Pakico Bo Mester Ta Interesa den Bijbel?

Sin duda, Bijbel ta e buki mas gusta na mundo. Dicon? Pa cuminsa, bo por identifica bo mes cu e relatonan di bida real cu e ta contene. Esakinan ta papia di hende cu di berdad a existi, di nan relacion cu otro hende y cu Dios. For di e relatonan aki bo por siña lesnan practico. Debi na Bijbel su lenguahe cla y simpel, por a traducie den cientos di idioma, y hende di cualkier epoca of cualkier parti di mundo por comprond’e. Ademas, su principionan semper ta duna bon resultado.

Pero mas importante ainda, Bijbel no ta djis un buki cu ta papia di Dios, sino cu e ta bin di Dios, manera e mes ta indica. E ta menciona Dios su nomber, su personalidad y su proposito incambiabel pa tera y pa humanidad. Bijbel ta conta tambe di un lucha universal, un lucha largo entre bon y malo: un historia fascinante cu un final feliz. Pues, ora bo lesa Bijbel cu un mente habri, bo ta pone e base pa bo fe y speransa.

Den Bijbel nos lo haya informacion cu nos no ta haya niun otro caminda. Por ehempel, e ta bisa nos e berdad tocante e siguiente topiconan:

• Con hende a bin na existencia y dicon tin asina hopi sufrimento

• Loke Dios a haci pa salba humanidad

• Loke Hesus a haci pa nos

• E futuro di tera y di humanidad

Dicon bo no ta djis tira un bista riba e siguiente paginanan y mira pa bo mes kico Bijbel ta papia di dje?