‘Cielo ta Declara . . . ’

Aproximadamente 150.000.000 kilometer di unda bo tá awor aki, e solo ta resplandece den cielo manera bola di candela. Aunque hende a adoré como dios pa miles di aña, nos glorioso beciña celestial en realidad ta un testimonio dje poder di su Creador, “Creador di cielo i tera.” (Salmo 115:15) Su luz i calor ta necesario pa bida riba tera. I loke homber científico a siña tocante dje ta yénanos cu asombro.

Nan ta bísanos cu e solo ta produci un cantidad enorme di energía. Pero, bo tabata sa cu menos cu un mil millonésima di luz i calor cu e solo ta produci ta yega e tera? Sin embargo, e tiki ei ta igual cu e forza enorme di 240.000.000.000.000 cabai!

Con e solo ta produci tanto energía? Un fornu nuclear enorme den centro dje solo ta produci energía, kimando rond di 3.600.000 ton métrico cu hidrógeno of waterstof cada secondo. Nos por keda contentu cu tin suficiente combustible den e solo pe sigi produci energía pa miles di miyones di aña.

Algun descubrimento científico ta haci mas pregunta presenta. Por ehempel, tin vibracion of trillen den e solo constantemente, mescos cu plachi di metal ora hende ta dalé cu mokel. Pakico? Además, considera lo sigiente: E parti mas cayente dje solo ta su núcleo ardiente i mas leu un capa tá for dje núcleo, menos cayente e tá. Pero no ta asina en cuanto e capa exterior dje atmósfera dje solo, e corona. E corona ta mas cayente cu capa mas cerca e núcleo ardiente. Pakico?

Además, aunque e solo ta bira—mescos cu e tera—diferente parti di dje ta bira na diferente velocidad. Por ehempel, e superficie ta bira mas lihé cu capa interior. Pakico? I con esei ta posibel? També, e solo tin mancha. Tal mancha riba superficie dje solo ta bai i bin den ciclo regular durante un periodo di 11 aña. Pakico nan ta cambia di manera asina regular?

Aunque tin hopi cos pa siña tocante e solo ainda, loke nos sa caba ta hácinos tene reverencia pe Creador, Jehova Dios. Cada bez cu nos ta mira e solo, nos ta corda cu “cielo ta declara e gloria di Dios; i expansion ta informa di obra di su man.”—Salmo 19:1.