Bo Ta Corda?

Bo a lesa e edicionnan recien di E Toren di Vigilancia cuidadosamente? Si ta asina, lo bo haña ta interesante pa recordá lo siguiente:

◻ Cua ta algun pregunta cu dos cristian por puntra nan mes, promé cu nan pensa di comprometé pa casa?

‘Mi ta ègt sigur cu e otro persona ta un persona spiritual i deboto na Dios? Mi por imaginá mi ta sirbi Dios huntu cu e persona ei pa resto di mi bida? Nos cada un conocé otro su personalidad debidamente? Mi tin confiansa cu nos ta bai pas cu otro pa semper? Nos sa suficiente dje pasado i circunstancianan actual di otro?’—15/8, página 31.

◻ Kico Jesus tabata kier men ora el a bisa su disipelnan: “Boso ta e salu dje tera”? (Mateo 5:13)

Jesus a indicá cu e predicacion di su siguidónan na otro hende tocante e Reino di Dios lo mester tabatin un potencial efecto conserbador, esta salbador di bida, riba nan oyentenan. Sí, esnan cu a aplicá e palabranan di Jesus lo tabata protehá dje decadencia moral i spiritual cu a existí den mundu.—15/8, página 32.

◻ Con parehanan cu ta namorá por evitá e trampa di inmoralidad sexual?

Si bo ta den enamoracion, ta sabí di bo parti si bo evitá di ta bo so cu bo futuro casá den circunstancianan inapropiado. Ta mihó pa boso gosa di otro su compania den un grupo of na lugánan público. Pone límite na boso muestranan di cariño, respetando otro su sintimentunan i concenshi.—1/9, página 18.

◻ Kico ta comprendimentu?

E ta e abilidad di analisá un asuntu i dicerní su composicion dor di capta e coneccion entre su diferente partinan i e totalidad, i asina capta su sentido. (Proverbionan 4:1)—15/9, página 13.

◻ Kico Jehova ta pidi nos awe?

Básicamente, loke Jehova ta pidi di nos ta: Scucha su Yu i sigui su ehempel i siñansanan. (Mateo 16:24; 1 Pedro 2:21)—15/9, página 22.

◻ Ken so por experenciá pas?

Siendo cu Jehova ta “e Dios cu ta duna pas,” ta solamente hende cu tin amor pa Dios i respet profundo pa su principionan hustu por experenciá pas. (Romanonan 15:33)—1/10, página 11.

◻ Di ki manera Josef a adkerí e fortalesa moral pa bisa e esposa di Pótifar no, bes tras bes?

Josef a considerá su relacion cu Jehova di hopi mas balor cu placernan momentáneo. Tambe, aunke e no tabata bou di un código di ley divino, Josef tabatin un comprendimentu cla di principionan moral. (Génesis 39:9)—1/10, página 29.

◻ Nos disponibilidad pa pordoná nos rumannan ta ki importante?

Nos prospectonan pa sigui ricibí e pordon di Dios ta dependé na un grado mayor riba nos disponibilidad pa pordoná otronan. (Mateo 6:12, 14; Lucas 11:4)—15/10, página 17.

◻ Na ki sorto di picá Mateo 18:15-17 tabata señalá, i kico esei ta indicá?

E picánan cu Jesus tabata kier men tabata suficiente grave cu nan por a pone otro hende mira e malechor “mescos cu un hende dje nacionnan i mescos cu un cobradó di belasting.” Hudiunan no tabata asociá cu gentil, i nan tabata evitá cobradó di belasting. Pues, Mateo 18:15-17 ta referí na picánan serio, no djis ofensanan personal cu bo por djis pordoná i lubidá. (Mateo 18:21, 22)—15/10, página 19.

◻ Kico berdadero amor p’e Palabra di Dios ta encerá?

Amor p’e Palabra di Dios ta hiba un persona na biba na armonia cu su rekisitonan. (Salmo 119:97, 101, 105) Esaki ta rekerí ahuste constante den bo manera di pensa i di biba.—1/11, página 14.

◻ Debí cu nos a ricibí asina hopi for di Jehova su man, kico nos, na nos turno, por duna e Rey i Dunador di mas grandi?

Bijbel ta revelá cu e mihó regalo cu nos por duna Jehova ta “un sacrificio di alabansa.” (Hebreonan 13:15) Di con? Pasobra e sacrificio aki ta directamente relacioná cu salba bida, i esei ta loke mas ta interesá Jehova den e tempu di fin aki. (Ezekiel 18:23)—1/11, página 21.

◻ Kico Sálomon tabata kier men ora el a skirbi: “E palabranan di esnan sabí ta manera pui”? (Eclesiástes 12:11)

E palabranan di esnan cu ta poseé sabiduria di Dios ta hinca den e lector of oyentenan pa progresá na armonia cu e palabranan sabí cu nan ta lesa of tende.—15/11, página 21.

◻ Kico ta dicernimentu divino?

E ta e abilidad pa distinguí bon for di malu, anto scoge e curso corecto. Studia i aplicá e Palabra di Dios ta duna dicernimentu.—15/11, página 25.

◻ Cu kico un disponibilidad pa aceptá responsabilidad mester ser balansá? (1 Timoteo 3:1)

Mester balansá esaki cu sano huicio. Niun hende mester tuma asina tantu responsabilidad cu e ta perde su goso den sirbi Jehova. Un spiritu dispuesto ta encomendabel, pero disponibilidad mester reflehá modestia i “sano huicio” tambe. (Tito 2:12; Revelacion 3:15, 16)—1/12, página 28.

◻ Con bo por enfrentá e reto di ser mayor?

Dios ta consehá mayornan pa nan ta ehempel, compañero, comunicadó i maestro. (Deuteronomio 6:6, 7)—1/12, página 32.