Nan Por Beneficiábo?

E REVISTA cu bo tin den bo man tin e propósito di ser un fuente di animacion, pa yuda hende corda guía bíblica cu ta haci famía firme i mantene integridad personal. E ta mustra cu e tempo dificultoso actual tabata profetizá den e Bijbel, i ta enfatizá e solucion, esta, e gobernacion dje Reino di Dios. Bo por beneficiá di E Toren di Vigilancia i di su compañé, e revista Despertad!?

Desde Isla Filipina un señora yamá Vilma a skirbi: “Si tin un solo palabra cu por pinta boso publicacion, mi ta kere cu esei ta ‘maraviyoso.’ Mi a mira i a leza pe promé bez boso Despertad! i E Toren di Vigilancia ora mi tabata den un bus bolbiendo na mi cas for di Manila. Generalmente mi sa hiba curant ora mi ta sali, pero e biaha ei mi no a hiba ningun.

“Sintá cant’i mi durante e biahe tabata un meneer di edad cu tabatin boso publicacion. Despues cu el a leza Despertad!, el a saca un otro revista, E Toren di Vigilancia. Mi a probecha dje oportunidad di fia e Despertad! Mi berdaderamente a goza e lezamento dje dos revista pasobra tur artículo tabata interesante, oportuno, i edificante.”

E señora a conclui: “Ami sí kier recibi boso revista. Haci fabor di informámi con mi por recibínan.” E sucursal di Testigo di Jehova den Isla Filipina a keda contentu pa complace e señora, poniendo su nomber riba e lista di abonador.