Vaye di Ela

David Versus Goliat —Esey A Sosode di Berdad?

Algun hende ta puntra nan mes si e relato tocante David y Goliat ta un historia real of djis un mito. Bo tambe a puntra bo mes esey segun cu bo tabata lesa e articulo anterior? Si ta asina, considera e siguiente tres preguntanan.

1 | Un persona en realidad por ta mas o menos 2,9 meter halto?

Un pintura cu ta mustra con halto Goliat por tabata compara cu un soldaat di estatura normal

Bijbel ta bisa cu Goliat “su haltura tabata seis codo y un span di man.” (1 Samuel 17:4) E midi di un codo tabata 44,5 centimeter largo, y un span di man tabata 22,2 centimeter. En total esey lo ta 2,9 meter. Algun hende ta insisti cu Goliat no por tabata asina halto, pero tuma nota di esaki: Den tempo moderno, e homber di mas halto cu nan a yega di registra tabata mas cu 2,7 meter halto. Lo no tabata imposibel pa Goliat ta mas o menos 15 centimeter mas halto, no ta berdad? E tabata di e tribu di Refaim, y e hombernan ey tabata conoci pa ta di tamaño extraordinario. Un documento Egipcio di siglo 13 prome cu Cristo ta bisa cu algun guerero spantoso den e region di Canaan tabata mas cu 2,4 meter halto. Pues, aunke Goliat su estatura tabata inusual, e tabata posibel.

2 | David tabata un persona real?

Un tempo, expertonan a purba di bisa cu David ta parti di un mito, pero despues esey a bira mas dificil pa haci. Arkeologonan a haya un inscripcion antiguo cu ta menciona “e cas di David.” Ademas, Hesucristo a papia di David como un persona real. (Mateo 12:3; 22:43-45) Hesus su identidad como e Mesias ta ser proba for di e echo cu tin dos genealogia cu ta mustra cu e tabata descendiente di Rey David. (Mateo 1:6-16; Lucas 3:23-31) Pues ta bisto cu David tabata un persona real.

3 | E sucesonan describi den e relato a tuma luga na un sitio real?

Bijbel ta bisa cu e bataya a tuma luga den e Vaye di Ela. Pero Bijbel ta bira mas specifico ainda, pasobra e ta bisa cu e Filisteonan a campa riba un sero un caminda meymey di dos pueblo, esta, Soco y Azeca. E Israelitanan tabata staciona riba un sero na e otro banda di e vaye. E luganan aki tabata sitionan real?

Wak kico un hende cu recientemente a bishita e area ey a bisa: “E persona cu a guia nos, cu no tabata un hende religioso, a hiba nos na e Vaye di Ela. Nos a cana subi un caminda cu a hiba nos na e rand di un sero. Segun cu nos tabata wak e vaye, el a bisa nos lesa 1 Samuel 17:1 pa 3. Despues el a mustra nos e vaye y a bisa: ‘Na bo man robes bo ta mira e ruinanan di Soco.’ Anto el a bira y bisa: ‘Na bo man drechi bo ta mira e ruinanan di Azeca. E Filisteonan a campa entre e pueblonan ey, un caminda riba e seronan boso dilanti. Pues ta posibel cu nos ta para caminda e Israelitanan a campa.’ Mi a pensa riba Saul y David y cu nan por tabata para net caminda mi tabata para. Despues nos a baha, y den e vaye nos a crusa un riu casi seco cu tabata yen di piedra. Mi no por a evita di imagina mi con David a buk y coy cinco piedra lizo, di cua un di nan a mata Goliat.” E bishitante ey, mescos cu hopi otro, a keda hopi impresiona cu e detayenan exacto cu tin den e relatonan di Bijbel.

No tin motibo pa duda cu e relato historico aki ta berdad. E ta contene hende y sitionan real. Y mas importante ainda, e ta parti di e Palabra inspira di Dios. Pues e ta bin di e Dios di berdad, esun cu “no por gaña.”—Tito 1:2; 2 Timoteo 3:16.