El “A Wanta te na Fin”
DEN un video di 1993 cu ta ser presentá na miembronan nobo di personal dje sede di Testigonan di Jehova, Lyman Alexander Swingle a expresá su sintimentu tocante sirbi Jehova: “Muri cu boso boets bistí!”a
Ruman Swingle di 90 aña a haci precis manera el a animá otronan pa haci. El “a wanta te na fin.” (Mateo 24:13) Maske e tabata físicamente malu, diarason dia 7 di mart el a asistí na un reunion di e Cuerpo Gobernante di Testigonan di Jehova di cua e tabata miembro. E siguiente diamars su condicion a empeorá, i dia 14 di mart 4:26 a.m., su dokter a declar’é morto.
Lyman Swingle a cuminsá su sirbishi na e sede mundial di Testigonan di Jehova na Brooklyn, New York, dia 5 di april 1930. El a sirbi casi 71 aña einan. Na principio Lyman tabata asigná na e departamento pa encuaderná buki, despues na e drukkerij, i tambe el a yuda producí ink. De echo, ruman Swingle a traha 25 aña den e departamento cu ta producí ink. Tambe el a sirbi pa mas o ménos 20 aña como miembro di staf dje departamento di redaccion na e sede. E último 17 añanan di su bida el a traha den Oficina di Tesorero.
Lyman a proclamá e Reino di Dios cu curashi. Durante su promé añanan na Brooklyn, e cu su compañero di kamber, Arthur Worsley, tabata core un dje botonan di e Testigonan riba riu Hudson. Nan a pasa hopi fin di siman transmitiendo e mensahe di Reino na comunidadnan cantu dje riu, usando ekipo pa amplificá zonido.
Ruman Swingle a nace dia 6 di november 1910 na Lincoln, Nebraska, pero djis despues e famia a muda bai Salt Lake City, Utah. Einan, na 1913, su mayornan a bira Studiantenan di Bijbel, manera tabata yama Testigonan di Jehova e tempu ei. Atrabes di añanan, famia Swingle a hospedá vários orador bishitante cu a bini for dje sede di Testigonan na Brooklyn, i e hombernan aki tabatin un influencia positivo riba Lyman. Na 1923, el a bautisá na edad di 12 aña, como símbolo di su dedicacion na Dios.
Despues cu Lyman a sirbi pa mas cu 26 aña na Brooklyn como un homber soltero, su bida a ser enrikesé enormemente ora el a casa cu Crystal Zircher, dia 8 di juni 1956. Nan tabata inseparabel, i a participá huntu den e ministerio te ora Crystal a muri na 1998. Rond di tres aña promé, Crystal a haña un atake celebral cu a lagu’é seriamente desabilitá. E manera cu Lyman a yuda cuid’é diariamente tabata un ehempel di debocion cu a inspirá tur hende, foral esnan cu tabata mira Lyman ta pusha e rolstoel cu amor riba caya den e bario miéntras Crystal tabata ofrecé E Toren di Vigilancia i Spierta! na hende cu ta pasa eibanda.
Ruman Swingle tabata un homber franco i cariñoso, i esei a pone cu esnan cu a siña conoc’é a stim’é. Mescos cu su mama i su tata, e tabatin e speransa bíblico di biba huntu cu Jesucristo den e Reino celestial, un speransa cu nos tin sigur cu el a realisá awor.—1 Tesalonicensenan 4:15-18; Revelacion 14:13.
[Nota]
a Esaki ta nificá sigui activo den bo trabou te na morto.
[Plachi na página 31]
Ruman Swingle a sirbi rond di 25 aña den e departamento di producí ink
[Plachi na página 31]
Lyman i Crystal tabata inseparabel