Ken ta kere den spiritu malu?

BO TA kere cu spiritu invisibel por influenciá bo bida? Hopi hende ta contestá cu un No enfático. Aunque nan ta reconoce e existencia di Dios, nan ta rechaza e idea di malechor sobrehumano.

E falta di kerimento den spiritu den e mundo occidental ta debí en parti ne influencia di cristiandad, locual pa siglonan a siña cu e Tera ta e centro dje universo, situá entre cielo i un fiernu di candela bao di tera. Segun tal siñanza, angel ta disfruta dje gozo di cielo mientras cu demoño ta atende na asuntonan den fiernu.

Ora descubrimento di ciencia a haci hende rechaza idea incorrecto tocante estructura dje universo, kerimento den persona spiritual a bira impopular. The New Encyclopædia Britannica ta bisa: “Durante e resultado dje revolucion di Copérnico di siglo 16 (fundá ariba teoría dje astrónomo polaco Copérnico), den locual . . . nan no a considerá e Tera como e centro dje cosmos mas sino, mas bien, como simplemente un planeta di un sistema solar cu ta un parti mashá chikito di un galaxia den un universo aparentemente infinito​—⁠e idea di existencia di angel i demoño no a parce apropiado mas.”

Aunque hopi hende no ta kere den spiritu malu, tin miyones di hende cu sí ta kere den nan. Angel pecador ta hunga un papel importante den hopi religion, tanto dje pasado como djawe. Además di nan papel como corruptor di spiritualidad, tal angel malbado ta ser considerá como agente di desaster, tal como gera, hamber, i temblor, i també como instigador di maleza, disturbio mental, i morto.

Satanás e Diabel, e spiritu malu principal den cristianismo i hudaísmo, ta ser yamá Iblis den e religion mohamedano. Den e religion di Persia di antigua zoroastrismo, Satanás tabata yamá Angra Mainyu [yamá despues Arimán]. Den e religion gnóstico, cu a florece durante siglo dos i tres EC, hende a kere cu e tabata Demiurge, e nomber duná na un dios envidioso i inferior locual e mayoría di humanidad a adora den ignorancia.

Spiritu malu inferior cu Satanás, ta hunga papel prominente den religion oriental. Hende hindú ta kere cu asuras (demoñonan) ta opone devas (diosnan). Asuras tin mashá miedu di rakshasas, spiritu mahós i spantoso cu ta habitá santana.

Budista ta kere cu demoño ta forza cu tin personalidad i ta stroba hende di obtene Nirvana, un estado sin deseo. Un tentador principal di nan ta Mara, cu su tres yiu muher Rati (Deseo), Raga (Placer), i Tanha (Inkietud).

Adorador chinés ta usa candela den aire liber, flambeo, i klapchi pa corre kuei, of demoño di naturaleza. Religion di Hapón també ta kere cu tin hopi demoño, incluyendo tengu spantoso, spiritu cu ta domina hende te cu un sacerdote ta sácanan afó.

Den religion oral di Asia, Africa, di isla di lamá, i dje dos continente americano, hende ta kere cu persona spiritual por yuda of perhudica conforme cu circunstancia i nan beis corriente. Hende sa venera tal spiritu pa evita calamidad i recibi fabor.

Pone cerca tur esei e interés na tur parti den mágica i spiritismo, i ta keda bisto cu kerimento den spiritu malu tin un historia largu na tur parti. Pero, ta razonabel pa kere cu tal persona spiritual ta existi? E Bijbel ta bisa cu nan sí ta existi. Sin embargo, si nan ta existi, pakico Dios ta láganan influenciá hende perhudicialmente?