Ki Efecto Color Tin Riba Bo?

Ora bo wak rond, bo wowo y bo celebro ta traha hunto pa compila informacion. Por ehempel, bo ta wak un fruta y bo ta dicidi si bo kier com’e of no. Ora bo ta wak cielo kisas bo ta conclui cu awasero no ta bay cay awe. Bo ta mira e palabranan cu bo ta lesando aworaki y bo ta compronde kico nan kier trece padilanti. En berdad, e colornan cu bo ta mira tin efecto riba bo. Con asina?

E color di e fruta ta yuda bo determina si e ta hecho y si e ta duna bo gana di com’e. E color di cielo y di nubia ta yuda bo saca afo con e tempo ta. E contraste di color den e articulo aki entre e texto y su background ta permiti bo wowonan les’e cu facilidad y disfruta di dje. Si, talbes sin cu bo ripara, constantemente bo ta uza color pa yuda bo procesa informacion tocante e mundo rond di bo. Y no esey so, color tin su impacto riba bo emocionnan tambe.

E IMPACTO DI COLOR RIBA BO EMOCIONNAN

Ora bo ta cana den un supermercado, bo ta rondona pa un gran variedad di empake cu ta diseña pa atrae bo bista. Sea cu bo ta realisa esey of no, companianan di publicidad ta scoge color y combinacion di color cuidadosamente pa atrae hende segun nan gusto, sexo of edad. Expertonan cu ta decora cas, diseña paña y artistanan tambe sa cu color por influencia emocion di hende.

Cada hende por wak color na un manera diferente, dependiendo di su cultura y custumbernan. Por ehempel, algun hende di Asia ta relaciona cora cu suerte y fiesta, pero den algun parti di Africa, cora ta color di luto. Pero tin cierto color cu tin e mesun impacto emocional riba hende, sin importa na unda nan a lanta. Laga nos analisa tres ehempel.

CORA. E color aki ta bibo. Hopi biaha nan ta relacion’e cu energia, guera y peliger. E ta un color emocional intenso y por stimula un hende su metabolismo, pone hala rosea mas lihe y subi su presion.

Den Bijbel, e palabra Hebreo pa “cora” ta bin di un palabra cu ta nifica “sanger.” Bijbel ta uza cora bibo pa pinta un imagen impactante di un prostituta asesino bisti na color biña y cora cu ta core riba “un bestia salbahe color cora bibo ... tur na nomber cu ta blasfema Dios.”—Revelacion 17:1-6.

BERDE. E color aki ta produci un reaccion contrario na cora, ya cu e ta reduci e metabolismo y ta produci un efecto calmante. E ta un color cu hende ta relaciona cu trankilidad. Ora nos mira un hofi of sero berde, nos ta sinti nos relaha. E relato di creacion den Genesis ta bisa cu Dios a duna humanidad yerba berde y vegetacion.—Genesis 1:11, 12, 30.

BLANCO. Hopi hende ta relaciona blanco cu luz, siguridad y limpieza. E ta ser asocia tambe cu cualidadnan manera bondad, inocencia y pureza. Blanco ta e color mas menciona den Bijbel. E Palabra di Dios ta describi hende y angel cu ta aparece den vision bisti na blanco, locual ta enfatisa husticia y limpieza spiritual. (Juan 20:12; Revelacion 3:4; 7:9, 13, 14) Cabay blanco cu jinete bisti na blanco ta simbolisa guera husto. (Revelacion 19:14) Dios ta uza color blanco pa enfatisa cu e ta cla pa pordona pica: “Maske boso picanan ta manera escarlata [of, cora bibo], nan lo bira blanco manera sneeuw.”​—Isaias 1:18.

COLOR POR YUDA BO CORDA COS

E uzo cu Bijbel ta duna color ta demostra con bon Dios conoce e efecto cu color tin riba nos emocionnan. Por ehempel, e buki di Revelacion ta contene un vision di cosnan cu ta tumando luga den nos tempo, manera guera, hamber y morto ocasiona pa scarsedad di cuminda y enfermedad. Pa yuda nos corda esaki, un vision extraordinario ta papia di jinetenan cu ta core riba varios cabay, no di un color so, sino di diferente color.

Esun prome ta un cabay blanco, cu ta simbolisa e guera husto di Cristo Hesus. Despues ta sigui un cabay cora bibo, cu ta representa guera entre e nacionnan. Siguientemente tin un cabay preto spantoso, cu ta simbolisa hamber. Tras di dje ta sigui un “cabay bleek; y esun sinta riba dje tabatin e nomber Morto.” (Revelacion 6:1-8) Cada color ta produci un efecto riba nos emocionnan, cu ta cuadra cu loke e cabay ta representa. Esey ta yuda nos corda e cabaynan di color aki facilmente y loke nan ta siña nos encuanto nos tempo.

Den Bijbel tin hopi ehempel di uzo di color pa crea imagen mental bibo. Si, e Creador di luz, color y wowo humano ta uza color na un manera maestral pa graba imagen den nos mente cu ta facil pa compronde y keda corda. Color ta yuda nos compila y procesa informacion, e tin un efecto riba nos emocionnan y e por yuda nos corda ideanan importante. Color ta un regalo amoroso di nos Creador pa yuda nos disfruta di bida.