Reafirmacion dje Derecho Riba un Consentimentu Informa

UN SENTENCIA recien pronunciá dor dje Hues pa Investigacion Preliminar dje Corte di Messina, Italia, a reafirmá cu dokternan ta obligá pa sigui e deseonan médico di un pashent adulto. E fayo a ser dictá den un caso cu a enbolbé un Testigo di Jehova.

Na januari 1994, Antonino Stellario Lentini, un Testigo di 64 aña di edad cu ta sufri di hemofilia, a ser hibá lihé na un hospital na Taormina, Messina. E esposa di Antonino, Catena, a splica e personal médico dje hospital cu como Testigonan di Jehova, ni e ni su esposo lo no consentí cu un tratamentu cu ta enbolbé transfusion di sanger. (Echonan 15:20, 28, 29) Nan deseonan a ser respetá.

Sin embargo, durante transporte pa un otro centro di cuido di salú, Antonino a stop di hala rosea i a yega den un condicion crítico. Pronto despues di esei, el a muri. Esei tabata un golpi duru pa Catena, pero el a haña gran consuelo den e promesa bíblico di un resureccion. (Echonan 24:15) Anto, pa su gran sorpresa, e magistradonan—tal bes malinformá dor di noticianan incorecto cu a bin den publicidad dor di medionan di comunicacion—a acus’é di a causa e morto di su esposo debí cu el a nenga tratamentu p’e cu e dokternan a considerá necesario.

Despues di mas cu un aña, dia 11 di juli, 1995, Catena a ser absolvé, ya cu e no a cometé ningun crímen. De facto, e testimonio di expertonan médico a mustra cu, considerando e condicion dje pashent, intervencion médico lo no a yuda tog.

Pero e declaracion dje hues a indicá e cuestion principal. El a mustra cu ta difícil pa corte aceptá e idea cu personal médico tin derecho di intervení i duna un tratamentu cu e pashent of e personanan cu ta represent’é ta rechasá. El a agregá cu e código pa loke ta obligacion moral médico na Italia, “ta premirá e necesidad pa obtené e consentimentu informá dje pashent of di su representante promé cu cualkier intervencion.” Pues, el a declará cu Catena “legítimamente a impedí pa su esposo ser sometí na un operacion asina.”

E sentencia aki ta reafirmá e derecho di un adulto pa rechasá tratamentu médico cu ta na conflicto cu su deseonan.