“Jehova A Contestá Mi Oracion!”

ROND mundu, Testigonan di Jehova ta conduciendo casi cincu miyon studio di Bijbel na cas cu hende cu ta interesá den adkerí conocimentu exacto di Dios i di su propósito maraviyoso pa humanidad. Asta muchanan entre Testigonan di Jehova ta tumando parti den e trabou aki. Tuma, por ehempel, un mucha homber cu yama Joel. El a simbolisá su dedicacion na Jehova i a ser bautisá na edad di nuebe aña. Un aña despues e tabatin e experencia aki:

“Trahando den sirbishi, mi a topa un señora cu yama Candy. Mi a ofrec’é e foyeto ‘Mira! mi ta traha tur cos nobo.’ E tabatin e caba, pues mi a ofrec’é e buki Bo por biba pa semper den Paradijs riba tera. Ya caba e tabatin esei tambe. Anto mi a pensa, ‘Lo mi ofrecé e señora aki un studio di Bijbel.’ El a aceptá!

“Candy su ruman muher, cu tabata muriendo di cancer, a bin biba cerca dje. Ademas, Candy tabata studiando pa bira verpleegster. Pues pa un tempu, e studio di Bijbel a para. Pero ami cu mi mayornan a mantené contacto cuné dor di laga e revistanan cuné of cu su casá, Dick. Dick a conta nos cu Candy tabata warda e revistanan banda di su cama i anochi e tabata lesa nan.

“Cu tempu, e ruman muher di Candy a muri. Ami cu mi tata i mama a papia cu Candy tocante e condicion dje mortonan. El a dicidí di reanudá su studio di Bijbel. Un otro dia, nos a puntra Dick si e no tin gana di studia huntu cu Candy i asina hacié un studio di famia. Dick a haña cu esei tabata un bon idea. P’esei awor, ami, huntu cu mi tata, ta studiando tantu cu Dick como cu Candy. Nan ta haciendo bon progreso i ta expresá aprecio pa e studio di Bijbel.

“Mi tabata haci oracion pa haña un studio di Bijbel, i Jehova a contestá mi oracion!”