“Mira, e Leon Cu Ta di e Tribu di Juda”

1-3. Ki peliger a bin riba Hesus, y con el a reacciona?

UN MULTITUD violento tabata busca Hesus pa aresta. Nan tabata arma cu spada y klop y acompaña pa solda. Como si fuera cu un solo proposito maligno na mente, nan a cana dor di e cayanan scur di Jerusalem y a pasa den Rooi Kedron rumbo pa Sero di Oleifi. Tabata luna yen, y toch nan tabatin flambeu y lanterna. Acaso nan tabatin esakinan pasobra e nubianan a tapa e claridad di luna? Of nan a kere cu e persona cu nan tabata busca lo a bai sconde den scuridad? Un cos ta sigur: Ken cu a pensa cu Hesus lo a cobardia no a conoce su caracter.

² Hesus tabata sa di e peliger cu tabata acerca. Toch el a para warda. E multitud violento a yega cerca dje, guia pa Judas cu anteriormente tabata un amigo di confiansa. Sin ni un clase di berguensa, Judas a traiciona Hesus. El a identifica su shon cu un saludo y un sunchi hipocrita. Pero Hesus a keda trankil. Anto Hesus a bin dilanti di e multitud violento y a puntra nan: “Ta ken boso ta busca?” Nan a contest’e: “Hesus di Nazaret.”

³ Mayoria di hende lo tabata morto spanta dilanti di un multitud violento y arma asina. Podise ta esei tabata loke e multitud aki a spera di e homber nan dilanti. Pero Hesus no a cobardia, e no a hui bai ni e no a core gaña algo. Mas bien, el a bisa simplemente: “Ta ami t’e.” El a reacciona asina calmo, cu asina tanto curashi, cu e hombernan a keda pasma. Nan a hala atras, tambalia y cai abou na suela!—Juan 18:1-6; Mateo 26:45-50; Marco 14:41-46.

4-6. (a) Bijbel ta compara e Yiu di Dios cu kico, y dicon? (b) Cua ta tres manera cu Hesus a desplega curashi?

⁴ Kico por a yuda Hesus confronta un peliger asina grandi cu tanto trankilidad y dominio propio? Den un solo palabra: curashi. Curashi ta un di e cualidadnan mas necesario y mas gusta den un lider, y ningun hende nunca a iguala, mucho menos surpasa, Hesus den esaki. Den e capitulo anterior, nos a siña con humilde y manso Hesus tabata. Corectamente Bijbel a yam’e “un Lamchi.” (Juan 1:29) Sinembargo, e curashi di Hesus ta pone cu Bijbel ta describie cu completamente un otro nomber. E ta bisa di e Yiu di Dios: “Mira, e Leon cu ta di e tribu di Juda.”—Revelacion 5:5.

⁵ Leon ta ser liga hopi biaha cu curashi. Abo a yega di topa cara cara cu un leon macho adulto? Wel, muy probablemente tabatin un waya ta proteha bo for di e bestia aki, kisas e waya di su haula den un dierentuin. Asina mes, esei por ta un experencia cu ta pone bo pasa den un susto. Ora bo wak e criatura grandi y poderoso aki stret den su cara y e tambe keda wak bo firmemente bek den bo cara, lo bo no por imagina cu un leon ta core bai di miedo. Bijbel ta papia di “e leon, cu ta esun di mas fuerte entre e bestianan, y cu no ta hala atras pa nada.” (Proverbionan 30:30) Asina e curashi di Cristo tabata.

⁶ Laga nos ban considera awor tres manera cu Hesus a desplega curashi manera leon: ora el a defende e berdad, ora el a sostene husticia y ora el a enfrenta oposicion. Nos lo mira tambe cu nos tur por imita Hesus den mustra curashi, sea cu di naturalesa nos tin curashi of no.

Cu Curashi El A Defende e Berdad

7-9. (a) Kico a sosode tempo Hesus tabatin 12 aña, y kico bo ta kere a haci e situacion ei intimidante? (b) Con Hesus a desplega curashi den su trato cu e siñadonan den tempel?

⁷ Den un mundo goberna pa Satanas, “e tata di mentira”, hopi bes bo mester tin curashi pa defende e berdad. (Juan 8:44; 14:30) Hesus no a warda te ora el a bira adulto pa haci esei. Na edad di 12 aña, Hesus y su mayornan a perde otro despues di e fiesta di Pasco Hudiu na Jerusalem. Tres dia largo, Maria cu Jose a busca e mucha desesperadamente. Finalmente nan a hay’e den tempel. Anto kico nan a hay’e ta haci einan? “Sinta meimei di e siñadonan, ta scucha nan y ta haci nan pregunta.” (Lucas 2:41-50) Pensa riba e circunstancia bou di cua e combersacion ei a tuma luga.

⁸ Historiadonan ta bisa cu algun di e lidernan religioso principal tabatin e custumber di keda na e tempel despues di e fiestanan y siña hende den un di e verandanan espacioso cu tabatin einan. Hende tabata cai sinta na nan pia pa scucha nan y haci nan pregunta. E maestronan aki tabata hombernan siña. Nan tabata versa den e Lei di Moises y tambe den e gran cantidad di lei y tradicion complica cu hende a traha y cu a aumenta sin fin atrabes di añanan. Con abo lo a sinti bo sinta meimei di nan? Intimida? Esei lo ta di compronde. Y kico si bo tabatin apenas 12 aña di edad? Hopi mucha ta timido. (Jeremias 1:6) Tin di nan ta purba tur manera pa no hala atencion di nan maestronan na scol; e hobennan aki tin miedo cu ta pidi nan pa haci of bisa algo, nan tin miedo di haya atencion special, miedo di e posibilidad di ser brongosa of tenta.

⁹ Sinembargo, aki nos ta haya Hesus, sinta meimei di e hombernan siña ei, ta haci nan pregunta profundo sin miedo. El a bai asta mas aleu. E relato ta bisa nos: “Tur esnan cu a tend’e a keda straña di su comprondemento y su contestanan.” (Lucas 2:47, 48) Bijbel no ta conta nos kico el a bisa na e ocasion ei, pero nos por tin sigur cu e no a djis ripiti manera lora e mentiranan cu e maestronan religioso ei tabata promove. (1 Pedro 2:22) No, Hesus a sostene e berdad di e Palabra di Dios, y su oyentenan sigur tabata asombra cu un mucha homber di 12 aña por a expresa su mes cu asina tanto comprondemento penetrante y curashi.

10. Con hobennan cristian awe ta imita e curashi di Hesus?

¹⁰ Awe tin cantidad di hoben cristian ta sigui den e pasonan di Hesus. Ta berdad cu nan no ta perfecto manera e hoben Hesus tabata. Pero mescos cu Hesus, nan no ta warda te ora nan bira adulto pa nan defende e berdad. Na scol of den e comunidad caminda nan ta biba, nan ta haci hende pregunta cu tacto, ta scucha nan contesta y cu respet ta comparti e berdad cu nan. (1 Pedro 3:15) Como grupo, e hobennan aki a yuda hopi compañero di scol, maestro y bisiña bira siguido di Cristo. Jehova lo mester ta hopi contento cu nan curashi! Su Palabra ta compara hobennan asina cu serena, algo refrescante, agradabel y numeroso.—Salmo 110:3.

11, 12. Como adulto, con Hesus a defende e berdad cu curashi?

¹¹ Como adulto, Hesus bes tras bes a defende e berdad cu curashi. De echo, su ministerio a cuminsa cu un confrontacion cu hopi hende lo a yama spantoso. Hesus como hende di carni y weso, no como arcangel poderoso, mester a confronta Satanas, e enemigo di mas fuerte y peligroso di Jehova. Hesus a rechasa Satanas y a refuta e manera cu el a troce e Scritura inspira. Hesus a termina e encuentro bisando cu curashi: “Bai for di akinan, Satanas!”—Mateo 4:2-11.

¹² Pues asina Hesus a establece e patronchi cu lo el a sigui den su ministerio, esta, di defende e Palabra di su Tata cu curashi contra esfuersonan pa troc’e of aplic’e robes. E tempo ei, mescos cu awor, tabatin hopi engaño religioso. Hesus a bisa lidernan religioso di su tempo: ‘Boso ta haci e palabra di Dios bira sin balor dor di boso tradicion cu boso a pasa over pa otronan.’ (Marco 7:13) E pueblo en general tabata venera e hombernan ei masha, pero sin miedo Hesus a denuncia nan como guia ciego y hipocrita.a (Mateo 23:13, 16) Con nos por imita e aspecto aki di Hesus su ehempel di curashi?

13. Kico nos tin cu corda ora nos ta imita Hesus, pero ki privilegio nos tin?

¹³ Naturalmente, nos ta conciente cu nos no tin Hesus su capasidad di lesa curason ni su autoridad di husga. Sinembargo, nos por imita su curashi den defende e berdad. Por ehempel, ora nos ta desenmascara mentiranan religioso—e mentiranan cu asina hopi biaha nan ta siña hende tocante Dios y su proposito y su Palabra—nos ta trece lus den un mundo cu ta den scuridad debi na propaganda satanico. (Mateo 5:14; Revelacion 12:9, 10) Nos ta yuda libra hende for di sclabitud na siñansanan falso cu ta yena nan curason cu un miedo insaludabel y cu ta perhudica nan relacion cu Dios. Ki un gran privilegio nos tin di mira e cumplimento di Hesus su promesa: “E berdad lo haci boso liber”!—Juan 8:32.

Cu Curashi El A Sostene Husticia

14, 15. (a) Cua ta un manera cu Hesus a clarifica “kico ta husticia”? (b) Ora Hesus a papia cu un muher Samaritano, ki prehuicionan e no a haci caso di dje?

¹⁴ Profesia biblico a bisa di antemano cu e Mesias lo a clarifica pa e nacionnan “kico ta husticia.” (Mateo 12:18, NW; Isaias 42:1) Hesus sigur a cuminsa haci esei tempo e tabata riba Tera. Cu gran curashi el a demostra di ta semper husto y imparcial den su trato cu hende. Por ehempel, el a nenga di adopta e prehuicionan y intolerancia cu tabata reina den e mundo rond di dje y cu tabata contrario na siñansa biblico.

¹⁵ Ora cu Hesus a papia cu un muher Samaritano na e pos di Sicar, su discipelnan a keda sorprendi. Dicon? Den e tempo ei, Hudiu en general tabata odia Samaritano; pa hopi siglo caba nan tabatin e desprecio aki. (Esdras 4:4) Ademas, algun rabi tabata mira hende muher cu menosprecio. E reglanan rabinico, cu despues nan a pone por escrito, a descurasha hende homber di combersa cu hende muher; asta nan a sugeri cu hende muher no tabata digno di haya instruccion den e Lei di Dios. Specialmente hende muher Samaritano nan a considera impuro. Hesus no a haci caso di tal prehuicio inhusto y abiertamente el a siña e muher Samaritano (cu por cierto tabata hiba un bida inmoral), y asta a revela na e muher cu e ta e Mesias.—Juan 4:5-27.

16. Dicon cristiannan tin mester di curashi pa ta diferente relaciona cu prehuicio?

¹⁶ Bo a yega di ta den compania di hende cu tin prehuicio masha ofensivo? Podise nan ta conta chiste di menosprecio tocante hende di otro rasa of nacion, ta rebaha e sexo opuesto of ta desprecia hende di otro nivel economico of social. Siguidonan di Cristo no ta aproba tal punto di bista cu ta refleha odio, y nan ta traha duro pa elimina cualkier rastro di prehuicio cu tin den nan propio curason. (Echonan 10:34) Cada un di nos tin cu cultiva curashi pa ta husto den e aspecto aki.

17. Ki accion Hesus a tuma den tempel, y dicon?

¹⁷ Ta curashi tambe a pone Hesus bringa pa tene e pueblo di Dios limpi y pa e areglo di adoracion puro. Na principio di su ministerio, el a drenta den e patio di e tempel na Jerusalem y a keda hororisa di mira comerciante y cambiado di placa ta haci nan negoshi einan. Yen di indignacion husto, Hesus a saca e hombernan golos ei y nan mercancia for di den tempel. (Juan 2:13-17) Mas despues, casi na final di su ministerio, el a bolbe haci mescos. (Marco 11:15-18) E accionnan aki sigur a pon’e haya algun enemigo poderoso, toch e no a basila. Dicon? Pasobra for di chikito, el a yama e tempel aki e cas di su Tata, y el a men esei. (Lucas 2:49) E contaminacion di adoracion puro cu tabata tuma luga einan tabata un inhusticia cu hamas lo e por a sera wowo p’e. Su celo a dun’e e curashi pa haci loke tabata necesario.

18. Con cristiannan djawe por demostra curashi den e asunto di tene e congregacion limpi?

¹⁸ E siguidonan di Cristo awe tambe ta profundamente interesa pa e pueblo di Dios ta limpi y interesa den e areglo di adoracion puro. Si nan mira cu un compañero cristian ta envolvi den malecho serio, nan no ta djis sera wowo pa esei. Cu curashi nan ta papia cu e persona of cu e ancianonan. (1 Corintionan 1:11) Nan ta haci sigur cu e ancianonan di congregacion ta haya sa di e asunto. E ancianonan por yuda e personanan cu ta spiritualmente malo y tambe por tuma accion pa conserva e posicion limpi di e carnenan di Jehova.—Santiago 5:14, 15.

19, 20. (a) Ki inhusticianan tabata reina den tempo di Hesus, y ki presion Hesus a confronta? (b) Dicon siguidonan di Cristo ta nenga di mete den politica y violencia, y kico ta un di e recompensanan pa nan posicion?

¹⁹ Pero nos mester conclui for di esaki cu Hesus a lucha contra inhusticia den mundo en general? Tur rond di dje siguramente tabatin inhusticia. Su pais tabata ocupa pa un potencia stranhero. E Romanonan a oprimi e Hudiunan cu un presencia militar potente, a cobra nan belasting pisa y asta a interferi den nan custumbernan religioso. P’esei no ta un sorpresa cu hopi hende tabata kier pa Hesus drenta den e politica di su tempo. (Juan 6:14, 15) Un biaha mas Hesus mester a demostra curashi.

²⁰ Hesus a splica cu su Reino no tabata parti di mundo. Mediante su ehempel, el a entrena su siguidonan pa nan no mete den e peleanan politico di e tempo ei y pa nan enfoca mas bien riba e predicacion di e bon nobo di e Reino di Dios. (Juan 17:16; 18:36) El a siña nan un les impactante relaciona cu neutralidad ora cu e multitud violento a bin pa arest’e. Pedro a actua di biaha, y sin pensa el a zuai su spada y herida un homber. Ta facil pa aproba loke Pedro a haci. Si tin un dia mes cu violencia lo por a parce hustifica, lo tabata e anochi ei cu nan a ataca Dios su Yiu inocente. Sinembargo, Hesus na e momento ei a establece e norma pa su siguidonan terenal te cu awe: “Pone bo spada bek na su luga; pasobra tur esnan cu saca spada lo perece pa medio di spada.” (Mateo 26:51-54) Pa e siguidonan di Cristo por a mantene tal posicion pacifico, nan definitivamente tabatin mester di curashi e tempo ei, mescos cu ta e caso awe. Debi cu e pueblo di Dios djawe a tuma un posicion di neutralidad cristian, nan registro ta limpi y nunca nan a envolve nan mes den e cantidad sin fin di guera, holocausto, disturbio y actonan similar di violencia. E registro excelente ei ta un di e recompensanan pa nan curashi.

Cu Curashi El A Enfrenta Oposicion

21, 22. (a) Ki yudansa Hesus a haya prome cu el a enfrenta su prueba di mas dificil? (b) Con Hesus a demostra di tin curashi te na final?

²¹ Jehova su Yiu tabata sa di antemano cu lo el a enfrenta oposicion severo aki riba Tera. (Isaias 50:4-7) El a enfrenta hopi menasa di morto cu a culmina den esun describi na comienso di e capitulo aki. Con Hesus a mantene su curashi a pesar di tal peliger? Wel, kico Hesus tabata haci net prome cu e multitud violento a bin pa arest’e? E tabata haci oracion ferviente na Jehova. Anto kico Jehova a haci? Bijbel ta bisa nos cu Hesus “a wordo tendi.” (Hebreonan 5:7) Jehova a manda un angel for di shelo pa fortalece su Yiu balente.—Lucas 22:42, 43.

²² Un poco despues cu e angel a fortalec’e, Hesus a bisa su apostelnan: “Lanta, laga nos ban.” (Mateo 26:46) Pensa riba cuanto curashi tabatin tras di e palabranan ei. El a bisa: “Laga nos ban”, sabiendo cu e lo a pidi e multitud violento pa spar su amigonan, sabiendo cu tur e compañeronan ei lo a hui bai lag’e, y sabiendo cu ta e so lo a bai enfrenta e experencia di mas dificil di su bida. E tabata su so ora el a enfrenta un huicio ilegal y inhusto, tambe bofon, tortura y un morto agonisante. Atrabes di tur esei, su curashi ningun momento so no a lag’e na caya.

23. Splica dicon e manera cu Hesus a enfrenta peliger y menasa di morto no tabata un acto descabeya.

²³ Acaso Hesus su reaccion tabata un acto descabeya? No; ser descabeya no tin nada di aber cu berdadero curashi. De echo, Hesus a siña su siguidonan pa ta cauteloso, y aleha prudentemente for di peliger pa nan por sigui haci e boluntad di Dios. (Mateo 4:12; 10:16) Pero den e caso aki Hesus tabata sa cu no tabatin manera pa e kita for di einan. E tabata sa cu esaki tabatin di haci cu e boluntad di Dios. Hesus tabata determina pa mantene su integridad, pues e unico caminda tabata di sigui padilanti, y enfrenta e prueba di su fe directamente.

24. Dicon nos por ta sigur cu nos por tin curashi a pesar di cualkier prueba cu surgi?

²⁴ Hopi biaha siguidonan di Hesus a sigui cu curashi den e pasonan di nan Shon! Hopi di nan a para firme a pesar di bofon, persecucion, aresto, encarselacion, tortura y asta morto. Di unda hende imperfecto ta saca tal curashi? Esei no ta sali simplemente di nan mes. Mescos cu Hesus a haya yudansa djariba, asina tambe ta e caso cu su siguidonan. (Filipensenan 4:13, NW) Pues, nunca tene miedo di loke por bin den futuro. Sea determina pa mantene bo integridad, y Jehova lo duna bo e curashi cu bo tin mester. Sigui saca fortalesa for di e ehempel di nos Lider, Hesus, kende a bisa: “Tene curashi, mi a vence mundo.”—Juan 16:33.