Educacion y Rikesa Por Garantisa Bo un Futuro Sigur?

Hopi hende ta pensa cu si bo tin un bon educacion y bo ta rico, lo bo tin un futuro sigur. Nan ta pensa cu si un persona bay universidad lo e bira un mihor trahador, un mihor miembro di famia y un mihor ciudadano. Nan ta pensa tambe cu si bo tin un bon educacion lo bo haya un bon trabou, y cu hende cu ta gana hopi placa lo ta feliz.

UN DECISION CU HOPI HENDE TA TUMA

Wak kico Zhang Chen, un homber di China a bisa: “Mi tabata kere cu mi mester a bay universidad pa sali for di pobreza y cu un bon trabou lo a garantisa un bida feliz.”

Hopi hende kier studia na universidadnan conoci, kisas hasta na otro pais, pa nan haya un mihor bida y pa nan tin un futuro sigur. Esaki tabata masha comun te ora cu COVID-19 a hacie dificil pa hende biaha. Mas o menos dies aña pasa un organisacion a haci un estudio, y nan a mustra cu mas cu mitar di tur studiante cu ta studia na otro pais ta di Asia.

Hopi biaha mayornan ta haci sacrificio grandi pa nan yiunan bay universidad na otro pais. Qixiang, di Taiwan, a bisa: “Mi mayornan no tabata rico, pero nan a manda ami y mi tres rumannan bay studia na Merca.” Pa paga pa e tipo di educacion ey Qixiang su famia, mescos cu hopi otro famia, mester a hinca nan mes den un debe grandi.

KICO TA E RESULTADO?

Un di e hende muhernan ey ta sinta anochi laat dilanti computer, cansa y yen di stress. — Hopi hende cu ta pone nan confianza den enseñanza superior y rikesa ta keda desapunta

Ta berdad cu educacion por mehora nos bida den algun manera, pero no ta semper e ta trece e resultado cu un studiante ta spera. Por ehempel, despues di traha duro hopi aña y fia placa pa paga pa educacion, hopi hende no por haya e trabou cu nan tabata kier. Rachel Mui a skirbi den e revista di Singapur Business Times: “Mas y mas hende cu gradua di universidad no por haya un trabou.” Jianjie, un homber bon studia cu ta biba na Taiwan, a bisa: “Hopi hende ta haya nan forsa pa acepta un trabou cu nan no a studia p’e.”

Hasta hende cu logra haya un trabou cu nan a studia p’e por realisa cu nan bida no a resulta manera nan a spera. Ora Niran di Tailandia a bin bek for di universidad na Europa, e si a haya un trabou cu el a studia p’e. Pero nota kico el a bisa: “Manera mi a verwacht, mi educacion a yuda mi haya un trabou cu bon salario. Pero, pa mi por a haya e bon salario ey, mi mester a traha hopi ora y mas duro. Cu tempo, e compania a kita hopi hende for di trabou, incluyendo ami. Mi a realisa cu ningun trabou por garantisa bo un futuro sigur.”

Hasta hende cu tin hopi placa y cu ta parce di tin un bida sigur tin cu trata cu problema di famia, maleza y un economia instabil. Katsutoshi di Japon a bisa: “Mi tabatin hopi placa, pero ainda mi no tabata feliz pasobra otro hende tabata jaloers riba mi y tabata trata mi malo.” Lam, un señora cu ta biba na Vietnam, a bisa: “Hopi hende ta purba di gana hopi placa, pasobra nan ta pensa cu esey lo yuda nan tin un bida sigur. Pero hopi bes esey ta trece mas preocupacion y nan ta hasta bira malo y deprimi.”

EDUCACION Y PLACA SO NO TA SUFICIENTE

Ta berdad cu hende mester di un educacion basico y placa pa nan por percura pa nan mes y nan famia. Sinembargo, e cosnan aki no ta suficiente pa garantisa bo un futuro sigur. Dicon no? Wak kico e Scritura Santo ta bisa.

ENSEÑANZA SUPERIOR NO SEMPER TA GARANTISA EXITO.

“No semper hende cu ta core duro ta gana un careda... . No ta tur hende inteligente ta rico, y no semper hende cu conocemento tin exito, pasobra calamidad y suceso inespera ta alcansa tur hende.”—ECLESIASTES 9:11, NW.

Hasta e hendenan mihor studia kisas lo no tin exito den bida, pasobra tin hopi cos cu ta fuera di nan control. Sin importa cuanto educacion un persona tin, si tin problema economico of politico den su pais of si hende tin prehuicio contra dje, lo ta dificil pa e ta exitoso.

RIKESA POR TA TEMPORAL.

“No cansa bo curpa pa rikesa; stop di preocupa pa esey. Ora bo pone bo bista riba dje, e no t’ey mas. Pasobra rikesa siguramente ta cria hala pa su mes, manera un aguila cu ta bula bay laira.”—PROVERBIONAN 23:4, 5.

Placa por trece un grado di siguridad, pero e siguridad ey ta temporal. Bo por perde tur bo placa den un frega di wowo. Desaster natural, manera temblor, candela di mondi y horcan por laga un persona sin placa y sin caminda di biba.

PLACA HOPI BES TA CAUSA PROBLEMA.

“Hende riku ku nunka no tin basta no por drumi trankil.”—PREDIKADOR [ECLESIASTES] 5:12, BPK.

Esey ta loke a pasa cu Franklin, un homber cu ta biba na Hong Kong. E tabata bon studia, y e tabatin un bon trabou. Despues, el a bira manager. El a bisa: “E stress a cuminsa afecta mi salud, mi a cuminsa preocupa asina tanto cu mi no por a drumi.” Dado momento e no tabata por mas. El a bisa: “Mi a cuminsa puntra mi mes dicon mi ta haciendo esaki, y mi a cuminsa pensa mas tocante e proposito di bida.”

“No mata kurpa pa bira riku.”—PROVERBIONAN 23:4, BPK.

Mescos cu Franklin, hopi hende a realisa cu tin cos mas importante den bida cu enseñanza superior y rikesa. En bes di enfoca riba cos material, algun hende ta busca un mihor futuro door di purba di ta un bon hende y haci cos bon pa otro hende. Esey lo garantisa bo un futuro sigur? E siguiente articulo lo contesta e pregunta ey.