Con Bo Por Trata cu Morto di Bo Casa?

BIJBEL ta bisa bon cla cu un esposo mester “stima su esposa manera e ta stima su mes.” Y un esposa, na su turno, “mester tin respet profundo pa su esposo.” Hunto nan ta “un carni”, y cada un mester haci su parti. (Efe. 5:33; Gen. 2:23, 24) Cu tempo, nan relacion cu otro ta bira mas estrecho y nan amor pa otro tambe ta bira mas fuerte. Mescos cu raiz di dos palo banda di otro cu tempo ta mara den otro, asina tambe e bida di un pareha felizmente casa, cu tempo, ta mara completamente den otro.

Pero kico si un di nan fayece? E ora ey e banchi fuerte cu nan tabatin cu otro durante nan bida ta kibra. E casa cu keda na bida ta keda atras cu hopi dolor di curason, soledad y kisas hasta sintimento di rabia of culpa. Daniellaa tabatin 58 aña casa y durante e periodo ey e tabata conoce hopi hende cu a perde nan casa. Pero despues cu su casa a fayece, el a bisa: “Ta ora bo mes pasa den e experencia ey, bo por compronde kico esey ta nifica.”

UN DOLOR CU NO KIER BAY

Algun experto ta bisa cu no tin dolor mas fuerte cu ora bo casa stima muri. Hopi hende cu a perde nan casa ta di acuerdo cu esey. Millie su casa a muri hopi aña pasa. El a describi su bida como viuda asin’aki: “Mi ta sinti manera mi a bira deshabilita.” Asina el a purba di splica con su estado emocional tabata despues cu el a perde su esposo cu ken e tabatin 25 aña casa.

Antes Susan tabata pensa cu viudanan cu pa añanan largo tabata yora morto di nan casa tabata haci di mas. Anto e mes a bira viuda despues cu e tabatin 38 aña casa. A pesar cu a pasa mas cu 20 aña, e ta bisa: “Tur dia mi ta pensa riba mi casa.” Hopi biaha awa ta basha for di su wowo pasobra e ta sinti hopi falta di su casa.

Bijbel ta confirma cu morto di un casa ta un sla duro y cu ta haci dolor pa hopi tempo. Por ehempel, ora Sara a muri, su casa, Abraham, “a bin pa tene rouw pa Sara y pa yor’e.” (Gen. 23:1, 2) Aunke Abraham tabatin fe den e resureccion, el a sinti un tristeza profundo ora su casa stima a muri. (Heb. 11:17-19) Jacob tampoco no a lubida su casa stima, Raquel, despues cu esaki a muri. Cu hopi sintimento Jacob a papia di dje cu su yiunan.—⁠Gen. 44:27; 48:⁠7.

Ki les nos por saca for di e ehempelnan aki di Bijbel? Wel, hopi biaha personanan cu perde nan casa ta keda sinti e perdida ey pa hopi aña. Nos no mester mira nan lagrima y periodonan di tristeza como un debilidad. Mas bien, e emocionnan ey ta un reaccion natural debi na e perdida grandi cu nan a sufri. Nan lo por tin mester di nos compasion y sosten pa hopi tempo.

PURBA DI MIRA CADA DIA COMO UN DIA NOBO

Ora un persona perde su casa, su bida no ta simplemente bira manera e tabata prome cu el a casa. Despues di hopi aña casa, un esposo por lo general sa con pa consola su esposa y anim’e ora e ta sinti su mes tristo of frustra. Si e esposo no t’ey mas, e consuelo y amor cu e esposa tabata haya cerca dje tampoco no t’ey mas. Di e mesun manera, un esposa ta siña con e por laga su esposo sinti su mes sigur y feliz. Pa e esposo, no tin nada cu por compara cu e esposa su caricia y su palabranan trankilisante. Tambe e atencion cu e ta duna na e interesnan y necesidadnan di su esposo ta algo unico. Si e esposa muri, e esposo lo por sinti un bashi den su bida. Pesey algun persona cu a perde nan casa ta cuminsa preocupa pa futuro y hasta tin miedo di loke ta warda nan. Ki principio biblico por yuda nan haya paz y duna nan un sintimento di siguridad?

Hesus a bisa: “No sea nunca ansha pa e dia di mañan, pasobra e dia di mañan lo tin su mes inkietudnan. Cada dia tin su mes problemanan.” (Mat. 6:34) E palabranan ey ta aplica principalmente na nos necesidadnan material, pero nan a yuda hopi hende soporta e dolor di perde nan casa. Algun luna despues cu e casa di Charles a muri, el a skirbi: “Te ainda mi ta sinti hopi falta di Monique, y tin biaha ta parce cu esey ta bira pio. Pero mi ta compronde cu esaki ta normal y cu ta cu tempo e dolor lo fria un poco.”

Si, Charles ainda mester a laga tempo pasa pa su dolor fria. Con el a logra esey? El a bisa: “Cu Jehova su yudansa, mi a purba di mira cada dia como un dia nobo.” Charles no a laga tristeza venc’e. Su dolor no a disparce di un dia pa otro, pero e no a laga e dolor caba cu ne tampoco. Si abo a perde bo casa, purba di trata cu bo perdida cada dia di nobo, sin preocupa mucho con lo bo sinti bo e dia despues. Bo no sa nunca ki beneficio of animacion ta warda bo mañan.

Morto no tabata parti di e proposito original di Jehova. Al contrario, morto ta parti di “e obranan di Diabel.” (1 Juan 3:8; Rom. 6:23) Satanas ta uza morto y e miedo cu hende tin di muri pa haci nan su catibo y pa kita tur nan speransa. (Heb. 2:14, 15) E ta gosa ora un hende cay den desesperacion y perde tur speransa di haya felicidad y satisfaccion awor of hasta den Dios su mundo nobo. Pues, e dolor profundo cu e casa cu keda na bida ta sinti pa e perdida di su partner ta debi na e pica di Adam y e trampanan di Diabel. (Rom. 5:12) Jehova lo drecha e daño cu Satanas a causa y caba cu su arma cruel, esta, morto. Entre e hendenan cu a ser libra for di e miedo cu Satanas ta hinca den nan tin hopi persona cu, kisas mescos cu bo, a perde nan casa.

Pa e personanan cu Dios resucita, bida riba tera lo trece hopi cambio. Ta claro cu relacionnan humano lo cambia. Por ehempel, mayornan, welanan y otro antepasadonan cu resucita lo bira perfecto gradualmente hunto cu nan yiunan y nietonan. E efectonan di biehes lo no t’ey mas. Kisas e generacion mas jong lo tin cu siña mira nan antepasadonan completamente otro for di e manera cu nan ta mira nan awor. E cambionan aki sin duda lo ta na beneficio di e famia humano.

Kisas nos tin hopi pregunta tocante resureccion. Por ehempel, kico lo pasa cu e personanan cu a perde dos of mas casa? E saduceonan a puntra Hesus tocante un muher kende su prome casa a muri, despues su di dos y asina a sigui te cu en total shete casa di dje a muri. (Luc. 20:27-33) Ki relacion e personanan ey lo tin cu otro despues di resureccion? Nos no sa, y nos no tin nodo di sinta specula of preocupa tocante e preguntanan aki; esey lo no yuda cu nada. Pa aworaki, e unico cos cu nos por haci ta simplemente confia den Dios. Un cos ta sigur, sea loke sea Jehova haci den futuro lo ta bon. Lo e ta algo cu nos por anhela, y no algo cu nos tin cu tene miedo di dje.

E SPERANSA DI RESURECCION TA UN FUENTE DI CONSUELO

Un di e siñansanan mas facil pa compronde den e Palabra di Dios ta cu nos sernan keri cu a muri lo biba atrobe. Relatonan di Bijbel tocante e resureccionnan cu a yega di tuma luga ta duna nos e garantia cu “tur esnan cu ta den graf lo tende [Hesus] su stem y lo sali afo.” ( Juan 5:28, 29) E hendenan cu lo ta na bida e tempo ey lo keda supercontento ora nan topa nan sernan keri cu a ser libra for di e gara di morto, sin papia mes di e felicidad di esnan resucita!

Segun cu miles di miyones di hende ta lanta for di morto, tera lo yena cu un alegria nunca bisto. (Mar. 5:39-42; Rev. 20:13) Ta bon pa medita riba e milager aki cu lo tuma luga, ya cu esaki por ta un consuelo pa tur cu a perde un ser keri.

Hende lo tin un motibo pa ta tristo ora e resureccion ey tuma luga? Bijbel ta bisa cu no. Segun Isaias 25:8, Jehova “lo traga morto pa semper.” Esey ta encera cu lo e elimina morto y tur su efectonan doloroso, pasobra e profecia ta sigui bisa: “Señor DIOS lo seca awa di wowo for di tur cara.” Si bo ta sinti bo tristo aworaki pasobra bo casa stima a muri, e resureccion sigur lo duna bo motibo pa ta feliz.

No tin un hende cu ta compronde completamente tur loke Dios lo haci den e mundo nobo. Jehova a bisa: “Mescos cu e cielonan ta mas halto cu tera, asina mi camindanan ta mas halto cu boso camindanan, y mi pensamentonan mas halto cu boso pensamentonan.” (Isa. 55:⁠9) Si nos ta kere e promesa cu Hesus a haci tocante e binidero resureccion, esey ta mustra cu nos ta confia den Jehova, mescos cu Abraham a confia den dje. Loke ta importante aworaki pa tur cristian ta di haci loke Dios ta pidi di nan. Si nos haci esey, nos lo ser considera “digno di gana bida den e mundo cu ta bin” hunto cu esnan cu lo ser resucita.—⁠Luc. 20:⁠35.

TIN MOTIBO PA CARGA SPERANSA

Si bo tene bo maraviyoso speransa bon cla na mente, esey lo yuda bo pa bo no bira ansha tocante futuro. For di un punto di bista humano, futuro ta pinta scur. Pero Jehova ta duna nos e speransa di algo mihor. Aunke nos no sa precies con Jehova lo bay satisface tur nos necesidad- y deseonan, nos no tin duda cu lo e hacie. Apostel Pablo a skirbi: “Ora un hende ta mira un cos cu e ta spera, esey no ta speransa. Pasobra lo e keda spera un cos cu e ta mira? Ma si nos ta spera riba loke nos no ta mira, nos ta sigui warda ansiosamente riba dje cu perseverancia.” (Rom. 8:24, 25) Un speransa firme den e promesanan di Dios lo yuda bo trata cu e perdida di bo casa. Si bo persevera, lo bo experencia e tempo maraviyoso den futuro ora cu Jehova “lo duna bo e deseonan di bo curason.” Lo e “satisface e deseo di tur ser bibo.”—⁠Sal. 37:4; 145:16; Luc. 21:⁠19.

Ora Hesus tabata cerca di muri, su apostelnan a bira hopi tristo y confundi, y nan a haya miedo. El a consola nan cu e palabranan aki: “No laga boso curason bira intrankil. Pone fe den Dios; pone fe den mi tambe.” Ademas, el a bisa nan: “Lo mi no laga boso manera huerfano. Mi ta bin cerca boso sigur.” ( Juan 14:1-4, 18, 27) A traves di siglonan, e palabranan ey di Hesus a duna su siguidornan ungi un motibo pa carga speransa y pa persevera. E hendenan cu ta anhela di mira nan sernan keri den e resureccion tampoco no tin nodo di bira desespera. Jehova cu su Yiu lo no laga nan bandona. Bo por ta sigur di esey!

a A cambia e nombernan.

Con Nos Por Anima un Persona Cu A Perde un Ser Keri?

Ora un cristian cu tabata casa muri, hopi hende, pa un periodo, ta bishita esun cu a keda atras pa dun’e consuelo y pa yud’e cu varios cos. Un viuda sigur lo keda hopi agradecido pa e atencion cu e ta haya di famia- y amigonan. Pero kisas e dolor di su perdida ta tuma tempo pa cura, y pesey lo e tin mester di consuelo y sosten pa mas tanto tempo. Bijbel ta bisa: “Un amigo ta stima tur ora bay, y un ruman ta naci pa tempo di adversidad.”—⁠Prov. 17:⁠17.

Kico bo por bisa un hende cu a perde un ser keri? Bijbel ta duna nos e conseho aki: “Boso tur pensa di acuerdo cu otro, mustra sintimento pa otro, cariño pa e rumannan, tierno compasion.” (1 Ped. 3:⁠8) Kisas pa un tempo un viuda of viudo no ta sinti su mes dje bon ey despues di morto di su casa. Pues, aunke nos tin bon intencion, ta mihor pa evita di puntra: “Con ta bay cu bo?” of “Bo ta sinti bo bon?” E persona por pensa: ‘Bo no por imagina bo con mi ta sinti mi!’ of ‘Con mi por ta bon den e situacion aki?’ Pues, lo ta mihor pa nos simplemente bisa algo positivo, manera, “Mi ta contento di mira bo”, of “Bo ta anima mi ora mi mira bo na salon.”

Lo bo por invita e persona cu a perde su ser keri pa bin come cerca bo of pa bay cana cu bo. Marcos, un viudo, a haya hopi consuelo cerca amigonan cu a bishit’e. Tocante kico nan a papia? El a bisa: “Nos no a papia hopi tocante mi problemanan, sino tocante tur sorto di cos animante.” Un viuda cu yama Nina a bisa: “Hopi biaha, mi bon amiganan ta bisa e palabranan corecto na e momento corecto. Tin biaha nan no ta bisa nada; gewoon nan ta sinta cerca mi.”

Si e viuda of viudo kier papia tocante morto di su casa, scuch’e cu atencion y pasenshi. No puntra cos simplemente pa curiosidad. No husga. Bo no tin nodo di conseh’e tocante con e mester demostra su tristeza ni pa cuanto tempo. No sinti bo ofendi si e persona kier ta su so. Bo por bin bek un otro ora. Sigui mustra amor.—⁠Juan 13:34, 35.

Bo Tin Pregunta Tocante Futuro?

Como hende, ta normal cu nos ta puntra nos mes con Jehova lo cumpli cu su promesanan. Abraham a pensa hopi biaha riba e promesa di Dios cu lo e haya un yiu homber. Jehova a anim’e pa tene pasenshi, y Abraham no a keda desapunta.—⁠Gen. 15:2-5; Heb. 6:10-15.

Jacob a sinti hopi falta di su yiu, Jozef, despues cu nan a laga Jacob kere cu el a muri. Añanan despues, ainda Jacob tabata yora Jozef, cu el a kere tabata morto. Pero Jehova tabatin un bendicion special pa Jacob, algo cu nunca Jacob por a imagina: El a contra cu Jozef atrobe, y hasta e tabatin e goso di conoce su nietonan. Jacob a bisa: “Nunca mi no a spera di mira bo cara, y ata, Dios a laga mi mira hasta bo yiunan.”—⁠Gen. 37:33-35; 48:⁠11.

Kico ta e lesnan cu nos por saca for di e relatonan aki? Di prome, nos por tin sigur cu nada no por stroba Dios Todopoderoso di cumpli cu su boluntad. Di dos, si nos ta haci oracion⁠—⁠y tambe actua⁠—⁠di acuerdo cu e boluntad di Jehova, lo e percura pa nos awor y satisface e necesidad- y deseonan cu nos lo tin den futuro completamente. Pablo a skirbi: “Na esun cu, segun su poder cu ta obra den nos, por haci infinitamente mas di tur loke nos ta pidi of por imagina, na dje sea gloria pa medio di e congregacion y pa medio di Cristo Hesus durante tur generacion pa tur eternidad. Amen.”—⁠Efe. 3:20, 21.