan y a motiva nan. Considera un ehempel.

⁹ Na un ocasion, cobradonan di belasting a puntra Pedro si Hesus a paga belasting di tempel.c Mesora Pedro a contesta: “Si.” Mas despues, Hesus a rasona cu ne: “Kico bo ta pensa, Simon? Ken e reinan di Tera ta cobra tributo of belasting: nan yiu hombernan of stranheronan?” Pedro a contesta: “Stranheronan.” Hesus a bis’e: “Kiermen e yiunan ta liber [di belasting] anto.” (Mateo 17:24-27) Cu e preguntanan aki, Pedro lo mester a compronde bon cla kico Hesus tabata kiermen, pasobra miembronan di famia real no tabatin cu paga belasting. P’esei, como e Yiu unigenito di e Rei celestial cu tabata ser adora na e tempel, Hesus no tabata obliga di paga belasting. Tuma nota cu en bes di djis bisa Pedro e contesta corecto, Hesus cu tacto a uza pregunta pa yuda Pedro yega na e conclusion corecto y talbes tambe mira e necesidad pa otro biaha mihor e pensa bon prome cu e contesta.

10. Con nos por uza pregunta na un manera efectivo ora nos ta predica di cas pa cas?

¹⁰ Con nos por uza pregunta na un manera efectivo den nos ministerio? Ora nos ta predica di cas pa cas, nos por uza pregunta pa lanta interes, y talbes asina habri e caminda pa nos por comparti e bon nobo. Por ehempel, si un hende di edad bin na porta, nos lo por plantia respetuosamente e pregunta: “Con mundo a cambia durante bo bida?” Despues di permiti e persona contesta, nos lo por puntra: “Kico bo ta kere lo ta necesario pa haci e mundo aki un mihor luga di biba?” (Mateo 6:9, 10) Si ta un mama cu tin yiu chikito a bin na porta, nos lo por puntra: “Bo a yega di puntra bo mes ta con e mundo aki lo ta ora cu bo yiunan bira grandi?” (Salmo 37:10, 11) Si nos observa bon ora nos ta yega cerca di un cas, nos lo por scohe un pregunta cu ta cuadra cu loke ta interesa e doño di cas.

11. Con nos por haci bon uzo di pregunta ora nos ta conduci un estudio di Bijbel?

¹¹ Con nos por haci bon uzo di pregunta ora nos ta conduci un estudio di Bijbel? Preguntanan bon scohi por yuda nos saca afo ki sintimento tin den curason di un studiante. (Proverbionan 20:5) Por ehempel, supone cu nos ta studiando e capitulo “Biba na un Manera Cu Ta Agrada Dios” di e buki Kico Bijbel Ta Siña Realmente?d E capitulo ta considera Dios su punto di bista di asuntonan manera inmoralidad sexual, buracheria y gañamento. E contestanan di e studiante kisas ta indica cu e ta compronde loke Bijbel ta siña. Pero e ta di acuerdo cu loke e ta siñando? Nos lo por puntr’e: “Bo ta haya Dios su punto di bista di e asuntonan aki rasonabel?” Nos lo por puntra tambe: “Con bo por aplica e informacion aki den bo bida?” Pero corda si cu nos mester mustra tacto y trata e studiante cu e debido respet. Nunca nos lo kier haci preguntanan cu ta brongos’e innecesariamente.—Proverbionan 12:18.

Uza Rasonamento Logico y Potente

12-14. (a) Den ki maneranan Hesus a uza su habilidad pa rasona logicamente? (b) Ki rasonamento potente y logico Hesus a uza ora cu e farizeonan a bis’e cu su poder ta bin di Satanas?

¹² Cu su mente perfecto, Hesus tabata un maestro den rasona cu hende. Algun biaha el a uza rasonamento logico y potente pa refuta acusacionnan falso di su opositornan. Den hopi caso, el a uza rasonamento combencente pa siña su siguidonan lesnan valioso. Laga nos considera algun ehempel.

¹³ Despues cu Hesus a cura un homber posei pa demoño cu tabata ciego y no por a papia, e farizeonan a acus’e: “E homber aki ta saca demoño solamente pa medio di Beelzebub [Satanas], e prins di demoñonan.” E farizeonan a admiti di mala gana cu Hesus mester tabatin poder sobrehumano pa saca demoño. Sinembargo, nan a bisa cu ta Satanas a dun’e e poder ei. E acusacion ei tabata falso y tambe ilogico. Pa saca na cla cu nan manera di pensa tabata kiboca, Hesus a contesta: “Tur reino cu ta dividi contra su mes ta keda ruina; y tur stad of cas cu ta dividi contra su mes lo no keda para. Y si Satanas saca Satanas afo, e ta keda dividi contra su mes; con su reino lo keda para anto?” (Mateo 12:22-26) Hesus a bisa nan na moda di papia: “Si mi tabata un agente di Satanas, y ta traha contra loke Satanas a haci, e ora ei Satanas lo ta trahando contra su mes interesnan y lo cai pronto.” Con nan por a refuta un rasonamento logico y combencente asina?

¹⁴ Pero Hesus no a caba di rasona cu nan. Como cu e tabata sa cu algun discipel di e farizeonan mes a saca demoño, el a haci nan un pregunta simpel pero impactante: “Si ami ta saca demoño pa medio di Beelzebub, ta pa medio di ken boso yiu hombernan [of, discipelnan] ta saca nan?” (Mateo 12:27) Den un sentido, Hesus su argumento tabata esaki: “Si ta pa medio di e poder di Satanas mi ta saca demoño, anto boso discipelnan mester ta uzando e mesun poder aki.” Kico e farizeonan por a bisa? Hamas nan lo a reconoce cu nan discipelnan tabata actua cu poder di Satanas. Pues Hesus a uza nan rasonamento robes pa forsa nan yega na un conclusion hopi incomodo. No ta emocionante pa djis lesa tocante e manera cu Hesus a rasona cu nan? Wel, imagina con e multitudnan cu a tende Hesus papia personalmente a sinti, pasobra sin duda su presencia y tono di bos a aumenta e impacto di su palabranan.

15-17. Menciona un ehempel cu ta mustra con Hesus a uza e rasonamento di “cuanto mas” pa siña hende berdadnan alentador tocante su Tata.

¹⁵ Ademas, Hesus a uza rasonamento combencente y logico pa instrui berdadnan positivo y alentador tocante su Tata. El a haci esei hopi biaha uzando e palabranan “cuanto mas” den su rasonamento, y asina a yuda su oyentenan avansa di un berdad cu nan tabata conoce caba pa un conviccion asta mas fuerte.e E tipo di rasonamento aki, cu ta basa riba contraste, por haci un impresion profundo. Laga nos analisa dos ehempel so.

¹⁶ Ora Hesus a contesta e peticion di su discipelnan pa siña nan con pa haci oracion, el a mustra con mayornan humano imperfecto ta dispuesto pa “duna cosnan bon” na nan yiunan. Anto el a conclui: “Si boso anto, siendo malbado, sa di duna cosnan bon na boso yiunan, cuanto mas boso Tata celestial lo duna e spirito santo na esnan cu pidie!” (Lucas 11:1-13) E punto cu Hesus kier a trece dilanti ta basa riba contraste. Si mayornan humano pecador ta atende e necesidadnan di nan yiunan, cuanto mas nos Tata celestial—kende ta perfecto y husto den tur sentido—lo duna spirito santo na su sirbidornan leal cu ta acerc’e humildemente den oracion!

¹⁷ Hesus a rasona casi mescos ora el a ofrece conseho sabi encuanto con pa trata cu ansiedad. El a bisa: “Considera e raafnan, pasobra nan no ta sembra ni cosecha; y nan no tin luga pa warda provision, ni mangasina; y toch Dios ta alimenta nan; cuanto mas cu parha boso no ta bal! Considera e lelinan, con nan ta crece; nan no ta traha mata curpa, ni nan no ta hila . . . Ma si di tal manera Dios ta bisti e yerba di sabana, locual awe t’ei y mañan ta wordo tira den forno, cuanto mas e lo bisti boso, o hendenan di poco fe!” (Lucas 12:24, 27, 28) Si Jehova ta percura pa parha y flor, cuanto mas lo e no percura pa hende cu ta stim’e y ador’e! Sin duda, cu e tipo di rasonamento ei Hesus a touch curason di su oyentenan.

18, 19. Con nos por rasona cu un persona cu ta bisa cu e no ta kere den un Dios cu e no por mira?

¹⁸ Den nos ministerio, nos kier uza rasonamento sano y logico pa refuta creencianan falso. Ademas, nos kier uza rasonamento combencente pa siña berdadnan positivo tocante Jehova. (Echonan 19:8; 28:23, 24) Nos lo tin cu siña uza rasonamento sofistica pa logra esei? No. E les cu nos ta siña di Hesus ta cu argumentonan logico presenta den un manera simpel ta esnan mas efectivo.

¹⁹ Por ehempel, con nos lo por contesta un hende cu ta bisa cu e no ta kere den un Dios cu e no por mira? Nos lo por rasona cu ne riba e lei natural di causa y efecto. Ora nos observa un efecto, nos ta realisa cu mester tin un causa. Nos lo por bisa e persona: “Supone cu bo ta den un area hopi aleha y bo ta topa un cas bon construi yen di comestibel (efecto), lo bo no acepta mesora cu un hende (un causa) ta responsabel pa esei? Asina tambe, ora nos mira e diseño bisto den naturalesa y e abundancia di alimento den e ‘mangasinanan’ di tera (efecto), no ta logico pa conclui cu ta un Persona (un Causa) ta responsabel pa esei? Bijbel mes ta rasona asin’aki: ‘Tur cas ta wordo traha dor di un hende, ma Esun cu a traha tur cos ta Dios.’” (Hebreonan 3:4) Naturalmente, maske con bon nos rasonamento por ta, lo e no combence tur hende.—2 Tesalonicensenan 3:2.

20, 21. (a) Con nos por uza e rasonamento di “cuanto mas” pa resalta Jehova su cualidadnan y manera di actua? (b) Kico nos lo trata den e siguiente capitulo?

²⁰ Ora nos ta siña otro hende, sea den sirbishi di veld of den congregacion, nos por uza tambe e mesun rasonamento di “cuanto mas” pa resalta Jehova su cualidadnan y manera di actua. Por ehempel, pa mustra cu e doctrina di tormento eterno den candela di fierno de echo ta deshonra Jehova, nos lo por bisa: “Ta cua tata amoroso lo castiga su yiu dor di hinca e yiu su man den candela? Cuanto mas e idea so di un candela di fierno lo mester ta repugnante pa nos amoroso Tata celestial!” (Jeremias 7:31) Pa sigura un ruman den fe cu ta deprimi cu Jehova ta stim’e, nos lo por bisa: “Si Jehova ta considera cu asta un mofi chikitico tin balor, cuanto mas lo e no ta interesa den cada un di su adoradonan riba Tera y stima nan, incluso abo!” (Mateo 10:29-31) E tipo di rasonamento ei por yuda nos yega na curason di otro hende.

²¹ Despues di a repasa apenas tres di e metodonan di siñansa cu Hesus a uza, nos por mira facilmente cu e oficialnan cu no por a aresta Hesus sigur no a exagera ora nan a bisa: “Nunca un hende no a papia manera e homber aki.” Den e siguiente capitulo nos lo trata e metodo di siñansa pa cua Hesus kisas ta mas conoci, esta, su uzo di ilustracion of parabola.