For di Kreashon te na Diluvio

Di unda shelu i tera a bini? Kon a yega di eksistí solo, luna i strea, i tambe e kantidat di kosnan riba tera? Beibel ta duna e kontesta korekto ora e ta bisa ku Dios a traha nan. P’esei nos buki ta kuminsá ku relatonan bíbliko di kreashon.

Nos ta siña ku e promé kreashonnan di Dios tabata personanan spiritual ku parse Dios mes. Nan ta angel. Pero Dios a traha tera pa hende manera nos. Ta p’esei Dios a traha e hòmber i e muhé yamá Adam i Eva, i a pone nan den un hòfi bunita. Pero nan a desobedesé Dios i a pèrdè e derecho di sigui biba.

En total, for di kreashon di Adam te na e Diluvio mundial, a pasa 1.656 aña. Durante e tempu ei a biba hopi mal persona. Den shelu tabatin personanan spiritual invisibel, esta, Satanas i su mal angelnan. Riba tera tabatin Kain i hopi otro mal hende, inkluyendo algun hòmber ku forsa ekstraordinario. Pero tambe tabatin bon hende riba tera—Abel, Enok i Noe. Den Parti UNU nos lo lesa tokante tur e hendenan ei i loke a sosodé.