Un Kuminda Nobo

BO SA ta kiko e hendenan ta piki for di suela? E ta parse sneu. E ta blanku i fini manera skama di piská. Pero no ta sneu, e ta algu pa kome.

Ta rònt di un luna so a pasa desde ku e israelitanan a sali for di Egipto. Nan ta den desierto. Masha poko kuminda ta krese ei, i p’esei e pueblo ta keha, bisando: ‘Mihó Yehova a mata nos den Egipto. Ei por lo ménos nos tabatin kuantu kuminda ku nos tabata ke.’

P’esei Yehova a bisa: ‘Mi ta bai hasi kuminda kai for di shelu.’ I esei ta loke Yehova a hasi. Su manisé ora ku e israelitanan a mira ku e tera tabata kubrí ku algu blanku, nan a puntra otro: ‘Kiko esei ta?’

Moisés a bisa: ‘Esei ta e kuminda ku Yehova a duna boso pa kome.’ E pueblo a yam’é MANA. El a smak manera buskuchi trahá ku miel.

Moisés a bisa e pueblo: ‘Boso tin ku piki nèt loke kada persona por kome.’ P’esei tur mainta esei ta loke nan a hasi. Anto, ora ku solo tabata bira kayente, tur mana ku a sobra riba tera tabata dirti.

Moisés a bisa nan tambe: ‘Ningun hende mag warda mana te e siguiente dia.’ Pero algun hende no a skucha. Bo sa kiko a sosodé? Su manisé e mana ku nan a warda tabata yen di bichi, i a kuminsá hole malu!

Sin embargo, tin un dia di siman ku Yehova a bisa e pueblo pa rekohé dòbel e kantidat di mana. Esei tabata e di seis dia. Anto Yehova a bisa nan pa warda un tiki mana pa e siguiente dia, pasobra lo e no a laga ningun mana kai e di shete dia. Ora nan a warda mana pa e di shete dia, e no a yena ku bichi i no a hole malu! Esei ta un otro milager!

Tur e añanan ku e israelitanan tabata den desierto, Yehova a duna nan mana pa nan kome.