LES 58

Keda Leal na Jehova

Edicion Imprimi

Cristian berdadero ta determina pa no laga nada ni ningun hende stroba nan di adora Jehova. Nos tin sigur cu bo tambe ta determina pa haci mescos. Jehova sigur ta contento cu bo ta leal na dje. (Lesa 1 Cronicanan 28:9.) Den ki situacion por ta dificil pa keda leal na Jehova? Kico por yuda bo trata cu e situacionnan ey?

1. Con otro hende por purba di stroba nos di keda leal na Jehova?

Tin hende ta haci cos pa purba di stop nos di sirbi Jehova. Ken asina lo purba di haci esey? Por ehempel, hende cu a stop di sirbi Jehova y cu awor ta plama mentira tocante e organisacion di Jehova pa nos perde fe. E hendenan aki ta ser yama apostata. Ademas, algun lider religioso ta plama mentira tocante nos pasobra nan kier pone e rumannan cu no ta cauteloso bay tras di e mentiranan aki y stop di sirbi Jehova. Ta peligroso pa nos papia cu nos opositornan, pa lesa nan bukinan y loke nan ta skirbi riba nan websitenan of pa wak nan videonan. Hesus a bisa lo siguiente tocante hende cu kier stroba otro hende di sirbi Jehova lealmente: “Laga nan. Ta guia ciego nan ta. Y si un ciego guia un ciego, tur dos ta cay den buraco.”—Mateo 15:14.

2. Con nos decisionnan ta mustra cu nos ta leal na Jehova?

Amor pa Jehova ta pone cu nos no kier tin nada di haber cu religion falso. Nos trabou ni ningun organisacion cu nos ta pertenece na dje ni nada cu nos ta haci no mester tin conexion cu religion falso. Jehova ta spierta nos: “Sali for di [Babilonia e Grandi], mi pueblo.”—Revelacion 18:2, 4.

KICO MAS NOS POR SIÑA?

Wak kico bo por haci pa bo no laga ningun hende stroba bo di keda leal na Jehova. Ademas, wak con bo por mustra cu bo ta leal na Jehova ora bo sali for di Babilonia e Grandi.

3. Tene cuidou cu maestro falso

Kico nos tin cu haci ora nos tende cos negativo tocante Jehova su organisacion? Lesa Proverbionan 14:15. Despues, analisa e siguiente pregunta:

Dicon nos no mester bay tras di tur loke hende ta bisa?

Lesa 2 Juan 9-11. Despues, analisa e siguiente preguntanan:

Con nos mester trata un apostata?
Aunke nos no ta papia directamente cu apostata, con nan ideanan por influencia nos toch?
Con bo ta kere Jehova lo sintie si nos ta scucha cos negativo cu hende ta papia di dje of di su organisacion?

4. Keda leal na Jehova ora un ruman peca

Si nos haya sa cu un hende den e congregacion a comete un pica serio, kico nos mester haci? Wak un principio cu nos por saca for di e ley cu Jehova a duna e Israelitanan den pasado. Lesa Levitico 5:1.

Manera e texto ta mustra, si nos haya sa cu un persona den congregacion a comete un pica serio, nos mester bisa e ancianonan loke nos sa. Pero, prome cu nos haci esey, lo ta bon pa nos anima e persona pa e mes bay papia cu e ancianonan y confesa su pica. Si e no haci esey, nos lealtad na Jehova lo motiva nos pa bisa e ancianonan loke nos sa. Si nos tuma e pasonan cu a ser menciona, con esey ta demostra cu nos tin amor leal pa ...

Jehova Dios?
e persona cu a peca?
otro hende den congregacion?

Collage: Un ruman homber ta yuda un otro ruman homber cu a haci algo robes. 1. E ruman homber ta mira algo riba su telefon cu ta preocup’e. 2. E ruman homber ta mustra e otro ruman homber loke tin riba su telefon, pero e otro ruman homber no a gusta cu e ruman homber a hala su atencion. 3. E ruman homber ta mustra dos anciano kico tin riba su telefon y ta papia cu nan. — Si un ruman ta den problema, yud’e!

5. Keda leu for di Babilonia e Grandi

Pasa e VIDEO.

VIDEO: Sali for di Babilonia e Grandi! (5:06)

Escena di e video Sali for di Babilonia e Grandi! Un studiante di Bijbel ta cana bay laga un pastoor despues cu e studiante a kita for di su trabou na misa.

Lesa Lucas 4:8 y Revelacion 18:4, 5. Despues, contesta e siguiente preguntanan:

Ainda mi ta inscribi como miembro di un religion falso?
Mi ta forma parti di un organisacion cu ta conecta cu un otro religion?
E trabou cu mi ta haci ta duna sosten na religion falso di un of otro manera?
Ainda mi tin conexion cu religion falso den otro area di mi bida?
Si riba un di e preguntanan ey mi contesta tabata si, ki cambio mi mester haci?

Sea loke sea e caso, tuma un decision cu ta laga bo cu un consenshi limpi y cu ta demostra cu bo ta leal na Jehova.

Un ruman muher cu su yiu homber ta sali for di un supermercado. Nan ta cana pasa banda di un señora cu ta pidi donacion pa un obra di caridad religioso. — Kico lo bo haci si un hende pidi bo haci donacion pa un obra di caridad religioso?

LOKE HENDE SA BISA: “Mi mester sa loke e apostatanan ta bisa tocante testigonan di Jehova pa asina mi por defende e berdad.”

Esey lo ta algo sabi pa haci? Dicon si, of dicon no?

RESUMEN

Pa nos por keda leal na Jehova, nos no mester anda cu hende cu ta purba engaña nos.

Repaso

Dicon nos no mester scucha loke e apostatanan ta bisa?
Si nos haya sa cu un ruman a comete un pica serio, kico nos mester haci?
Con nos por obedece e spiertamento pa sali for di religion falso?

A completa e les aki dia:

Meta

Si ainda bo tin conexion cu religion falso, dal e pasonan necesario pa separa bo mes for di religion falso.

Otro meta:

Otro meta

MAS INFORMACION INTERESANTE

Lesa kico bo por haci ora otro hende ta papia mentira tocante testigonan di Jehova.

“Bo Ta na Altura di e Echonan?” (E Toren di Vigilansia di augustus 2018)

Con bo por haya sa si un organisacion of un actividad ta duna sosten na Babilonia e Grandi?

“Keda Ocupa Durante e Parti Final di ‘e Ultimo Dianan’” (E Toren di Vigilansia di october 2019, paragraf 16-18)

Kico algun opositor a haci pa pone nos perde fe?

Tene Kuidou ku Engaño 9:26

Den e relato “Mi Tabata Busca Dios for di Tempo Mi Tabata Mucha”, wak con un sacerdote shinto a kibra tur laso cu e tabatin cu religion falso.

“Bijbel Ta Cambia Bida di Hende” (La Atalaya di 1 di juli 2011)