“Jehova A Pordona Boso Libremente”

“Esun cu no por pordona otro ta kibra e brug cu e mes tin cu pasa riba dje.” E palabranan ey di e historiador Britanico di siglo 17, Edward Herbert, ta enfatisa un di e motibonan pakico nos tin cu pordona otro hende: E dia lo yega, tardi of trempan, cu otro hende lo tin cu pordona nos. (Mateo 7:12) Pero tin un motibo mucho mas importante pakico nos tin cu pordona. Y apostel Pablo a indica esey na Colosensenan 3:13.​—Les’e.

Como cu nos tur ta imperfecto, tin biaha nos ta desagrada of ofende otro hende, mescos cu nan sa haci cu nos. (Romanonan 3:23) Con nos por keda na paz cu nos prohimo imperfecto? Bou di inspiracion di Dios, Pablo a conseha nos pa siña tolera otro y ser cla pa pordona. E conseho ey ta mes practico awe cu tempo Pablo a skirbie rond di 2.000 aña pasa. Laga nos analisa su palabranan.

“Sigui soporta otro.” E expresion “sigui soporta” ta bin di un palabra Griego cu ta nifica tolera. Un obra di referencia ta bisa cu cristiannan ta manifesta e cualidad aki ora nan ta “dispuesto pa soporta otro hende su fayonan of caracteristicanan desagradabel di nan personalidad, cu normalmente lo a disgusta nan.” E palabra “otro” ta indica cu tal tolerancia mester bin di tur dos banda. Cu otro palabra, ora nos corda cu nos tambe tin caracteristicanan cu por disgusta otro hende, nos lo no laga e cosnan cu nos no ta gusta den otro hende stroba nos di biba na paz cu nan. Pero kico nos tin cu haci si un hende peca contra nos?

“Sigui ... pordona otro libremente.” Segun un experto riba tereno di Bijbel, e palabra Griego traduci como “pordona libremente” “no ta e palabra comun pa pordona ... sino uno cu tin un nificacion mas profundo y cu ta enfatisa e misericordia cu e accion ey ta encera.” Un otro fuente ta bisa cu e palabra aki por nifica “haci un hende un fabor of haci algo beneficioso p’e.” Nos ta mustra misericordia ora nos ta cla pa pordona hasta ora nos tin un “motibo pa keha un otro.” Pero pakico nos mester ta cla pa haci esey? Entre otro, pasobra lo yega e dia cu e otro persona lo tin cu ‘haci nos e fabor’ di pordona nos.

“Mescos cu Jehova a pordona boso libremente, boso tambe mester haci mescos.” Esaki ta e motibo di mas importante pakico nos tin cu pordona otro hende libremente: pasobra Jehova ta pordona nos libremente. (Mikeas 7:18) Pensa un rato riba ‘e gran fabor’ cu Jehova a haci pecadornan arepenti. Distinto di nos, Jehova no ta peca. Toch, e ta dispuesto pa pordona nos completamente aunke e sa cu hamas nos lo tin cu hacie e fabor di pordon’e bek. Sin duda, Jehova ta e ehempel principal di loke ta nifica pordona libremente!

E misericordia di Jehova ta hala nos cerca dje y ta motiva nos pa imit’e. (Efesionan 4:32–5:1) Ta bon pa nos puntra nos mes: ‘Si Jehova ta tene misericordia cu mi y ta pordona mi, con mi por nenga di pordona un otro hende mes imperfecto cu mi cu ta berdaderamente arepenti di a peca contra mi?’​—Lucas 17:3, 4.