“Esaki Sí Por Hasi Doló”

BO A yega di tende e palabranan ei? Kisas un dòkter òf un verplegster a yega di bisa bo asina promé ku e duna bo un tratamentu ku ta ser rekomendá.

Probablemente bo no a nenga di aseptá e tratamentu djis pa bo no sinti e doló ku nan a spièrtá bo di dje. Mas bien, bo ta wanta e doló pa despues bo por bira bon. Den kasonan ekstremo, aseptá òf rechasá un tratamentu doloroso por ta un asuntu di bida òf morto.

Maske no ta semper nos tin mester di atenshon médiko, nos tur ta hende imperfekto i nos tin mester di disiplina òf korekshon, asta ora e por ta un poko doloroso. (Yeremías 10:23) Enfatisando e nesesidat ku muchanan tin di esaki, Beibel ta bisa: “Lokura ta mará den kurason di un mucha; bara di korekshon lo alehá esaki for di dje.”—Proverbionan 22:15.

Den e kaso aki, bara ta un símbolo dje outoridat ku mayornan tin. Ta sierto ku masha poko mucha ta gusta disiplina. Si e ta enserá sierto kastigu, kisas nan por resistié. Sin embargo, mayornan sabí i amoroso ta wak mas ayá di e sintimentunan ofendí di nan yunan. Nan ta konsentrá riba e benefisionan ku ta bin den futuro . Mayornan kristian sa ku e Palabra di Dios tin rason ora e ta bisa: “Na e momentu mes ningun disiplina no ta parse di ta kousa di goso, sino di doló; ma pa esnan ku a wòrdu entrená dor di dje, despues e ta duna e fruta pasífiko di hustisia.”—Hebreonan 12:11; Proverbionan 13:24.

Klaro ku no ta mucha so tin mester di disiplina. Adultonan tambe tin mester di dje. Ta ku nan Beibel ta papia ora e ta bisa: “Gara instrukshon [disiplina, NW]; no lagu’é bai. Kuid’é, pasobra e ta bo bida.” (Proverbionan 4:13) Sí, hende sabí—hóben i bieu—ta aseptá disiplina basá riba e Palabra di Dios, Beibel, pasobra ora nan hasi esei, ku tempu lo e protehá nan bida.