“E Mihor Regalo Cu Mi A Yega di Haya”

Esey ta loke un hobencita di 13 aña a bisa ora el a haya un cacho como regalo. Un señora comerciante cu a haya un computer como regalo cerca su tata tempo e tabata bay scol secundario a bisa cu e regalo ey a cambia su bida. Y un esposo recien casa a bisa cu e carchi cu su esposa a traha p’e pa nan prome aniversario tabata e mihor regalo cu el a yega di haya.

Tur aña, hopi hende ta tuma tempo pa busca e “mihor” regalo pa un amigo of pa un miembro di famia pa un ocasion special. Y hopi kier mira e persona cu nan a duna un regalo reacciona manera e hendenan menciona na comienso di e articulo aki. Kico di abo? Lo bo tin gana di haya un regalo cu bo ta gusta of regala un hende algo cu lo e aprecia di berdad?

Si, esey por zona hopi bon, pasobra e hende cu haya e regalo lo keda masha contento y e hende cu a duna e regalo lo sintie bon. Al fin y al cabo, Bijbel ta bisa: “Tin mas felicidad den duna cu den ricibi.” (Echonan 20:35) Di mes, nos ta haya mas felicidad ora e persona cu nos a duna e regalo ta balor’e.

Pues anto, kico nos por haci pa tanto nos como e hende cu lo haya e regalo por ta feliz? Y si bo no por duna e hende e “mihor” regalo, kico bo por haci pa e aprecia bo regalo?