CON NOS POR YUDA VENCE ODIO?

2 | No Tuma Venganza

Loke Bijbel Ta Bisa:

“No paga malo cu malo. ... Si ta posibel, te asina leu cu ta depende di boso, keda na paz cu tur hende. No tuma venganza, ... pasobra ta para skirbi: ‘Venganza ta di mi; ami lo paga bek, Jehova ta bisa.’”—ROMANONAN 12:17-19.

Kico Esey Ta Nifica?

Aunke cu ta normal pa rabia ora cu un hende trata nos malo, Dios no kier pa nos tuma venganza. Mas bien, e kier pa nos tene pasenshi, pasobra pronto e mes lo caba cu tur inhusticia.—Salmo 37:7, 10.

Loke Bo Por Haci:

Ora hende imperfecto tuma venganza, e ta causa mas odio. Pesey, si un hende ofende bo of haci bo daño, no tuma venganza. Purba di controla bo sintimentonan y reacciona na un manera pacifico. Den algun caso, ta mihor pa djis ignora loke a pasa. (Proverbionan 19:11) Den otro caso, kisas ta mihor pa raporta loke a pasa. Por ehempel, ora abo ta e victima di un crimen, bo por scoge pa raporta e crimen na polis of otro autoridad superior.

Tuma venganza no ta yuda bo cu nada

Awor kico si bo no ta mira un manera pacifico pa resolve e problema? Of kico si ya bo a haci tur loke bo tabata por pa resolve e problema na un manera pacifico? No tuma venganza. Esey probablemente lo haci e situacion bira mas pio. Si bo no tuma venganza, lo bo yuda vence odio. Confia cu Jehova lo resolve e problema na su debido tempo. Bijbel ta bisa lo siguiente tocante Dios: “Confia ... den dje, y e lo hacie.”—Salmo 37:3-5.

Experencia—ADRIAN

A Siña Cu Ta Mihor Pa No Tuma Venganza

Como adolescente, Adrian tabata violento, y e tabata cla pa bringa ora cu hende hacie daño. El a bisa: “Hopi biaha mi tabata envolvi den tiroteo, y varios biaha mi a keda tur na sanger y casi morto benta riba caya.”

Adrian a cuminsa studia Bijbel ora e tabatin 16 aña. El a sigui bisa: “Segun cu mi tabata siña mas durante mi curso di Bijbel, mi a mira e necesidad pa haci cambio den mi personalidad.” E mester a siña vence odio y stop di ta violento. El a beneficia masha hopi mes di loke el a siña na Romanonan 12:17-19, esta, pa no tuma venganza. El a bisa: “Mi a bin acepta cu Jehova lo atende cu inhusticia na su mes manera y na su mes tempo. Pocopoco mi a cambia mi estilo di bida violento.”

Un anochi, un gang cu antes tabata bringa contra Adrian a atac’e. E lider di e gang a grita: “Defende bo mes awor!” Adrian a bisa: “Mi tabatin hopi gana di defende mi mes.” Pero, en bes di cuminsa bringa, el a haci un oracion cortico na Jehova y a logra scapa y bay fo’i djey.

Adrian a sigui bisa: “Su manece, mi a topa e lider di e gang ora e tabata su so. Mi sanger a herbe den mi curpa, pero den silencio mi a bolbe pidi Jehova yuda mi controla mi mes. Pa mi sorpresa, e hoben a cana bin cerca mi y a bisa: ‘Pordona mi pa loke a pasa ayera nochi. Berdad ta cu lo mi tin gana di ta manera bo. Mi kier studia Bijbel.’ Mi tabata masha contento cu mi por a domina mi rabia. Danki na esey, el a cuminsa un curso di Bijbel.”