Abraham​—Un Homber Humilde

Abraham ta sinta den su tent cu ta proteh’e contra e calor sofocante. Segun cu e ta wak na horizonte, e ta mira tres homber cu a bin bishita e area.a Mesora e ta core bay topa nan y ta roga nan pa bin sosega un rato y disfruta di su hospitalidad. E ta ofrece nan “pida pan”, pero e ta laga prepara un bankete pa nan; esaki ta consisti di carni moli di bishe, pan fresco horna, manteca y lechi. E bankete cu Abraham a sirbi su huespednan ta demostra cu e ta un persona sumamente hospitalario y, manera nos ta bay mira, masha humilde.​—Genesis 18:1-8.

KICO TA HUMILDAD? Un persona humilde no ta orguyoso ni arogante. Un persona humilde ta reconoce cu otro hende ta sobresali den un of otro manera riba dje. (Filipensenan 2:3) E ta scucha sugerencia y ta dispuesto pa haci trabou humilde na beneficio di otro hende.

CON ABRAHAM A DEMOSTRA HUMILDAD? Abraham a sirbi otro hende cu placer. Manera nos a menciona na comienso di e articulo aki, asina cu Abraham a mira e tres bishitantenan, el a core bay topa nan y a percura pa nan haya tur loke nan tabatin mester. Mesora su casa, Sara, a cuminsa prepara algo di come. Pero bo a ripara ken a haci mayoria di e trabou? Si, Abraham! Ta e a core bay contra cu e bishitantenan y ofrece nan algo di come. Ta e a core bay na e tou di bestia y a scoge e bishe pa nan mata. Es mas, ta e a sirbi e bishitantenan. En bes di delega tur trabou na su sirbidornan, e homber humilde aki mes a pone man na obra. Anto e no a sinti cu sirbi otro hende a kita su dignidad.

Abraham a scucha sugerencia di hende cu e tabatin autoridad riba dje. Tin masha poco combersacion entre Abraham cu Sara registra den Bijbel. Pero dos biaha, Bijbel ta menciona cu Abraham a scucha di Sara y a haci loke el a sugeri. (Genesis 16:2; 21:8-14) Na prome instante, un di e sugerencianan ey “a duel Abraham masha.” Pero ora Jehova a papia cu Abraham y a mustr’e cu Sara su idea ta bon, Abraham a cede humildemente y a haci loke Sara a sugeri.

LES PA NOS: Si nos ta humilde di berdad, nos lo ta contento pa sirbi otro hende. Cu goso, nos lo haci loke sea ta na nos alcance pa haci nan bida mas comodo.

E manera cu nos ta reacciona riba sugerencia di otro hende tambe ta demostra si nos ta humilde of no. En bes di rechasa un idea djis pasobra no ta nos a bini cu ne, ta mihor pa scucha opinion di otro hende. (Proverbionan 15:22) Esaki ta conta specialmente pa hende cu tin cierto autoridad. John por ehempel, un superintendente experencia cu ta sirbi na Betel, a bisa: “Pa ami, un bon superintendente ta un persona cu ta crea un ambiente caminda hende ta sinti nan liber pa expresa nan mes.” El a sigui bisa: “Bo mester ta humilde pa admiti cu un persona bou di bo autoridad por tin un mihor manera di haci cos cu abo. Ningun hende​—ni un superintendente​—no mester pensa cu e ta e unico cu tin bon idea.”

Si nos ta imita Abraham, esta, ta scucha sugerencia di otro hende y haci trabou humilde na nan fabor, nos lo tin e aprobacion di Jehova. Dicon? Pasobra ‘Dios ta opone hende orguyoso, ma ta duna bondad inmereci na hende humilde.’​—1 Pedro 5:5.

[Nota]