Visionnan Tocante Esnan Cu Ta Biba den Cielo

JEHOVA TA E SER SUPREMO

Bijbel ta conta: “Tabatin un trono den cielo y un persona sinta riba dje. Y apariencia di esun sinta riba e trono tabata briya manera e piedranan precioso yaspe y sardio, y tabatin un regenboog tur rond di e trono cu tabata briya manera esmeralda.”—Revelacion 4:2, 3.

“Y tabatin un splendor rond di dje. Manera e apariencia di regenboog den nubia riba un dia di awasero, asina e apariencia di e splendor tur rond tabata. Asina e apariencia di e semehansa di e gloria di SEÑOR tabata.”—Ezekiel 1:27, 28.

E visionnan cu apostel Juan y profeta Ezekiel a haya ta describi e splendor di e Dios Haltisimo, Jehova, cu cosnan cu nos por visualisa, manera piedra precioso, un regenboog y un trono mahestuoso. Nan ta mustra nos cu e presencia di Jehova ta sumamente bunita y impresionante. E ta transmiti pas y serenidad.

E descripcionnan aki di Dios ta cuadra cu e palabranan di e salmista, kende a skirbi: “SEÑOR ta grandi, y digno di ser alaba na gran manera; tambe e mester wordo temi mas cu tur dios. Pasobra tur e diosnan di e pueblonan ta idolo, ma ta SEÑOR a traha e cielonan. Splendor y mahestad ta su dilanti, fortaleza y bunitesa ta den su santuario.”—Salmo 96:4-6.

Aunke Jehova ta e Dios Supremo, e ta invita nos pa acerc’e den oracion y ta sigura nos cu e ta scucha nos. (Salmo 65:2) Dios ta stima nos asina hopi cu apostel Juan por a bisa: “Dios ta amor.”—1 Juan 4:8.

HESUS TA NA MAN DRECHI DI DIOS

Bijbel ta bisa: “[E discipel cristian] Esteban, yen di spirito santo, a hisa cara wak cielo y a mira e gloria di Dios y tambe Hesus para na man drechi di Dios. Y el a bisa: ‘Ata mi ta mira cielo habri y e Yiu di hende para na man drechi di Dios!’”—Echonan 7:55, 56.

Un poco prome cu Esteban a haya e vision aki, e lidernan religioso hudiu cu Esteban tabata papia cu ne a instiga e pueblo pa laga mata Hesus. E vision aki a confirma cu Hesus ta na bida y cu el a ser resucita y honra. Apostel Pablo a skirbi lo siguiente tocante esaki: “[Jehova] a lanta [Hesus] for di morto y a pon’e sinta na su man drechi den e luganan celestial. El a sinta mucho mas halto cu tur gobierno, autoridad, poder, dominio y tur nomber cu por ser menciona, no solamente den e era aki, sino tambe den esun cu ta bin.”—Efesionan 1:20, 21.

Ademas di describi Hesus su posicion eleva, e Scritura ta mustra cu mescos cu Jehova, e tambe ta masha interesa den hende. Durante Hesus su sirbishi riba Tera, el a cura hende malo y a lanta hende for di morto. Mediante su morto sacrificial, el a demostra cuanto amor e tin pa Dios y pa humanidad. (Efesionan 2:4, 5) E ta para na man drechi di Dios, y pronto lo e eherce su autoridad y trece gran bendicion pa hende obediente rond mundo.

E ANGELNAN TA SIRBI DIOS

Profeta Daniel a skirbi: “Mi a sigui wak te ora trononan a wordo poni, y e Anciano di Dianan [Jehova] a tuma su asiento ... Miles y miles tabata sirbie, y dies mil biaha dies mil tabata para su dilanti.”—Daniel 7:9, 10.

Den e vision di cielo aki, Daniel a mira no solamente un angel, ma un multitud di angel. Esey lo mester tabata un vision impresionante. Angel ta criatura inteligente y poderoso. Nan ta organisa den rango, cu ta inclui serafin y kerubin. Bijbel ta menciona angel mas cu 250 biaha.

Angel no ta hende cu tabata biba riba Tera. Dios a crea angel hopi mas prome cu el a crea hende. Ora Dios a crea Tera, e angelnan tabata presente pa observa y grita of aplaudi di alegria.—Job 38:4-7.

Un manera cu e angelnan fiel ta sirbi Dios ta ora nan ta envolvi den e trabou di mas importante riba Tera awe: e proclamacion di e bon noticia di e Reino di Dios. (Mateo 24:14) Apostel Juan a haya un vision cu a revela con angel ta yuda den e trabou aki. El a skirbi: “Mi a mira un otro angel ta bula meymey di cielo, y e tabata declara bon noticia eterno na esnan cu ta biba riba Tera, na tur nacion, tribu, idioma y pueblo.” (Revelacion 14:6) Angel no ta papia cu hende mas manera nan a yega di haci den pasado. Pero, loke si nan ta haci ta yuda guia hende cu ta predica e bon noticia na personanan di curason sincero.

SATANAS TA GAÑA MIYONES DI HENDE

Bijbel ta bisa: “Guera a cuminsa den cielo: Miguel [Hesucristo] cu su angelnan a bringa contra e dragon, y e dragon cu su angelnan a bringa contra nan, ma e no a triunfa ni no tabatin luga mas pa nan den cielo. Di manera cu e dragon grandi, e colebra original, esun cu yama Diabel y Satanas, cu ta gaña henter e Tera habita a ser benta abou; el a ser benta abou riba Tera y su angelnan a ser benta abou hunto cu ne.”—Revelacion 12:7-9.

No ta semper tabatin paz den cielo. Na principio di historia humano, un angel, cu tabatin un deseo pa haya adoracion, a rebeldia contra Jehova, y asina el a bira Satanas, cu ta nifica “Resistido” of “Opositor.” Mas despues otro angelnan a join e rebelion aki y a bira demoño. Nan ta opone Jehova severamente y ta gaña mayoria di hende pa pone nan bay contra di Jehova su guia amoroso.

Satanas y su demoñonan ta malbado y cruel. Nan ta enemigo di hende y a causa hopi di e sufrimento cu hende a pasa aden. Por ehempel, Satanas a mata e bestia- y sirbientenan di e homber fiel Job. Despues, el a mata tur e dies yiunan di Job ora el a manda “un biento fuerte” cu a destrui e cas cu nan tabata aden. Mas despues, Satanas a pone Job su curpa yena tur na “blufein cu [tabata] haci masha dolor, for di su plant’i pia te na su corona di cabes.”—Job 1:7-19; 2:7.

Pero, pronto Jehova lo caba cu Satanas. For di tempo cu Satanas a ser benta for di cielo den bisindario di Tera, e sa cu “a ked’e masha poco tempo.” (Revelacion 12:12) Satanas ta condena na destruccion. Esey sigur ta un bon noticia!

ESNAN CU TA BIN DI TERA

Bijbel ta bisa: “Bo [Hesus] a cumpra hende pa Dios for di tur tribu, idioma, pueblo y nacion; y bo a haci nan rey y sacerdote pa nos Dios, y como rey, nan lo goberna e Tera.”—Revelacion 5:9, 10.

Mescos cu Hesus, tin otro personanan cu ta haya resureccion pa biba den cielo. Hesus a bisa su fiel apostelnan: “Mi ta bay pa prepara un luga pa boso. Y ... lo mi bin bek y ricibi boso cerca mi, pa caminda mi ta, boso tambe por ta.”—Juan 14:2, 3.

Personanan cu ta bay cielo ta bay cu un proposito. Nan lo forma parti di un Reino, of gobierno, hunto cu Hesus y den futuro nan lo reina riba tur e habitantenan di Tera y trece bendicion pa nan. Esaki ta e Reino cu Hesus a bisa su siguidornan pa pidi p’e den e oracion modelo, bisando: “Nos Tata cu ta den cielo, bo nomber sea santifica. Laga bo Reino bin. Laga bo boluntad sosode, mescos cu den cielo, tambe riba Tera.”—Mateo 6:9, 10.

KICO ESNAN CU TA DEN CIELO LO BAY HACI?

Apostel Juan a bisa: “Mi a tende un stem duro for di e trono bisa: ‘Tende! E tent di Dios lo ta cu humanidad ... Y lo e seca tur lagrima for di nan wowo, y lo no tin morto mas; ni tristeza ni sclamacion ni dolor lo no tin mas. E cosnan cu tabata pasa antes no t’ey mas.’”—Revelacion 21:3, 4.

E vision profetico aki ta referi na e tempo den cua e Reino di Dios, cu ta consisti di Hesus y e personanan cu a ser resucita for di Tera, lo trece un fin na e gobernacion di Satanas y haci Tera un paradijs. E cosnan cu ta causa hende hopi dolor y tristeza lo no t’ey mas. Hasta morto lo no existi mas.

Pero awor, kico di e miles di miyones di hendenan cu a muri pero cu lo no haya resureccion pa bay cielo? Den futuro, Dios lo resucita nan cu e speransa di biba pa semper den Paradijs riba Tera.—Lucas 23:43.