Den nos organisacion, no tin clero cu ta cobra salario. Mescos cu tabata e caso tempo e congregacion cristian a cuminsa, awe tambe superintendentenan, of ancianonan, cualifica ta ser nombra “pa pastorea e congregacion di Dios.” (Echonan 20:28) Ancianonan ta ruman hombernan spiritualmente maduro cu ta dirigi y pastorea e congregacion cristian, “no obliga, sino di buena gana; no pa amor pa ganashi deshonesto, sino cu entusiasmo.” (1 Pedro 5:1-3) Ki sirbishi nan ta rindi na nos bienestar?

Nan ta cuida y proteha nos. Ancianonan ta guia e congregacion cristian y ta yuda proteh’e den sentido spiritual. Nan ta consciente cu ta Dios a confia nan cu e tarea importante aki. Pesey, nan no ta manda riba e pueblo di Dios; mas bien, nan ta contribui na nos bienestar y goso. (2 Corintionan 1:24) Mescos cu un wardador di carne ta cuida cada un di su carnenan, asina tambe ancianonan ta haci esfuerso pa siña conoce y mustra interes den cada un di e miembronan di congregacion.—Proverbionan 27:23.

Nan ta siña nos con pa haci e boluntad di Dios. Tur siman, ancianonan ta dirigi e reunionnan di congregacion pa asina fortalece nos fe. (Echonan 15:32) Ademas, e rumannan dedica aki ta dirigi e actividad di predica, ta traha hunto cu nos y ta entrena nos den tur aspecto di sirbishi.

Nan ta duna nos animacion personal. Pa e ancianonan di nos congregacion por duna cada un di nos e yudansa spiritual y e consuelo cu nos tin mester for di e Palabra di Dios, nan ta bishita nos na nos cas of ta papia cu nos na Salon di Reino.—Santiago 5:14, 15.

Banda di nan trabou den congregacion, mayoria di anciano tin tambe nan trabou y responsabilidadnan di famia cu ta exigi tempo y atencion di nan. E ruman hombernan diligente aki merece nos respet.—1 Tesalonicensenan 5:12, 13.

• Kico ta tarea di un anciano di congregacion?

• Con ancianonan ta mustra interes personal den nos?

Bijbel ta papia di dos grupo di homber cristian cu ta percura pa e responsabilidadnan di congregacion: superintendente y sirbidor ministerial. (Filipensenan 1:1) Generalmente, den cada congregacion tin anciano y sirbidor ministerial. Ki trabou sirbidornan ministerial ta haci pa nos bienestar?

Nan ta yuda e cuerpo di anciano. Sirbidornan ministerial ta ruman hombernan spiritualmente fuerte, confiabel y diligente. Algun di nan ta jong; otronan tin mas edad. Nan ta haci diferente tarea importante di caracter administrativo y organisatorio cu tin di haber cu e congregacion. Esaki ta permiti ancianonan enfoca riba nan responsabilidad di siña y pastorea e congregacion.

Nan ta duna yudansa practico. Algun sirbidor ministerial tin e tarea di yama tur hende cu asisti na reunion bonbini. Otronan ta atende cu ekipo di zonido, literatura, cuenta di congregacion y teritorio pa predica. Nan ta yuda tambe den mantencion di e Salon di Reino. Ademas, ancianonan por pidi nan pa yuda rumannan di edad. Sirbidornan ministerial ta dispuesto pa haci tur tarea cu nan ricibi, y e congregacion ta respeta nan pa nan trabou diligente y nan bon actitud.—1 Timoteo 3:13.

Nan ta pone bon ehempel como hombernan cristian. Ta nombra ruman homber como sirbidor ministerial a base di nan bon cualidadnan cristian. Nan partinan na reunion ta fortalece nos fe. E manera cu nan ta guia nos den sirbishi di veld ta duna nos mas entusiasmo. Y e echo cu nan ta cla pa coopera cu e cuerpo di anciano ta promove goso y union. (Efesionan 4:16) Cu tempo, nan tambe por cualifica pa sirbi como anciano.

• Ki sorto di ruman homber sirbidornan ministerial ta?

• Con e sirbidornan ta yuda pa cosnan cana bon den congregacion?

E Scritura Griego Cristian ta menciona Barnabas y apostel Pablo varios bes. E dos hombernan aki tabata sirbi como superintendente biahero cu tabata bishita e congregacionnan di prome siglo. Pa ki motibo? Nan tabatin e bienestar di nan rumannan spiritual na pecho. Pablo a bisa cu e kier a “bay bek” pa “bishita e rumannan” pa wak con a sigui cu nan. E tabata dispuesto pa biaha cientos di kilometer pa e por a bay fortalece nan. (Echonan 15:36) Awe, nos superintendentenan biahero tin e mesun deseo.

Nan ta bin pa anima nos. Cada superintendente di circuito ta bishita e congregacionnan dos biaha pa aña; nan ta dedica un siman na cada congregacion. Nos por siña hopi for di e rumannan aki y, si nan ta casa, di nan esposa tambe. Nan ta haci esfuerso pa conoce tanto mucha como hende grandi, y cu entusiasmo nan ta compaña nos den sirbishi y na estudionan di Bijbel. E superintendentenan aki ta haci bishita di pastoreo cu e ancianonan. Anto e discursonan cu nan ta duna na reunion- y asambleanan ta anima y fortalece nos.—Echonan 15:35.

Nan ta mustra interes den nos tur. Superintendentenan di circuito ta masha interesa den e condicion spiritual di e congregacionnan. Nan ta reuni cu e anciano- y sirbidornan ministerial pa analisa den ki area e congregacion a progresa y pa duna nan conseho practico cu por yuda nan cumpli cu nan responsabilidadnan. Nan ta siña e pioneronan con nan por haya bon resultado den sirbishi. Ademas, nan ta keda contento pa cera conoci cu personanan cu a cuminsa asisti na reunion y pa tende di nan progreso spiritual. Cada un di e superintendentenan aki ta duna di nan mes boluntariamente como “colaborador” cu “ta sirbi na [nos] interes.” (2 Corintionan 8:23) Nos mester imita nan fe y nan devocion na Dios.—Hebreonan 13:7.

• Cu ki meta superintendentenan di circuito ta bishita e congregacionnan?

• Con bo por beneficia di nan bishita?

Ora un desaster tuma luga, mesora testigonan di Jehova ta dal paso pa yuda nan rumannan cu keda afecta. Tal esfuersonan ta demostra e berdadero amor cu nos tin pa otro. (Juan 13:34, 35; 1 Juan 3:17, 18) Den ki manera nos ta yuda?

Nos ta duna yudansa financiero. Den prome siglo, ora hamber severo a asota Judea, e cristiannan na Antiokia a manda placa pa yuda nan rumannan den fe. (Echonan 11:27-30) Awe tambe, asina cu nos haya sa cu nos rumannan na cierto parti di mundo ta den dificultad, nos ta manda donacion via nos congregacion pa duna yudansa material na esnan cu ta den gran necesidad.—2 Corintionan 8:13-15.

Nos ta duna yudansa practico. Ancianonan cu ta na e luga di desaster ta haci esfuerso pa localisa cada miembro di nan congregacion y ta haci sigur cu nan ta sano y salvo. Un comite di yudansa ta coordina suministro di cuminda, awa di bebe y paña y ta percura tambe pa alohamento y yudansa medico. Hopi Testigo cu tin cierto ofishi ta bay yuda boluntariamente riba nan propio gasto. Nan ta duna un man den e trabounan di auxilio of ta yuda drecha casnan y Salonnan di Reino cu a sufri daño. E union cu tin den nos organisacion y e experencia cu nos a gana trahando como team ta permiti nos mobilisa lihe ora mester duna yudansa. Aunke nos meta ta pa yuda “nos rumannan den fe”, ora ta posibel, nos ta yuda otro hende tambe sin importa di cua religion nan ta.—Galationan 6:10.

Nos ta duna consuelo for di e Scritura y sosten emocional. Loke victimanan di desaster tin mas mester di dje ta consuelo. Den situacionnan asina, nos ta haya fortaleza for di Jehova, e “Dios di tur consuelo.” (2 Corintionan 1:3, 4) Pesey, gustosamente nos ta comparti e promesanan di Bijbel cu hende cu ta den angustia. Nos ta duna nan e siguransa cu pronto e Reino di Dios lo pone un fin na tur tragedia cu ta causa dolor y sufrimento.—Revelacion 21:4.

• Kico ta permiti Testigonan mobilisa mesora pa yuda na momento di desaster?

• Ki consuelo for di e Scritura nos por duna sobrevivientenan?

Poco prome cu Hesus su morto, e tabatin un combersacion cu cuater di su discipelnan—Pedro, Santiago, Juan y Andres. Ora e tabata papia di e señal di su presencia den e ultimo dianan, el a haci nan un pregunta masha importante: “Ken realmente ta e esclavo fiel y prudente cu su Doño a nombra riba su sirbidornan di cas pa duna nan nan cuminda na e debido tempo?” (Mateo 24:3, 45; Marco 13:3, 4) Hesus a duna su discipelnan e siguransa cu e, como nan “Doño”, lo a nombra un grupo di hende cu constantemente lo a percura cuminda spiritual pa su siguidornan durante e tempo di fin. Ken lo a forma e esclavo aki?

Un grupo chikito di siguidornan ungi di Hesus. E “esclavo” ta e Cuerpo Gobernante di testigonan di Jehova. E ta percura cuminda spiritual na ora pa e pueblo di Jehova. Nos ta depende di e esclavo fiel aki pa sigui haya “suficiente cuminda na e debido tempo.”—Lucas 12:42.

E esclavo aki ta maneha e cas di Dios. (1 Timoteo 3:15) Hesus a duna e esclavo aki e gran responsabilidad di maneha Jehova su organisacion riba Tera. Esey ta encera cuida e propiedadnan material di e organisacion, dirigi e actividad di predica y siña nos pa medio di nos congregacionnan. Pa “e esclavo fiel y prudente” por duna nos e cuminda spiritual cu nos tin mester, na e ora cu nos tin mester di dje, e ta provee esaki pa medio di nos publicacionnan y tambe pa medio di e programanan cu nos ta haya na nos reunionnan y asambleanan.

E esclavo aki ta fiel na e berdadnan di Bijbel y na e encargo cu el a haya pa predica e bon noticia. Y e ta prudente den e manera sabi cu e ta cuida e interesnan di Cristo riba Tera. (Echonan 10:42) Jehova ta bendiciona e esfuersonan di e esclavo aki. Con asina? Cu aumento y tambe cu abundancia di cuminda spiritual.—Isaias 60:22; 65:13.

• Ken Hesus a nombra pa alimenta su discipelnan spiritualmente?

• Den ki sentido e esclavo ta fiel y prudente?

Den prome siglo, un grupo chikito cu a consisti di “e apostelnan y e ancianonan na Jerusalem” a fungi como cuerpo gobernante, esta, un directiva cu a tuma decisionnan importante na interes di henter e congregacion di cristian ungi. (Echonan 15:2) Pa nan por a yega na un decision unanime, nan mester a analisa loke e Scritura ta bisa y sigui guia di spirito santo. (Echonan 15:25) Awe ta mescos.

Dios ta uza e Cuerpo Gobernante pa haci su boluntad. E ruman hombernan ungi cu ta forma parti di e Cuerpo Gobernante tin gran interes den e Palabra di Dios. Ademas, nan tin hopi experencia riba e tereno di organisa e trabou di predica y den trata asuntonan spiritual. Tur siman, nan ta reuni pa trata e necesidadnan di e hermandad mundial. Mescos cu den prome siglo, nan ta duna instruccion basa riba Bijbel via carta, superintendente biahero y otro medionan. Esaki ta pa yuda e pueblo di Dios pensa y actua na un manera uni. (Echonan 16:4, 5) E Cuerpo Gobernante ta supervisa preparacion di cuminda spiritual, ta anima tur ruman pa duna prioridad na e trabou di predica e Reino y ta supervisa nombramento di ruman homber pa puesto di responsabilidad.

E ta sigui guia di spirito santo. E Cuerpo Gobernante ta sigui e guia di Jehova, e Soberano di Universo, y Hesus, Cabes di e congregacion cristian. (1 Corintionan 11:3; Efesionan 5:23) Miembronan di e cuerpo aki no ta considera nan mes lider di e pueblo di Dios. Al contrario, mescos cu tur otro cristian ungi, nan ta “sigui e Lamchi [Hesus] unda cu e bay.” (Revelacion 14:4) E Cuerpo Gobernante ta echt aprecia e oracionnan cu nos ta haci pa nan y pa nan trabou.

• Ken a forma parti di e cuerpo gobernante di prome siglo?

• Con e Cuerpo Gobernante di awe ta busca e guia di Dios?

Betel ta un nomber Hebreo cu ta nifica “Cas di Dios.” (Genesis 28:17, 19) E ta un nomber apropia pa e complehonan cu testigonan di Jehova tin rond mundo for di unda nan ta dirigi y sostene e trabou di predica. E Cuerpo Gobernante ta sirbi na e sede mundial cu ta keda den e Estado di New York, Merca. For di eynan, e directiva aki ta supervisa actividad di e sucursalnan cu tin den varios pais. E rumannan cu ta sirbi na e complehonan aki ta manera un famia, e asina yama famia di Betel. Manera un famia uni, nan ta biba y traha hunto; nan ta come hunto y studia Bijbel hunto.—Salmo 133:1.

Un luga unico caminda miembronan di e famia ta duna di nan mes. Na tur Betel, tin homber- y muhernan cristian cu a dedica nan mes pa haci e boluntad di Dios y pa sirbi interesnan di Reino full-time. (Mateo 6:33) Niun di nan no ta haya salario, pero nan ta haya un luga di biba, cuminda y zakgeld pa yuda nan cu nan gastonan personal. Tur e rumannan cu ta sirbi na Betel tin un asignacion, sea nan ta traha den oficina, cushina of comedor. Algun ta sirbi den e departamento di imprimi y encuaderna literatura, den departamento di limpieza of di mantencion, den laundry of otro departamento.

Un luga yen di actividad cu ta apoya e trabou di predica e Reino. E meta principal di cada Betel ta pa yuda mas tanto hende posibel conoce e berdadnan di Bijbel. E foyeto aki mes ta un bon ehempel di esey: A skirbie bou di supervision di e Cuerpo Gobernante. Despues, a mand’e electronicamente na cientos di team di traduccion rond mundo, pa despues imprimie via mashinnan di velocidad halto na diferente drukkerij di Betel. Finalmente, a mand’e na e mas cu 110.000 congregacionnan. Durante cada fase di e proceso, famianan di Betel ta duna nan apoyo indispensabel na e tarea di mas urgente cu nos tin awe, esta, di predica e bon noticia.—Marco 13:10.

• Ken ta sirbi na Betel, y con nos organisacion ta percura pa nan?

• Ki trabou urgente tur Betel ta apoya?

Miembronan di e famia di Betel ta sirbi den diferente departamento, sosteniendo asina e trabou di predica den un of varios pais. Nan ta traha den team di traduccion, ta imprimi revista, encuaderna buki, distribui literatura, produci material audio of video, of atende otro asuntonan di e teritorio cu nan ta sirbi.

E Comite di Sucursal ta supervisa diferente actividad. E Cuerpo Gobernante ta nombra na cada sucursal tres of mas anciano cualifica pa sirbi como Comite di Sucursal. E comite aki ta responsabel pa e bon funcionamento di nan sucursal. Nan mester tene e Cuerpo Gobernante na altura di e progreso di e trabou di predica y di cualkier problema cu por surgi den nan pais of den e paisnan cu ta forma parti di e teritorio cu nan ta supervisa. E informenan aki ta yuda e Cuerpo Gobernante dicidi ki topico ta bon pa trata den futuro publicacionnan y tambe na reunion- y asambleanan. Regularmente e Cuerpo Gobernante ta manda su representante pa bishita e sucursalnan y duna e Comitenan di Sucursal e guia necesario pa nan por cumpli cu nan tareanan. (Proverbionan 11:14) Como parti di un programa special, e representante di e oficina principal ta duna un discurso pa anima e hendenan cu ta biba den e teritorio di e sucursal.

E ta duna yudansa na e congregacionnan local. Na sucursal, ruman hombernan responsabel ta aproba formacion di congregacion nobo. Nan ta dirigi actividad di pionero, misionero y superintendente di circuito cu ta sirbi den e teritorio di e sucursal. Ademas, e comite ta organisa asamblea y congreso, coordina e trabou di construccion di Salon di Reino nobo y percura pa cada congregacion haya literatura cu nan mester. Tur loke ta tuma luga na un sucursal ta pa yuda cumpli cu e meta di predica e bon noticia na un manera ordena.—1 Corintionan 14:33, 40.

• Con un Comite di Sucursal ta yuda e Cuerpo Gobernante?

• Kico ta e responsabilidadnan di un sucursal?

Como parti di nos esfuerso pa declara e “bon noticia ... na tur nacion, tribu, idioma y pueblo”, nos ta produci literatura den mas cu 750 idioma. (Revelacion 14:6) Con nos ta logra cumpli cu e reto grandi aki? Nos ta haci esaki cu yudansa di un team internacional di escritor y un grupo grandi di traductor cu ta haci sacrificio propio. Tur ta testigo di Jehova.

Ta prepara e texto original na Ingles. E Cuerpo Gobernante ta supervisa e trabou di e Departamento di Redaccion na nos sede mundial. E Departamento di Redaccion ta coordina e labornan di e escritornan cu ta sirbi na e sede mundial y na algun sucursal. E echo cu e escritornan aki ta di diferente pais y di diferente cultura ta permiti nan skirbi riba un variedad amplio di topico. Pesey, hende di tur parti di mundo ta gusta nos publicacionnan.

Ta manda e texto pa e traductornan. Despues cu a revisa y aproba e articulonan, ta manda esakinan electronicamente pa e teamnan di traductor rond mundo, cu ta traduci, revisa y corigi e texto. Nan ta haci esfuerso pa scoge e “palabranan di berdad ... corecto” pa traduci e idea Ingles lo mihor posibel den nan mes idioma.—Eclesiastes 12:10.

Computer ta yuda acelera e proceso. Computer no por reemplasa escritor ni traductor humano. Sinembargo, e trabou por bay mas rapido cu yudansa di programanan di computer manera diccionario, spell-check y material di investigacion electronico. Testigonan di Jehova a diseña un sistema cu ta permiti nan type texto den cientos di idioma, combina texto cu plachi y prepara documentonan pa imprimi. Nan ta yama e programa aki MEPS (Sistema Electronico Multilingual pa Produci Publicacion).

Dicon nos ta haci tur e esfuersonan aki y ta traduci hasta den idiomanan cu un par di mil hende so ta papia? Pasobra e boluntad di Jehova ta “pa tur sorto di hende ser salba y yega na un conocemento exacto di e berdad.”—1 Timoteo 2:3, 4.

• Con nos ta prepara nos publicacionnan?

• Dicon nos ta traduci nos literatura den asina tanto idioma?

Tur aña, nos organisacion ta publica y distribui miyones y miyones di Bijbel y otro publicacion sin cobra pa nan. Nos ta construi y mantene tur nos Salonnan di Reino y sucursalnan. Nos ta percura pa miles di betelita y misionero, y nos ta duna yudansa na momento di calamidad. Kisas bo ta puntra bo mes: Di unda e fondo pa haci tur e cosnan aki ta bin?

Nos no ta pidi diesmo ni cobra miembresia ni pasa collect. Aunke e gastonan pa cumpli cu e trabou di predica ta halto, nos no ta cana pidi placa. Mas cu un siglo pasa, e di dos edicion di E Toren di Vigilancia, na Ingles, a bisa cu nos ta convenci cu Jehova ta sostene nos y cu “hamas nos lo roga of pidi hende sosten”—y nunca nos no a yega di haci esey.—Mateo 10:8.

Tur loke nos ta haci ta pa medio di donacion. Hopi hende ta aprecia nos obra di educacion biblico y ta haci donacion pa sostene esaki. Nos mes tambe ta contento di por duna di nos tempo, energia, placa y otro recursonan pa e boluntad di Dios cumpli den henter e Tera. (1 Cronicanan 29:9) Na Salon di Reino y na nos asamblea y congreso, tin caha di contribucion, den cua ken cu ta desea por tira nan donacion. Ademas, por haci donacion via nos website jw.org. Mayoria di donacion ta bin di hende di menos recurso. Nan ta manera e viuda den necesidad cu Hesus a papia asina bon di dje, pasobra, aunke ta dos cen preto so e por a tira, el a duna di curason. (Lucas 21:1-4) Pues, tur hende por crea e custumber di “pone algo un banda” pa duna loke el a “dicidi den su curason.”—1 Corintionan 16:2; 2 Corintionan 9:7.

Nos ta convenci cu Jehova lo sigui motiva curason di hende cu kier honr’e “cu [nan] cosnan valioso”, sosteniendo asina e obra di Reino pa Su boluntad cumpli.—Proverbionan 3:9, NW.

• Kico ta haci nos organisacion diferente for di otro religion?

• Con nos ta uza e contribucionnan boluntario cu nos ta ricibi?

Manera e nomber Salon di Reino mes ta indica, e siñansa di Bijbel cu nos ta haya eynan ta enfoca principalmente riba e Reino di Dios, e tema di Hesus su ministerio.—Lucas 8:1.

Nan ta centro di adoracion berdadero den comunidad. For di Salon di Reino, nos ta sali pa bay predica e bon noticia di Reino. (Mateo 24:14) Aunke e Salonnan di Reino ta varia di tamaño y diseño, tur ta luganan simpel caminda por lo general mas cu un congregacion ta reuni. Den e ultimo añanan, nos a construi miles di Salon di Reino (un promedio di cinco pa dia). Esaki ta debi na e aumento cu ta tumando luga den e congregacionnan. Con bin nos por construi asina tanto Salon di Reino?—Mateo 19:26.

Ta construi nan cu donacionnan cu nos ta haya. Ta manda e donacionnan aki sucursal pa asina congregacionnan cu mester construi of renoba nan Salon di Reino por haci esaki cu yudansa di e fondo aki.

Ta construi nan cu yudansa di boluntarionan for di tur gremio. Den hopi pais a forma Gruponan di Construccion di Salon di Reino. Team di sirbidor y di boluntario pa e trabou di construccion ta bay di un congregacion pa otro den un pais, hasta areanan aisla, pa yuda e congregacionnan local construi nan Salon di Reino. Den otro pais, Testigonan cualifica ta ser nombra pa supervisa construccion y renobacion di Salon di Reino den un cierto region. Hopi ruman cu cierto experticio y cu ta biba den e region ta ofrece nan mes pa yuda den e trabou di construccion. Pero, mayoria di e boluntarionan cu ta bin yuda ta di e congregacion local. Tur e trabounan aki ta posibel cu yudansa di spirito santo y e esfuerso cu sirbidornan di Jehova ta haci di henter nan alma.—Salmo 127:1; Colosensenan 3:23.

• Dicon nos ta yama nos luganan di adoracion Salon di Reino?

• Con nos ta logra construi Salon di Reino rond mundo?

Tur Salon di Reino di testigonan di Jehova ta carga e nomber santo di Dios. Pesey, ta un honor pa nos yuda mantene e edificio limpi, presentabel y den bon condicion. Esey ta un parti importante di nos sirbishi sagrado, y nos tur por yuda den esaki.

Ofrece pa yuda haci limpieza despues di reunion. Despues di cada reunion, tanto ruman homber como ruman muher ta cla pa yuda haci e Salon di Reino limpi. Un bes pa siman, nan ta haci un limpieza mas a fondo. Un anciano of sirbidor ministerial ta coordina e trabou, uzando un lista di cosnan cu mester haci. Depende kico mester haci, rumannan ta ofrece pa bari, mop of stofzuig e vloer, stofia e luga, pone e stoelnan na ordo, limpia y desinfecta baño, limpia spiel, benta e saconan di sushi afo, haci e bentananan y parti pafo di Salon di Reino limpi y tene e cura limpi. Por lo menos un biaha pa aña ta scoge un dia pa haci un limpieza general. Ora nos ta anima nos yiunan pa yuda cu cierto trabou di limpieza, nos ta siña nan mustra respet pa nos luga di adoracion.—Eclesiastes 5:1.

Yuda den e trabounan di mantencion. Tur aña, nos ta inspecciona e Salon di Reino tanto paden como pafo. A base di e inspeccion aki por mira ki programa di mantencion tin cu implementa pa e edificio keda den bon condicion y asina yuda evita gasto innecesario. (2 Cronicanan 24:13; 34:10) Un Salon di Reino limpi y bon manteni ta un luga digno pa adora nos Dios. Ora nos ta yuda mantene nos Salon di Reino, nos ta demostra cuanto nos ta stima Jehova y balora nos luga di adoracion. (Salmo 122:1) Ademas, esaki ta duna un bon impresion den comunidad.—2 Corintionan 6:3.

• Dicon nos no mester neglisha nos luga di adoracion?

• Ki areglo tin pa mantene nos Salon di Reino limpi?

Bo ta desea di haci algun investigacion pa bo haya mas conocemento di Bijbel? Bo kier sa mas di un cierto texto biblico of di un persona, luga of cos menciona den Bijbel? Bo ta puntra bo mes si e Palabra di Dios por yuda bo cu un preocupacion cu bo tin? Si esey ta e caso, sinti bo liber pa haci uzo di e bibliotheek di Salon di Reino.

Ey bo por haya material pa haci investigacion. Probablemente, bo no tin tur e publicacionnan biblico di testigonan di Jehova cu ta disponibel den bo idioma. Pero e bibliotheek na Salon di Reino si tin mayoria di e ultimo publicacionnan. Kisas e tin tambe un variedad di traduccion di Bijbel, un bon diccionario y otro literatura di consulta. Sinti bo liber pa haci uzo di esakinan sea prome of despues di reunion. Si tin un computer den e bibliotheek, kisas e tin e Watchtower Library instala riba dje. Esaki ta un programa cu ta contene un gran cantidad di nos publicacionnan y un sistema facil di busca informacion cu ta yuda bo haya un tema, palabra of texto di Bijbel.

E ta util pa studiantenan di e Reunion Nos Bida y Sirbishi Cristian. Bo por haci bon uzo di e bibliotheek di Salon di Reino ora bo tin cu prepara parti. E ruman encarga cu e bibliotheek ta e superintendente di e Reunion Nos Bida y Sirbishi Cristian. E tin cu percura pa e bibliotheek tin e ultimo publicacionnan y pa nan ta debidamente ordena. Sea e of e Testigo cu ta studia Bijbel cu bo por mustra bo con pa busca e informacion cu bo tin mester. Tene cuenta si cu no tin mag di bay cu niun di e bukinan di bibliotheek. Y ta mas cu claro cu nos lo kier cuida e bukinan y no marca nada den nan.

Bijbel ta splica cu, pa haya “e conocemento di Dios”, nos mester haci esfuerso pa busc’e “manera tesoro scondi.” (Proverbionan 2:1-5) E bibliotheek di Salon di Reino por yuda bo den bo buskeda.

• Ki medio pa haci investigacion tin den e bibliotheek di Salon di Reino?

• Ken por yuda bo haci bon uzo di e bibliotheek?

Hesucristo a bisa su siguidornan: “Laga boso luz briya dilanti di hende, pa asina nan por mira boso obranan excelente y duna gloria na boso Tata cu ta den cielo.” (Mateo 5:16) Cu e palabranan aki na mente, nos ta haci bon uzo di tecnologia moderno, incluso Internet. Nos website jw.org ta e fuente oficial di informacion online tocante nos creencia- y actividadnan. Kico tin riba e website aki?

Contesta di Bijbel pa preguntanan cu hende sa haci. Bo por haya contesta pa algun di e preguntanan di mas importante cu hende a yega di haci. Por ehempel, e tratado Sufrimento Lo Caba Algun Dia? y Di Berdad Hende Morto Por Bolbe Biba? ta disponibel online na mas cu 600 idioma. Ademas, bo por haya e New World Translation den mas cu 130 idioma y varios material di estudio biblico, incluso e buki Kico Bijbel Ta Siña Realmente? y e edicionnan mas recien di E Toren di Vigilancia y Spierta! Bo por lesa of scucha hopi di e publicacionnan aki online. Bo por download nan den formanan bon conoci manera MP3, PDF of EPUB. Bo por hasta print un par di pagina y duna un persona interesa pa e lesa den su mes idioma. Ademas, tin varios publicacion den forma di video disponibel den un cantidad di idioma di seña. Bo por download partinan di Bijbel lesa den forma dramatisa, drama basa riba Bijbel y tambe musica agradabel pa bo disfruta di dje ora bo ta desea.

Informacion tocante testigonan di Jehova. Riba nos website (of pagina web), bo ta haya tambe e ultimo noticianan, incluso videoclip, tocante nos obra mundial, sucesonan cu ta envolve testigonan di Jehova y informe tocante nos esfuersonan pa duna yudansa humanitario. Bo por haya informacion tambe tocante nos binidero congresonan y con pa tuma contacto cu nos sucursalnan.

Cu e medio aki, nos ta laga e luz di e berdad briya te na e partinan mas leu di Tera. Hende di tur continente ta beneficia di dje, hasta hende na Antartica. Nos ta pidi den oracion “pa e palabra di Jehova por sigui plama rapidamente” den henter mundo, pa e gloria di Dios.—2 Tesalonicensenan 3:1.

• Con e website jw.org ta yuda mas hende siña e berdad di Bijbel?

• Kico bo tin gana di busca riba nos website?