CON NOS POR YUDA VENCE ODIO?

4 | Vence odio Cu Yudansa Di Dios

Loke Bijbel Ta Bisa:

“Fruta di spirito ta amor, goso, paz, pasenshi, amabilidad, bondad, fe, suavidad, dominio propio.”—GALATIONAN 5:22, 23.

Kico Esey Ta Nifica?

Nos por vence odio cu Dios su yudansa. Spirito santo por yuda nos cultiva cualidad cu kisas nunca nos lo por a cultiva riba nos mes. Pues, en bes di purba di vence odio riba nos mes, lo ta bon pa nos depende riba e yudansa cu Dios ta duna nos. Si nos depende riba Dios su yudansa, nos lo sinti mescos cu Apostel Pablo, kende a bisa: “Pa tur cos mi tin forsa pa medio di esun cu ta duna mi poder.” (Filipensenan 4:13) E ora ey, nos tambe lo por bisa: “Mi yudansa ta bin for di [Jehova].”—Salmo 121:2.

Loke Bo Por Haci:

“Jehova a transforma mi di un persona violento pa un persona pacifico.”—WALDO

Haci oracion na Jehova y rog’e pa su spirito santo. (Lucas 11:13) Pidie pa yuda bo cultiva bon cualidad. Studia Bijbel y enfoca riba e cualidadnan cu por yuda bo vence odio, manera amor, paz, pasenshi y dominio propio. Busca manera pa demostra e cualidadnan ey den bo bida. Y cera amistad cu hende cu tambe ta purba di cultiva e tipo di cualidadnan ey. E tipo di amigonan ey por “stimula [bo] pa mustra amor y haci bon obra.”—Hebreonan 10:24.

Experencia—WALDO

A Vence Odio y Violencia

Como cu Waldo tabatin un bida masha dificil, el a bira un persona cu tabatin hopi odio. El a bisa: “Hopi biaha mi tabata haya mi den pelea di caya cu bendedonan di droga ... Un biaha, un gang rival a contrata un asesino notorio pa mata mi, pero mi a scapa cu solamente un hinca.”

Waldo no tabata contento ora cu su casa a cuminsa studia Bijbel cu testigonan di Jehova. El a bisa: “Mi tabatin masha rabia riba e Testigonan, y hopi biaha mi tabata papia palabra malo cu nan. Pero, pa mi sorpresa, semper nan tabata responde mi na un manera pacifico.”

Despues di algun tempo, Waldo tambe a cuminsa studia Bijbel. El a bisa: “No tabata facil pa mi aplica loke mi tabata siña. Mi tabata convenci cu nunca lo mi por a controla mi caracter violento.” Pero algo cu el a siña for di Bijbel a yud’e masha hopi mes.

Un dia, Alejandro, kende tabata studia Bijbel cu Waldo, a pidie pa lesa Galationan 5:22 y 23. Waldo a bisa: “Alejandro a splica mi cu e unico manera cu lo mi por a desaroya e cualidadnan ey ta cu yudansa di e spirito santo di Dios, y no riba mi mes forsa. E berdad ey a cambia mi punto di bista por completo.”

Como cu Waldo a laga Dios yud’e, el a logra vence odio. El a bisa: “Mi famia y mi amigonan di antes ainda no por kere cuanto mi a cambia.” Waldo a sigui bisa: “Jehova a transforma mi di un persona violento pa un persona pacifico.”