LES 18
Con Bo Por Sa Ken Ta e Cristiannan Berdadero?
Miles di miyones di hende ta bisa cu nan ta cristian, pero no ta nan tur tin e mesun creencianan ni e mesun norma- y balornan. Pues, con nos por sa ken ta e cristiannan berdadero?
1. Kico ta un cristian?
Un cristian ta un discipel of siguidor di Hesucristo. (Lesa Echonan 11:26.) Con un persona por demostra cu e ta un discipel di Hesus? Hesus a bisa: “Si boso keda fiel na mi palabranan, boso realmente ta mi discipelnan.” (Juan 8:31) Esaki ta nifica cu un cristian berdadero mester obedece e siñansanan di Hesus. Hesus semper a siña hende for di e Scritura. Mescos cu Hesus, e cristiannan berdadero ta uza Bijbel pa siña hende.—Lesa Lucas 24:27.
2. Con cristian berdadero ta mustra amor na otro?
Hesus a bisa su siguidornan: “Stima otro mescos cu ami a stima boso.” (Juan 15:12) Con Hesus a mustra su discipelnan cu e tabata stima nan? El a pasa tempo cu nan, anima nan y yuda nan. Su amor pa nan a bay asina leu cu hasta el a entrega su bida pa nan. (1 Juan 3:16) Mescos cu Hesus, cristian berdadero no ta djis siña hende tocante amor; nan ta demostra amor na otro pa medio di echo y palabra.
3. Ki trabou importante cristian berdadero tin?
Hesus a duna su discipelnan un trabou importante. “El a manda nan bay predica e Reino di Dios.” (Lucas 9:2) E prome cristiannan a predica no solamente na nan luganan di adoracion, sino tambe na luga publico y na cas di hende. (Lesa Echonan 5:42 y 17:17.) Di mes manera, awe, cristian berdadero ta predica na tur hende cu nan topa. Nan ta stima hende. Pesey, nan ta gusta uza nan tempo y energia pa laga hende sa, mediante Bijbel, ki speransa y consuelo Dios ta duna.—Marco 12:31.
KICO MAS NOS POR SIÑA?
Laga nos wak kico ta e diferencianan entre cristian berdadero y hende cu no ta sigui Hesus su ehempel y siñansanan.
4. Nan ta interesa pa sa kico Bijbel ta siña realmente
E prome cristiannan tabata balora e Palabra di Dios
No ta tur hende cu ta bisa cu nan ta cristian kier haya sa e berdadnan di Bijbel of biba di acuerdo cu nan. Pasa e VIDEO. Despues, analisa e siguiente pregunta:
Kico algun iglesia cu ta yama nan mes cristian a haci pa hende no haya sa loke Hesus a siña hende?
Hesus a siña hende e berdadnan cu tin den Bijbel. Lesa Juan 18:37. Despues, analisa e siguiente pregunta:
Segun Hesus, con nos por sa kendenan ta e cristiannan cu ta “na banda di e berdad”?
5. Nan ta papia tocante e berdadnan di Bijbel cu otro hende
E prome cristiannan tabata predica na otro hende
Prome cu Hesus a bay cielo, el a duna su siguidornan un trabou importante, y te ainda e trabou ey ta tumando luga. Lesa Mateo 28:19, 20 y Echonan 1:8. Despues, analisa e siguiente pregunta:
Te na ki tempo y te na unda e siguidornan di Hesus lo mester predica?
6. Nan ta biba di acuerdo cu loke nan ta siña otro hende
Kico a convence un homber cu yama Tom cu el a topa cu e hendenan cu di berdad ta sigui Hesus? Pasa e VIDEO. Despues, analisa e siguiente preguntanan:
Segun e video, kico a pone Tom bira disgusta cu religion?
Kico a convence Tom cu el a haya e hendenan cu di berdad ta sigui Hesus?
Loke un hende ta haci ta mas importante cu loke e ta bisa. Ademas, loke e ta haci ta revela ki sorto di persona e ta. Lesa Mateo 7:21. Despues, analisa e siguiente pregunta:
Kico Hesus ta haya mas importante, cu nos ta bisa cu nos ta kere den dje of cu nos ta demostra esey pa medio di nos accionnan?
7. Nan ta stima otro
E prome cristiannan tabata stima otro
Ta berdad cu tin cristian a yega di risca nan bida pa otro cristian? Pasa e VIDEO. Despues, analisa e siguiente preguntanan:
Den e video, kico a motiva Ruman Lloyd pa risca su bida pa Ruman Johansson?
Bo ta kere cu loke Ruman Lloyd a haci ta algo cu un cristian berdadero lo haci?
Lesa Juan 13:34, 35. Despues, analisa e siguiente preguntanan:
Con e discipelnan di Hesus (e cristiannan berdadero) lo a trata hende di otro nacion of rasa?
Durante guera, kico amor lo motiva e cristiannan berdadero pa haci?
LOKE HENDE SA BISA: “No ta importa na ki religion bo ta pertenece; nos tur ta sirbi e mesun Dios.”
Ki texto bo por uza pa yuda un persona identifica e berdadero sirbidornan di Dios?
RESUMEN
Cristian berdadero ta obedece loke Bijbel ta bisa. Ademas, nan ta dispuesto pa haci sacrificio pa otro cristian pasobra nan ta stima otro. Anto nan ta papia tocante e berdadnan di Bijbel cu otro hende.
Repaso
Riba kico e cristiannan berdadero ta basa nan creencianan?
Cua cualidad ta identifica e cristiannan berdadero?
Ki trabou e cristiannan berdadero ta haci?
MAS INFORMACION INTERESANTE
Haya sa mas tocante un grupo di persona cu ta haci esfuerso pa sigui e ehempel di Hesus y ta biba segun su siñansanan.
Wak kico a yuda un soeur bira parti di “un berdadero hermandad mundial.”
“Nan A Uza Bijbel pa Contesta Tur Mi Preguntanan” (E Toren di Vigilancia di 1 di april 2014)
Wak con cristian berdadero ta mustra amor na nan rumannan cu tin mester di yudansa.
Ayudamos a nuestros hermanos cuando se produce un desastre—Fragmento (3:57)
Wak con e cristiannan berdadero di awe ta imita e prome cristiannan. Ademas, wak con loke nan ta haci ta exactamente loke Hesus a bisa cu lo identifica e cristiannan berdadero.
“Kico Ta Identifica e Cristiannan Berdadero?” (E Toren di Vigilancia di 1 di mei 2012)