Sigui ‘Warda Riba Jehova’

1. Dicon nos lo por cansa di warda?

E ULTIMO dianan di e sistema di Satanas a cuminsa na aña 1914 ora cu Cristo a bira Rey den cielo. Como resultado di e guera den cielo, Hesus a tira Diabel cu su demoñonan abou na tera. (Lesa Revelacion 12:7-9.) Y Satanas sa cu a ked’e “masha poco tempo.” (Rev. 12:12) Pero ta casi 100 aña caba cu e “masha poco tempo” ey a cuminsa, y kisas tin hende ta haya cu e ultimo dianan a dura mucho largo. Acaso nos tambe a cuminsa bira impaciente cu Jehova ainda no a pone un fin na e sistema di Satanas?

2. Kico e articulo aki lo trata?

² Ta peligroso si nos perde pasenshi. Dicon? Pasobra ora nos no tin pasenshi, nos lo por actua sin pensa. Pero kico por yuda nos warda cu speransa riba Jehova? E articulo aki lo yuda nos pasobra e ta contesta e siguiente preguntanan: (1) Kico e ehempel di profeta Mikeas ta siña nos tocante pasenshi? (2) Ki sucesonan ta indica cu e fin ta cerca? (3) Con nos por demostra cu nos ta agradecido cu Jehova tin pasenshi?

KICO NOS POR SIÑA FOR DI E EHEMPEL DI MIKEAS?

3. Ki situacion tabata reina na Israel den tempo di Mikeas?

³ Lesa Mikeas 7:2-6. Jehova su profeta Mikeas a mira con e condicion spiritual di Israel a keda bay atras te ora cu nan a bira sumamente infiel na Jehova bou di mando di e Rey malbado Acaz. Mikeas a compara e Israelitanan infiel cu “mata di sumpiña” y “trankera di cadushi”, pasobra nan tabata causa daño na tur hende cu nan tabatin trato cu ne. E situacion a bira asina malo cu hasta miembronan di famia no tabata stima otro mas. Mikeas a realisa cu e mes no por a haci nada pa cambia e situacion, y pesey el a haci oracion na Jehova di henter su curason. Y el a warda cu pasenshi pa Dios actua. Mikeas tabatin sigur cu Jehova lo a interveni y corigi e situacion na Su debido tempo.

4. Kico ta e retonan cu nos ta haya nos cu ne?

⁴ Mescos cu Mikeas, nos tin cu biba meymey di hende egoista. Hopi di nan ta “malagradecido, desleal, sin cariño.” (2 Tim. 3:2, 3) Nos ta haya hopi stress ora cu coleganan di trabou of compañeronan di scol of nos bisiñanan ta mustra un actitud egoista. Pero algun di nos tin un reto mas grandi ainda. Hesus a bisa cu su siguidornan lo haya oposicion for di nan famia. Y e palabranan cu el a uza pa describi e impacto cu su mensahe lo tin ta casi mescos cu loke nos ta lesa na Mikeas 7:6. Hesus a bisa: “Mi a bin pa causa desunion: entre un yiu homber y su tata, entre un yiu muher y su mama y entre un esposa hoben y su suegra. Si, e enemigonan di un hende lo ta su mes hendenan di cas.” (Mat. 10:35, 36) Ta hopi dificil ora cu nos miembronan di famia cu no ta sirbi Jehova ta haci bofon di nos y opone nos. Si nos ta pasando den un situacion asina, no entrega! Na luga di esey, nos mester keda leal na Jehova y warda cu pasenshi pa e corigi e situacion. Si nos keda pidie pa yuda nos, lo e duna nos e fortaleza y sabiduria necesario pa persevera y keda fiel.

5, 6. Con Jehova a recompensa Mikeas, pero kico si Mikeas no a experencia?

⁵ Jehova a recompensa Mikeas pa su pasenshi. Mikeas a mira e fin di Rey Acaz y di su gobernacion malbado. Tambe el a mira Ezekias, yiu di Acaz, bira rey y yuda e Israelitanan bolbe na adoracion berdadero. E huicio cu Jehova a inspira Mikeas pa profetisa contra Samaria a cumpli ora cu e Asirionan a invadi Israel su reino di noord. Anto Mikeas a mira esey tambe sosode.—Mik. 1:6.

⁶ Pero toch Mikeas no a mira tur loke Jehova a inspir’e pa profetisa cumpli. Por ehempel, Mikeas a skirbi: “Lo sosode den e ultimo dianan cu e sero di e cas di SEÑOR lo wordo estableci como hefe di e seronan. E lo wordo halsa mas halto cu e seritonan, y e pueblonan lo basha bay na dje. Y hopi nacion lo bin bisa: ‘Ban laga nos subi bay na e sero di SEÑOR.’” (Mik. 4:1, 2) Mikeas a muri hopi prome cu e profecia ey a cumpli. Pero e tabata determina pa keda leal na Jehova te na morto, sin importa kico e hendenan rond di dje tabata haci. El a skirbi: “Tur e pueblonan ta cana cada un den e nomber di su dios, ma pa loke ta nos, nos si lo cana den e nomber di [Jehova] nos Dios pa semper y semper.” (Mik. 4:5) Mikeas por a warda cu pasenshi durante periodonan dificil pasobra e tabatin pleno confianza cu Jehova lo cumpli cu tur Su promesanan. E profeta fiel ey a confia den Jehova.

7, 8. (a) Ki motibo nos tin pa confia den Jehova? (b) Kico lo pone tempo pasa mas lihe?

⁷ Anos tambe ta confia den Jehova mescos cu Mikeas? Nos tin bon motibo pa haci esey. Nos a mira personalmente con e profecia di Mikeas a cumpli. Durante e ultimo dianan aki, miyones di hende for di tur nacion, tribu y idioma a basha bay na ‘e sero di e cas di Jehova.’ Maske nan ta bin di nacionnan cu hopi biaha ta bringa otro, e adoradornan di Jehova aki a “bati nan spadanan traha ploeg cu nan”, y nan ta nenga di siña of “train pa guera.” (Mik. 4:3) Si, nos tin e gran privilegio di ta parti di Jehova su pueblo pacifico.

⁸ Di mes, nos tur kier pa Jehova trece un fin na e sistema malbado aki pronto. Pero pa nos por warda cu pasenshi, nos tin cu mira cosnan for di e punto di bista di Jehova. El a fiha un dia riba cua e ta bay husga mundo “pa medio di un homber cu el a nombra”, Hesucristo. (Echo. 17:31) Pero prome cu e dia ey yega, Dios ta dunando tur sorto di hende e oportunidad pa haya “conocemento exacto di e berdad”, pa pone na practica loke nan ta siña y pa ser salba. Corda, bida di hende ta na peliger! (Lesa 1 Timoteo 2:3, 4.) Pronto e fin ta yega. Si nos ta ocupa cu e trabou di yuda hende haya conocemento exacto di Dios, e ora ey e tempo cu falta pa Jehova su huicio yega lo pasa mas lihe. Y ora e fin yega, nos lo keda masha contento mes cu nos tabata ocupa cu e trabou di predica e Reino.

KI SUCESONAN TA INDICA CU E FIN TA CERCA?

9-11. E profecia di 1 Tesalonicensenan 5:3 a cumpli? Splica esey.

⁹ Lesa 1 Tesalonicensenan 5:1-3. Den futuro cercano, e nacionnan lo bisa “Paz y siguridad!” Si nos no kier pa e declaracion aki gara nos di sorpresa, nos tin cu “keda lanta y mantene nos sano huicio.” (1 Tes. 5:6) Pa yuda nos keda lanta den sentido spiritual, nos lo bay repasa brevemente algun suceso cu a prepara caminda pa e anuncio remarcabel aki.

¹⁰ E nacionnan a sclama pa paz despues di tur e dos gueranan mundial. Despues di e Prome Guera Mundial, nan a forma Liga di Nacion cu e speransa cu esey lo a trece paz. Anto despues di Segunda Guera Mundial, hopi hende a spera cu Nacionnan Uni lo por a trece paz. Lidernan gubernamental y religioso a confia den e dos organisacionnan ey pa trece paz na mundo. Por ehempel, Nacionnan Uni a declara aña 1986 como Aña Internacional di Paz. E aña ey, hopi lider politico y religioso a reuni hunto cu e cabes di Iglesia Catolico na Assisi (Italia) pa resa pa paz.

¹¹ Pero ni e anuncio ey di paz y siguridad, ni otro anuncionan parecido na dje, no a cumpli cu e profecia di 1 Tesalonicensenan 5:3. Dicon nos ta bisa esey? Pasobra ‘e destruccion cu lo a bin riba nan diripiente’ no a tuma luga ainda.

12. Kico nos sa tocante e declaracion di “Paz y siguridad”?

¹² Ta ken lo haci e futuro declaracion importante aki di “Paz y siguridad”? Ki papel e lidernan di cristiandad y di otro religion lo hunga den esey? Con e lidernan di varios gobierno lo ta envolvi den e anuncio aki? Bijbel no ta bisa nos. Loke si nos sa ta cu ni maske con nan haci e anuncio ey y ni con convencente e por zona, lo e no ta berdadero “paz y siguridad.” E mundo bieu aki, cu ta completamente putri, ta keda den gara di Satanas y lo no cambia. Esta tristo lo ta si un di nos mester kere e proclamacion satanico aki y compromete nos posicion neutral como cristian!

13. Dicon angel tin e bientonan di destruccion duro teni?

¹³ Lesa Revelacion 7:1-4. Mientras cu nos ta warda pa 1 Tesalonicensenan 5:3 cumpli, angel poderoso tin e bientonan destructivo di e tribulacion grandi duro teni. Riba kico nan ta warda? Wel, apostel Juan a describi un suceso clave: “E esclavonan di nos Dios”, e unginan, mester haya nan seyo final.a Unabes e seyamento final termina, e angelnan ta laga e bientonan di destruccion los. Kico lo pasa e ora ey?

14. Kico ta indica cu fin di Babilonia e Grandi ta cerca?

¹⁴ Babilonia e Grandi, e imperio mundial di religion falso, lo haya su destruccion mereci. Ningun “pueblo, multitud, nacion y idioma” lo por yud’e. Ya caba nos ta mira indicacion cu su fin ta cerca. (Rev. 16:12; 17:15-18; 18:7, 8, 21) Nos ta mira caba e falta di apoyo ey den medionan di comunicacion: Mas y mas nan ta critica religion y lidernan religioso. A pesar di esey, lidernan di Babilonia e Grandi no ta sinti cu nan ta realmente den peliger. Pero nan ta ekiboca! Despues di e anuncio di “Paz y siguridad!”, elementonan politico di e mundo di Satanas diripiente lo ataca religion falso y caba cu ne. Nunca mas nos lo mira Babilonia e Grandi! Ta bale la pena berdad pa nos warda cu pasenshi pa e sucesonan impactante ey tuma luga.—Rev. 18:8, 10.

CON NOS POR MUSTRA CU NOS TA AGRADECIDO PA DIOS SU PASENSHI?

15. Dicon Jehova a warda cu pasenshi?

¹⁵ A pesar cu hende a deshonra e nomber di Dios, Jehova a spera cu pasenshi riba e momento oportuno pa actua. Jehova no ta desea pa ningun hende di curason honrado ser destrui. (2 Ped. 3:9, 10) Anos tambe ta sinti asina? Wel, prome cu e dia di Jehova yega, nos por mustra nos gratitud pa su pasenshi na e siguiente maneranan.

16, 17. (a) Dicon nos lo kier yuda rumannan cu a bira inactivo? (b) Dicon ta urgente pa rumannan inactivo bolbe cerca Jehova aworaki?

¹⁶ Yuda rumannan cu a bira inactivo. Hesus a bisa cu tin goso den cielo ora cu haya djis un carne perdi! (Mat. 18:14; Luc. 15:3-7) Esey ta mustra bon cla cu Jehova ta hopi interesa den tur hende cu a yega di expresa amor pa su nomber, hasta pa esnan cu na e momentonan aki no ta sirbie activamente. Ora nos yuda personanan asina bolbe na e congregacion, nos ta haci Jehova y e angelnan masha contento.

¹⁷ Abo ta un di e personanan cu na e momentonan aki no ta sirbiendo Jehova activamente? Kisas un hende den congregacion a hurt bo y pesey bo a stop di asocia cu e organisacion di Jehova. Si esey a sosode algun tempo pasa, bo por puntra bo mes: ‘Mi bida tin mas sentido awor? Mi ta mas feliz? Ta Jehova a ofende mi of ta un hende imperfecto? Jehova a yega di haci algo pa perhudica mi?’ Si nos wak bon, Jehova semper a trata nos bon. Hasta si aworaki nos no ta cumpliendo cu nos promesa di sirbie, toch e ta laga nos disfruta di e cosnan bon cu e ta ofrece. (Sant. 1:16, 17) Pero pronto e dia di Jehova ta yega. Awor ta ora pa bolbe den e brasa di nos amoroso Tata celestial y na e congregacion, e unico refugio sigur den e ultimo dianan aki.—Deu. 33:27; Heb. 10:24, 25.

18. Dicon nos mester apoya e rumannan cu ta dirigi e congregacion?

¹⁸ Sea fiel den apoya e rumannan cu ta dirigi e congregacion. Jehova, como un Wardador amoroso, ta guia nos y proteha nos. El a nombra su Yiu como e Wardador Principal di e tou. (1 Ped. 5:4) Ancianonan den mas cu 100.000 congregacion ta tuma nan tempo pa pastorea delaster un carne di Dios. (Echo. 20:28) Ora cu nos ta apoya fielmente e rumannan cu ta dirigi e congregacion, nos ta mustra Jehova y Hesus cu nos ta hopi agradecido pa tur loke nan dos a haci pa nos.

19. Con nos por cera fila?

¹⁹ Hala cerca di bo rumannan. Kico esey ta nifica? Wel, ora un enemigo ta ataca un ehercito bon entrena, e soldaatnan di e ehercito ey ta cera fila, es decir, nan ta hala mas cerca di otro pa no laga niun buraco den nan defensa. Ora nan haci esey, ta bira dificil pa e enemigo derota nan. Satanas ta aumentando su atakenan contra e pueblo di Dios. Awor no ta ora pa nos bringa cu otro. Awor ta ora pa nos hala mas cerca di otro, pasa por halto di imperfeccion di otro y demostra confianza den e liderato di Jehova.

20. Kico nos mester haci aworaki?

²⁰ Pues, laga nos tur keda spiritualmente lanta y mustra cu nos ta spera riba Jehova. Laga nos warda cu pasenshi riba e anuncio di “Paz y siguridad!” y riba e seyamento final di e scoginan. Despues di esey, e angelnan lo laga e bientonan di destruccion los, y Babilonia e Grandi lo ser destrui. Mientras cu nos ta warda pa e sucesonan impactante aki tuma luga, laga nos acepta instruccion for di e rumannan nombra pa dirigi e organisacion di Jehova. Laga nos cera fila pa no duna Diabel cu su demoñonan un chens! Awor ta ora pa sigui e conseho di e salmista: “Sea fuerte y fortalece boso curason, boso tur cu ta spera den SEÑOR.”—Sal. 31:24.