“Boso Ta Actua Manera Dios Ta Spera di Nos”

DOR di cooperá cu autoridadnan seglar “pa causa di Señor,” cristiannan por verwagt cu hende lo ‘alabá nan como hacidónan di loke ta bon.’ (1 Pedro 2:13-15) Testigonan di Jehova na Sur Africa a experenciá esaki poco tempu pasá n’e congreso cu nan a tene den sala di campus di un universidad.

Riba e promé dia di congreso, e bewakernan dje universidad a prepará nan mes pa trata cu e cantidad di delegadonan furioso di custumber i cu no ta cooperá, manera nan a yega di topa durante otro tipo di congreso. Sin embargo, dor cu nunca nan a yega di trata cu Testigonan di Jehova, tabatin un sorpresa agradabel ta warda nan!

Como parti dje chekeo di siguridad rutinario na porta, e bewakernan a listra tur auto cu a drenta i sali for dje tereno. Nan a keda sorprendí cu e delegadonan tabata amigabel, cu pacenshi i respetuoso, asta ora cu e listramentu a tarda nan. No tabatin e resistencia, protesta i abla ofensivo di custumber. “Diferente for di otro bishitantenan,” un bewaker a bisa, “boso ta desplegá un spiritu humilde i ketu cu ta bisto pa nos tur.”

Una bes e hefe di siguridad a haña sa dje conducta cooperativo dje Testigonan di Jehova, el a dicidí cu no tabatin nodi listra nan auto mas “pasobra,” el a bisa, “boso ta masha bon disipliná.” Como resultado, autonan identificá cu stickernan di parkeer cu e letternan “TJ” por a drenta sin cu tabata listra nan.

Na final dje congreso, e hefe di siguridad a bisa cu e ta spera di mira e Testigonan pronto atrobe. “Hamas nos a yega di mira hende cu asina bon manera,” el a declará. “Boso ta actua manera Dios ta spera di nos.” Un encomendacion asina ta stimulá cristiannan berdadero mas ainda pa ‘mantené un conducta excelente,’ pa asina hende ‘como testigo ocular di nan obranan excelente por glorificá Dios.’—1 Pedro 2:12.