Ken Abraham Tabata?

MASHA poco hende tabatin un influencia asina grandi riba religion manera Abraham.a Tanto hudiu, moslim, cristian como hende di otro religion ta respet’e y ta consider’e como un personahe biblico importante y “un ehempel sobresaliente di fe.” Bijbel ta yam’e “tata di tur hende cu Dios ta considera husto pa motibo di nan fe.”​—Romanonan 4:11.

Dicon hende tin asina tanto respet pa Abraham? Wel, Abraham ta e unico persona cu Bijbel ta yama amigo di Dios, y no un biaha so, sino tres biaha.​—2 Cronicanan 20:7; Isaias 41:8; Santiago 2:23.

Pero Abraham tabata un hende gewoon, mescos cu nos tur. El a hay’e cu hopi di e problemanan cu nos ta enfrenta awendia​—ma el a surpasa nan cu exito. Bo kier sa con el a logra esey? Ban wak kico Bijbel ta conta nos di e homber extraordinario aki.

Su Origen

Abraham a nace na aña 2018 prome cu nos era y a lanta den Ur. (Genesis 11:27-31) Ur tabata un stad grandi y prospero. Pero e tabata pesta cu adoracion di idolo. Kisas Tare, tata di Abraham, tambe a adora varios idolo. (Josue 24:2) Ma Abraham a scoge pa adora Jehovab so y no idolo sin bida.

Kico a motiva Abraham pa tuma e decision ey? Wel, pa 150 aña largo Abraham tabata contemporaneo di Sem, e yiu homber di Noe. Anto si Abraham a anda cu e homber di mas edad ey, siguramente lo el a conta Abraham con nan a sobrevivi e Diluvio. Abraham lo por a haya sa tambe cu ta masha importante pa adora Jehova, e Dios cu a proteha Sem y su famia durante e Diluvio.

Sea cu tabata via Sem of di un otro fuente Abraham a siña tocante e Dios berdadero, el a reacciona faborablemente riba loke el a haya sa. Pesey, ora Jehova, esun cu ta “sondea curason”, a observa Abraham, el a mira algo bon den dje y a yud’e bira asta un mihor persona.​—Proverbionan 17:3; 2 Cronicanan 16:9.

Su Bida

Abraham tabatin un bida interesante y yen di actividad; maske el a pasa den basta dificultad, nunca el a sinti cu su bida no tabatin proposito. Laga nos ban wak algun di e cosnan cu el a pasa aden.

▪ Tempo cu Abraham tabata biba na Ur, Dios a mand’e bandona su tera natal y bay na un tera cu Dios mes lo a mustr’e. Aunke Abraham cu Sara no tabata sa tur detaye​—esta, unda pa bay ni pakico Dios a manda nan muda​—nan a obedece. Finalmente, Abraham cu Sara a haya nan ta biba den tent den e tera di Canan y, pa resto di nan bida, nan a biba como stranhero.​—Echonan 7:2, 3; Hebreonan 11:8, 9, 13.

▪ Prome cu Abraham cu Sara tabatin yiu, Jehova a priminti Abraham cu lo el a hacie un nacion grandi y cu tur famia di mundo lo ta bendiciona pa medio di dje. (Genesis 11:30; 12:1-3) Y mas despues, Jehova a confirma cu lo e cumpli cu e promesa aki. El a bisa Abraham cu su descendientenan lo bira incontabel manera e streanan di cielo.​—Genesis 15:5, 6.

▪ Ora Abraham tabatin 99 aña di edad y Sara casi 90, Jehova a bisa nan cu nan lo a haya un yiu homber. For di e punto di bista humano, esey lo a parce algo imposibel. Pero no a tarda hopi cu Abraham cu Sara a haya sa cu nada no ta ‘dificil pa Jehova.’ (Genesis 18:14) Si, un aña despues, na edad di 100 aña, Abraham a bira tata di un yiu homber, cu el a yama Isaak. (Genesis 17:21; 21:1-5) Anto Dios a bisa specificamente cu ta pa medio di Isaak humanidad lo ricibi hopi bendicion.

▪ Pero algun aña despues, Jehova a pidi Abraham pa haci algo masha straño. El a pidi Abraham pa sacrifica su yiu stima, Isaak, maske e yoncuman aki no tabata casa ni tabatin yiu. E pensamento so cu lo el a perde su yiu lo mester a haci Abraham masha tristo. Toch, e tabata dispuesto pa obedece Dios y ofrece Isaak como sacrificio. Dicon? Pasobra Abraham tabatin fe cu Dios lo por a resucita Isaak si esey tabata necesario pa cumpli cu Su promesanan. (Hebreonan 11:19) Pero na e momento crucial, ora Abraham tabata a punto di sacrifica su yiu, Dios a interveni y a spaar e bida di Isaak. Jehova a elogia Abraham pa su obediencia extraordinario y a ripiti e promesa cu el a haci anteriormente na dje.​—Genesis 22:1-18.

▪ Na edad di 175 aña, Abraham a fayece. Bijbel ta bisa cu el ‘a muri na un edad hopi avansa, bieu y satisfecho.’ (Genesis 25:7, 8) Si, asina Abraham a mira cumplimento di un otro promesa di Dios, esta, cu lo el a disfruta di un bida largo prome cu el a muri na paz.​—Genesis 15:15.

E Ehempel Cu El A Laga Atras

Abraham ta mucho mas cu djis un persona religioso of importante cu a biba den pasado. Te awe, e ta un excelente ehempel pa nos. (Hebreonan 11:8-10, 17-19) Pesey, laga nos analisa cuater excelente cualidad cu Abraham a demostra. Nos lo cuminsa cu esun cu kisas e ta mas conoci p’e, esta, fe.

[Nota]

[Cuadro na pagina 4]

Un Personahe Importante den Historia Biblico

Den e prome dies capitulonan di Genesis, Bijbel ta relata bida di diferente homber di fe, manera Abel, Enok y Noe. Sinembargo, e 15 capitulonan despues ta trata bida di un solo homber​—Abraham.

Es mas, e prome bes cu Bijbel ta menciona algun di su conceptonan di mas importante ta en conexion cu Abraham. Por ehempel, ta den e relato di Abraham, Bijbel ta . . .

▪ menciona pa prome biaha cu Dios ta un Escudo, of Protector, pa su sirbidornan.​—Genesis 15:1; wak Deuteronomio 33:29; Salmo 115:9; Proverbionan 30:5.

▪ papia pa prome biaha di kere, of pone fe, den Dios.​—Genesis 15:6.

▪ menciona e palabra profeta pa prome bes.​—Genesis 20:7.

▪ referi pa prome biaha na e amor di mayor.​—Genesis 22:2.