“E pas di Dios Cu Ta Surpasá Tur Pensamentu”

ATRABES di historia, sirbidornan fiel di Dios a pasa dor di periodonan di angustia emocional intenso. Ki cierto esaki ta awe, siendo cu nos ta biba den “tempu crítico, duru pa trata cuné”! (2 Timoteo 3:⁠1) Apostel Pablo a consehá cristiannan pa tira nan ansiedadnan riba Jehova mediante oracion. Cu ki resultado? “E pas di Dios cu ta surpasá tur pensamentu lo warda boso curason i boso facultad mental pa medio di Cristo Jesus.”​—⁠Filipense 4:⁠7.

Kico ta e “pas di Dios” aki? E ta un estado di trankilidad cu ta bini for di un relacion íntimo cu e Creador. Tal intimidad ta duna nos confiansa cu, sin importá nos angustianan, Jehova “lo no bandoná su pueblo; lo e no desampará esnan cu ta pertenecé na dje.”​—⁠Salmo 94:​14, Today’s English Version.[2]

Esaki no ta nificá cu nos ta inmuno pa adversidad. “Hopi ta e calamidadnan di esun hustu,” e salmista a skirbi. (Salmo 34:19) Pero e pas di Dios por trece alivio. Di ki manera?

E pas di Dios “ta surpasá tur pensamentu,” Pablo a skirbi​—⁠of manera e ta ser traducí den e Concordant Version, e ta “superior na tur estado mental.” Ansiedad por pone nos experenciá un variedad amplio di emocion angustioso. (Eclesiastes 7:⁠7) Sin embargo, e pas di Dios por stabilisá nos, specialmente ora nos mester di “poder cu ta mas ayá di loke ta normal.”​—⁠2 Corintio 4:7; 2 Timoteo 1:⁠7.

Ademas, e pas di Dios ta un proteccion. E por “warda boso curason i boso facultad mental,” manera Pablo a skirbi n’e filipensenan. E palabra griego traducí como “warda” ta un término militar cu probablemente a trece un cuadro mental di guardianan cu ta mantené un warda di dia i anochi. Den e mésun manera, e pas di Dios por actua como un guardia di 24 ora pa dia riba nos curason i nos facultad mental.​—⁠1 Corintio 10:13; compará cu Efesio 4:⁠26.

Considerando e desafionan yen di tension cu nos ta enfrentá awe, e pas di Dios no ta algu pa cua nos mester ta gradicidu?​—⁠Salmo 18:2; compará cu Exodo 40:⁠38.