Bo Ta Corda?

Bo a haña e reciente edicionnan di E Toren di Vigilancia di balor práctico pa bo? Anto pakico no test bo memoria cu e siguiente preguntanan:

▫ Pakico Testigonan di Jehova ta sigui bishitá nan próhimo?

Testigonan di Jehova mes kier e bendicion di Dios mediante e Reino primintí, i motivá pa amor pa nan próhimo, nan kier e mésun bendicion pa nan. Pues, siguiendo Jesus su ehempel, nan ta sinti nan impulsá pa amor inegoista pa bishitá nan próhimo. (Mateo 6:​9, 10; 22:​37-39)​—⁠15/8, página 8, 9.

▫ Pakico creencia den evolucion ta un asuntu di fe?

Científiconan nunca a mira cambio den sorto di bestia​—⁠ni cambio beneficioso​—⁠cu ta producí forma nobo di bida, tog evolucionistanan ta pretendé cu ta asina sortonan nobo a bin na existencia. Evolucionistanan no a presenciá e comienso spontáneo di bida, tog nan ta insistí cu ta asina bida a cuminsá.​—⁠1/9, página 5.

▫ Cua ta e mihó manera pa vence desanimacion cu por bini di restriccionnan den bida?

Sea cua sea nos situacion, si nos concentrá riba loke nos por haci en bes di lamentá riba loke nos no por haci, bida lo ta mas satisfaciente, i nos lo haña goso den e sirbishi di Dios. (Salmo 126:​5, 6)​—⁠1/9, página 28.

▫ Kico ta e beneficionan di pordoná?

Pordonando otronan ta promové bon relacionnan (Efesio 4:32); e ta trece, no solamente pas cu próhimo, sino tambe pas interno (Romano 14:19; Colosense 3:​13-15); pordonando otronan ta habri e caminda pa nos picánan por ser pordoná (Mateo 6:14); tambe, e ta yuda nos corda cu nos mes ta den necesidad di pordon. (Romano 3:23)​—⁠15/9, página 7.

▫ Con e ehempel di profeta Amos ta yuda nos den nos actividad di predicá?

Mescos cu Amos, nos no ta ni cambia ni reducí e forsa dje mensahe di Dios. En bes di esei, obedientemente nos ta declar’é sin importá e reaccion di nos oyentenan.​—⁠15/9, página 17.

▫ Cua característicanan di Dios nos mester imitá?

Dos característica significativo ta Jehova su abilidad di organisá i su felicidad. (1 Corintio 14:33; 1 Timoteo 1:11) E cualidadnan aki di Dios ta balansá, di manera cu ningun di nan ta ser hací supremo a costo dje otro.​—⁠1/10, página 10.

▫ Cua ta algun paso positivo cu mayornan a dal pa yuda nan yunan sirbi Jehova?

Un clave vital ta pa cuminsá trempan. Impresionnan ricibí i lesnan siñá durante e añanan tierno lo permanecé pa e resto di nan bida. (Proverbio 22:⁠6) Ta importante pa siña nan obedencia i respet pa Jehova i su adoracion na tur reunion. Mayornan exitoso ta siña reconocé tendencianan robes, i nan ta yuda nan yunan corigí nan. (Proverbio 22:15) Finalmente, cuminsá fiha metanan teocrático trempan pa bo yu cu razonablemente e por alcansá.​—⁠1/10, página 27-8.

▫ Ki rasgo distintivo di Jehova su pordon nos mester trata di pone na práctica?

Jehova ta tantu pordoná como lubidá. (Jeremías 31:34) Esaki ta difícil pa criaturanan humano haci. E importancia di haci esei a ser enfatisá dor di Jesus, manera ta pará skirbí na Mateo 6:​14, 15.​—⁠15/10, página 25-6.

▫ Cua ta tres obstáculo cu ta stroba nos di bira compasivo?

Debí na nos naturalesa humano pecaminoso, sintimentunan di envidia por saca rais. Si nos cuminsá envidiá un hende, con nos lo por trat’é cu tierno compasion? Exponiendo nos mes innecesariamente na violencia ta un otro obstáculo. Esaki tin e tendencia di haci nos insensibel pa cu e sufrimentu di otronan. Ademas, un persona egocéntrico probablemente lo falta compasion. (1 Juan 3:17)​—⁠1/11, página 19, 20.

▫ Ki lesnan nos por siña for dje relato bíblico tocante Job?

E relato di Job ta haci nos mas conciente di Satanas su trikinan i e ta yuda nos mira con Jehova su soberania universal ta relacioná cu integridad humano. Mescos cu Job, tur hende cu ta stima Dios mester ser poní na prueba. Nos tambe por wanta mescos cu Job a wanta, proba cu Satanas ta un mentiroso i disfrutá dje bendicionnan dje Reino di Dios.​—⁠15/11, página 20.

▫ Con e presidente di un cuerpo di anciano por mustra debido reconocimentu na cada anciano?

Ki ora cu ta posibel e presidente mester proveé un agenda suficiente tempu delantá pa permití e otro ancianonan pensa cuidadosamente huntu cu oracion riba cada punto cu ta ser presentá. N’e reunion di anciano, lo e no trata na forma e opinion dje ancianonan, sino lo e animá nan pa ehercé “libertad di expresion” riba asuntunan bou di discusion. (1 Timoteo 3:13)​—⁠1/12, página 30.