“Con Nos Por Lanta Nos Parokianonan for di Soño?”

ORA cu recientemente e revista católico na frances, Famille Chrétienne (Famia Cristian), a haci e pregunta ei, pa hopi hende e no tabata un sorpresa. Cardinal Hume di Gran Bretania asta a yama e parokianonan, “gigantenan na soño.” A proponé pa gruponan di parokia predicá na otro como un medio pa stop e soño ei. Un pastor italiano a yam’é “evangelisacion directo cu métodonan nobo.” Aunke recientemente papa a animá iniciativanan asina, no ta tur hende ta mira e necesidad di compartí nan fe.

Recientemente, Pigi Perini, un pastor na Milan, a bishitá Africa caminda un soeur a bis’é: “Mi tin 40 aña caba akinan, i mi a logra pa nunca pronunciá e nomber di Jesus pa mi no daña e cultura africano.” E pastor ta concluí: “Nos no ta papia tocante Jesus mas, nos no ta compartí Jesus cu otronan mas, nos no ta predicá evangelio mas!” Sin embargo, pa otronan e trabou di predicá ta un parti importante di nan bida i un manera pa keda spiritualmente lantá. Pigi Perini ta admití: “Si bo topa dos hende na plasa ta papia tocante Cristo, of cu tin Bijbel den nan man, bo ta bisa den bo mes: Mir’ei, ta Testigo di Jehova!”

Miyones di hende ta gusta papia tocante e Palabra di Dios cu Testigonan di Jehova. Sin duda, Testigonan di Jehova tin areglo pa consideracionnan bíblico den bo comunidad tambe. Mescos cu den promé siglo, e cristiannan celoso aki ta animá otro pa compartí nan fe cu otronan. Nan lugánan pa reuní (Salon di Reino) ta lugánan di calor i amistad. Pakico no asistí na un dje reunionnan di Testigonan di Jehova i mira con bo por bringa contra soño spiritual?