Fraccion di Sanger y Procedura Durante Operacion

Fraccion di sanger. Dokternan ta saca esakinan for di e cuater componentenan principal di sanger: globulo cora, globulo blanco, plaketa y plasma. Por ehempel, for di globulo cora nan ta saca un fraccion di proteina cu yama hemoglobina. Cu e hemoglobina ey, sea di hende of di bestia, nan ta traha producto pa trata pashent cu tin anemia agudo of cu a perde hopi sanger.

Plasma ta consisti di 90 porciento di awa y ta contene cantidad di hormoon, salo inorganico, enzym y otro substancia nutritivo (voedingsstoffen) manera mineral y sucu. For di plasma nan ta saca fraccionnan cu ta pone sanger ­cuaha, anticurpa cu ta bringa contra maleza y proteina manera albumina. Ora un hende ser exponi na un cierto maleza, dokternan sa prescribi inyeccion di gammaglobulina, un fraccion cu nan ta extrae for di plasma di hende cu ta immuun caba. Anto for di globulo blanco nan ta saca fraccion di sanger manera interferon y interleukina, cu cua nan ta trata cierto tipo di cancer y infeccion di virus.

Cristiannan por acepta tratamento den cua ta uza fraccion di sanger? Bijbel no ta duna ningun instruccion specifico. Pues, ta keda na cada ken pa tuma su propio decision dilanti di Dios di acuerdo cu su consenshi. Tin cristian ta nenga tur fraccion di sanger, ya cu nan ta rasona cu segun e Ley cu Dios a duna Israel, hende mester a basha “riba suela” e sanger di bestia cu nan a mata. (Deuteronomio 12:​22-24) Pero otro cristiannan cu tambe ta nenga transfusion di sanger of di su componentenan principal kisas ta acepta si un tratamento cu ta uza cierto fraccion di sanger. Nan ta rasona cu dado momento bo no por bisa mas cu e fraccion cu nan a saca for di e sanger ta representa e bida di e criatura for di cua a sac’e.

Prome cu bo tuma un decision tocante fraccion di sanger, ta bon pa bo puntra bo mes: Mi ta realisa cu si mi rechasa tur fraccion di sanger, esey kiermen cu mi ta nenga tambe cierto remedi cu ta contene producto deriva di sanger cu nan ta uza pa combati maleza of pa para sangramento? Lo mi por splica un dokter dicon mi ta rechasa of dicon mi ta acepta e uzo di un of mas fraccion di sanger?

Procedura durante operacion. Esakinan ta inclui hemodilucion (hacimento di sanger delega) y recuperacion di globulo. Hemodilucion ta e proceso di desvia e sanger for di e curpa, reemplas’e cu un substancia cu ta aumenta e volumen di sanger y despues hinca e sanger bek den curpa di e pashent. E proceso di recuperacion di globulo ta tuma luga durante un operacion. Dokternan ta recobra e sanger cu e pashent a perde for di e herida of sanger cu a plama den su curpa y ta purific’e of filtr’e; despues nan ta debolbe e sanger ey na e pashent. Como cu cada dokter por uza un otro metodo pa aplica e tecnicanan aki, un cristian mester puntra su dokter kico e tin pensa di haci.

Na momento di tuma un decision tocante e proceduranan aki, puntra bo mes: ‘Si nan desvia parti di mi sanger for di mi curpa y e circulacion di sanger wordo interumpi pa un rato, mi consenshi educa pa Bijbel lo laga mi mira e sanger aki ainda como un parti di mi, y cu pesey lo no ta necesario pa “bash’e riba suela”? (Deuteronomio 12:​23, 24) Mi consenshi lo keda trankil si durante un procedura medico nan saca un parti di mi sanger, modific’e y despues hinc’e bek den mi curpa? Mi ta realisa cu si mi rechasa tur procedura medico cu ta uza mi propio sanger, esey kiermen cu mi ta nenga di haci test di sanger, di dialisa (spula nier) of di uza e mashin cu ta reemplasa e curason y e pulmonnan durante operacion?’

Cada cristian mes mester dicidi kico e ta permiti dokternan haci cu su sanger durante un operacion. Esey ta conta tambe pa test medico y tratamento cu ta encera saca un tiki di bo mes sanger, kisas modific’e y despues inyect’e bek den bo curpa.