Religion y Placa

Estellea y su yiunan tabata bay nan iglesia regularmente. Un dia el a bisa su pastoor cu e kier compronde Bijbel, pero nunca e pastoor a haci caso y Estelle a stop di bay iglesia. El a conta: “E lidernan di e iglesia a skirbi mi un carta y basicamente nan a bisa mi cu si mi no por bin iglesia, djis manda placa. M’a mira claramente cu e unico cos cu tabata interesa nan tabata mi placa.”

Angelina, kende semper tabata un persona religioso, a bisa: “Na mi iglesia nan tabata pasa collect tres bes durante e sirbishinan, y nan ta spera pa nos contribui tur biaha. Tur ora nan tabata pidi placa. M’a pensa: ‘E hendenan aki no por tin e spirito di Dios.’”

Bo conoce religion cu ta pone presion riba hende pa, sea directamente of indirectamente, duna contribucion? Esey ta na harmonia cu Bijbel?

KICO BIJBEL TA SIÑA?

Hesus, e fundador di cristianismo, a bisa: “Boso a ricibi pornada, duna pornada.” (Mateo 10:8) Pues, no por bende e mensahe valioso di Bijbel; e mester ta disponibel pa tur hende.

Con e prome cristiannan a cubri e gastonan di congregacion?

Cada un a contribui “manera el a dicidi den su curason, no di mala gana, ni forsa, pasobra Dios ta stima hende cu ta duna cu alegria.” (2 Corintionan 9:7) Apostel Pablo tabata traha tent pa asina e por a cubri e gastonan di su ministerio. (Echonan 18:2, 3) El a bisa: “Nos tabata traha di dia y anochi pa nos no pone un carga pisa riba ningun di boso ora nos tabata predica e bon noticia di Dios na boso.”—1 Tesalonicensenan 2:9.

KICO TESTIGONAN DI JEHOVA TA HACI?

Testigonan di Jehova ta tene nan reunionnan den edificionan simpel cu nan ta yama Salon di Reino. Con nan ta cubri e gastonan? Nan no ta pasa collect ni parti envelop pa pidi donacion. Mas bien, ken cu ta aprecia e instruccion spiritual cu e ta haya na e reunionnan por tira un donacion discretamente den e caha di contribucion di e Salon.

Aunke ta costa placa pa imprimi y distribui e revista aki, hamas lo bo mira propaganda of cu nan ta pidi placa den dje. Su proposito ta pa yuda hende compronde e berdadnan di Bijbel.

Kico bo ta pensa: E manera di cubri gasto aki ta cuadra cu loke Hesus a bisa y cu e ehempel di e prome cristiannan?