Un Robo Fracasá na West Africa

Manera Eunice Ebuh a relatá

“Ladronnan armá a planea pa tira atraco riba e dia cu normalmente nos tin e Studio di Buki di Congregacion na nos cas. Nos ta habri nos porta di curá hanchu p’e rumannan i personanan interesá. Casi sigur e ladronnan tabata sa di nos custumber i nos ora di reunion. Nos ta sigur cu nan a horta un auto otro caminda i a bin para warda na nos porta riba e dia i na e ora di studio di buki.

Pa casualidad, e siman cu nan a bini tabata e siman dje bishita dje superintendente di circuito. En bes di reuní na nos cas, nos tabatin reunion na Salon di Reino. Despues cu reunion a caba, tabatin un reunion pa anciano. Normalmente, ami i e muchanan lo a bai cas, pero mi casá, cu ta un anciano, a pidi nos ward’é. El a bisa cu lo e no tarda mashá. Pues nos a warda.

Despues nos a ripará cu e auto no kier a start. E superintendente di circuito i mi casá no por a drech’é. E mecánico tampoco.

E muchanan a cana bai cas na pia. Despues di un ratu mi tambe a bai cas. Mi a yega rond di dies or. Ami ni e muchanan no a drenta e compleho cu auto, loke lo a rekerí pa nos a habri e porta grandi.

Ora mi a drenta mi kamber mi a tende un bala di scopet, hopi duru. Mi a puntra mi mes ta kico tabata pasando. Mi a purba yama polis, pero e telefon tabata morto. Mi a core bai abou i a lok e porta di entrada di heru i despues a core bai lok e porta meimei. Mi a paga e lusnan. Mi yunan a cuminsá haña miedu, p’esei mi a bisa nan pa keda calmu. Nos a haci oracion huntu, pidiendo Jehova pa su proteccion. Miéntras tantu, mi esposo tabata ketu bai na Salon di Reino ta bringa pa start e auto.

Mi a wak for di bentana i mi a mira un homber bentá pafó di cura. A parce cu e ladronnan a bai, pues mi a hinca e homber heridá den mi auto i a core bai hib’é hospital. E tabata un rísico, pero mi mester a haci algu, aunke lamentablemente, el a muri e siguiente dia.

Apesar dje tragedia ei, cosnan por tabata hopi mas pió. E bishita dje superintendente di circuito a nificá cu nos no tabatin studio di buki na cas. E echo cu e auto a daña a nificá cu nos famia no por a bai cas huntu den auto. Mi casá, kende e ladronnan lo a gara sigur-sigur, a yega cas te lat. E factornan aki i otronan tabata na nos fabor e anochi ei.

Jehova ta nos fortalesa i nos refugio. Ta manera e Scritura ta bisa: ‘A ménos cu Jehova mes tene warda riba e stad, di nada ta bal cu e guardia ta keda lantá.’”—Salmo 127:1.