Pregunta 1: Mi Bida Tin Proposito?

ROSALIND, kende a lanta na Inglatera, tabatin un sed insaciabel pa conocemento, y e tabata kier yuda hende. Despues cu el a caba scol, el a haya un bon trabou cu a encera yuda hende cu no tabatin dak riba nan cabes. Ademas, e tabata yuda hende cu tabata fisicamente deshabilita y esnan cu tabatin problema cu siñamento. A pesar cu su trabou tabata dun’e satisfaccion y cu e tabata gana bon placa, el a bisa: “Pa hopi aña mi tabata puntra mi mes, ‘Dicon nos ta riba tera?’ of ‘Kico ta e proposito di bida?’”

Dicon ta normal cu hende ta haci e pregunta ey?

Pasobra hende no ta manera bestia cu no por rasona. Nos por siña for di pasado, plania pa futuro y busca pa sa kico ta e proposito di bida.

Con algun hende ta contesta e pregunta ey?

Hopi hende ta pensa cu e proposito principal di bida ta pa bira rico of famoso pasobra esey lo trece felicidad.

Kico e contesta ey ta encera?

Cu ta nos mes ta pone nos prioridadnan den bida. Y cu nos deseonan ta mas importante cu e boluntad di Dios.

Kico Bijbel ta siña?

Rey Salomon, kende a acumula hopi rikesa y a sigui tras di placer, a yega na e conclusion cu e cosnan ey no ta duna bida berdadero proposito. El a indica loke si ta duna bida berdadero proposito ora el a skirbi: ‘E conclusion di tur loke cu a wordo tendi ta: Teme Dios y warda su mandamentonan, pasobra esaki ta aplicabel na cada persona.’ (Eclesiastes 12:13) Kico ta encera warda Dios su mandamentonan?

Dios su proposito ta, entre otro, pa nos disfruta di bida. Salomon a skirbi: “No tin nada mihor pa un hende cu come y bebe y bisa su mes cu su trabou ta bon. Mi a ripara cu esaki tambe ta bin for di man di Dios.”—Eclesiastes 2:24.

Dios kier tambe pa nos stima y percura pa nos famia. Wak e siguiente consehonan simpel y practico cu e ta duna cada miembro di famia.

“Esposonan mester stima nan esposa manera nan mes curpa.”—Efesionan 5:28.
“E esposa mester tin respet profundo pa su esposo.”—Efesionan 5:33.
“Yiunan, obedece boso mayornan.”—Efesionan 6:1.

Si nos ta aplica e principionan biblico aki, nos lo disfruta di un cierto grado di felicidad y satisfaccion. Sinembargo, e cos di mas importante cu nos mester haci ta siña tur loke nos por tocante nos Creador y cera un amistad estrecho cu ne. En realidad, Bijbel ta invita nos pa “hala cerca Dios.” Y despues, e ta agrega e promesa remarcabel aki: “Lo e hala cerca boso.” (Santiago 4:8) Si bo acepta e invitacion aki, bo bida lo haya berdadero proposito.

Awor si, Rosalind, kende nos a menciona anteriormente, ta sinti cu su bida tin berdadero proposito. Dicon? Pa bo haya sa esey, lesa su experencia cu ta cuminsa na pagina 10 di La Atalaya di 1 di november 2012.

Si bo kier sa mas tocante con pa biba na un manera cu ta agrada Dios, wak capitulo 12 di e buki Kico Bijbel Ta Siña Realmente? Bo por download e for di e website www.jw.org

Kico Hesus A Bisa Tocante e Proposito di Bida?

Hesus tabata sa bon bon kico ta e proposito di su bida. El a bisa: “Pa esaki mi a nace y pa esaki mi a bin na mundo: pa mi duna testimonio di e berdad.” (Juan 18:37) Pesey, Hesus a uza su bida pa siña hende tocante Dios y Su propositonan.

Si nos sigui e ehempel di Hesus, nos bida tambe por tin berdadero proposito. Hesus mes a anima nos pa siña for di dje. (Mateo 11:29) Laga nos wak dos cos cu Hesus a siña su siguidornan.

Hesus a bisa cu pa nos ta feliz, nos mester ta “consciente di [nos] necesidad spiritual.” (Mateo 5:3) Nos por satisface nos necesidad spiritual si nos siña conoce “e unico Dios berdadero, y esun cu [el] a manda, Hesucristo.”—Juan 17:3.

Hesus a duna su siguidornan e mandamento pa siña otro hende loke el a siña nan. El a bisa nan: “Pesey bay, y haci hende di tur nacion mi discipel, y batisa nan den nomber di e Tata y di e Yiu y di spirito santo, y siña nan cumpli cu tur loke mi a manda boso.”—Mateo 28:19, 20.

Hende cu ta studia Bijbel pa satisface nan necesidad spiritual y cu ta aplica loke nan ta siña ta ripara cu nan calidad di bida ta mehora. Anto ora nan cuminsa yuda hende conoce Dios, nan ta bira mas convenci cu nan bida tin berdadero proposito.